1 Timoteo 1
1
Pablopa naa bɨda nãɨ k'art'ade
1Mɨ Pablopɨ, Jesucristopa peedapɨ. Tachi Ak'õre tachi K'aripaparipa mãɨnepa Tachi Chipari Jesucristopa mɨ nãɨya bɨsidama. Tachia Jesucristode ĩjãapatama mãɨnepa ichi k'orea pia p'ananait'a k'awapatama. 2Timoteo, mɨa nãɨ k'art'a pɨ pae bɨruma. Mɨnepa Cristode ĩjãana pẽra pɨ piarã mɨ warra jĩra bɨma. Mɨa k'ɨ̃ria bɨma Tachi Pajãnepema Ak'õrepa#1:2 Tachi Pajãnepema Ak'õre. K'ãp'ũra pedeade bɨ bɨma: Dios el Padre. mãɨnepa Tachi Chipari Jesucristo pida ãchi sõpiadepa pɨ k'aripa p'ananamẽrá, k'ĩra chupuria p'ananamẽrá mãɨnepa ne k'ɨ̃risiawẽa bapi p'ananamẽrá.
Sea jarateapataɨrã́ itu jarateapirãse
3Mɨa pɨá chichupuria idida jĩra Macedonia tuadea wãside, aba mãicha jararuma: Ep'esode beese, chi ne awara jarateapataɨrã́ waa jarateapidaemaapa. 4Ãchiá jarase chõarãenapema nepɨra k'orea mãɨnepa tachi chõarãenapemarã minachia nɨbasi t'ɨ̃ne minachia k'ɨ̃risiapidaemaapa. Mãɨpa k'ĩruu pedea tuaneepiparima. Tachi k'aripak'ama Tachi Ak'õrepa oopi bɨ oodamẽrá. Abapuru ichi pedeade ĩjãa p'anɨnepa p'ue oodaipɨ. 5Mɨa mãɨya jara bɨma ũpẽarãpa k'ɨ̃risia piadepa, sõpiadepa, piarã Tachi Ak'õrene ĩjãa p'anɨnepa chi k'ɨ̃ria tuananamẽrá. 6Maamina waapẽarã o ãyá wãsidama. Maapae paritua pedea tachi k'aripak'á bɨ k'orea pedeapatama. 7Ãchia Moisepa bɨda jarateapataɨrã pa k'ɨ̃ria p'anɨma, maamina minachia k'awa p'anɨ jĩra jarateapatamina atua p'anɨma k'ãre jaratea p'anɨt'a.
8Tachia k'awa p'anɨma mãɨ Moisepa bɨda piapɨ. Maamina arí jarateadai p'anɨma. 9Nãɨt'a k'awadai p'anɨma: Tachi Ak'õrepa mãɨ Moisepa bɨda teaé pasit'a chi jĩp'a be k'orea, mãɨpari teasima chi Tachi Ak'õrepa jara bɨ jĩra oodak'aɨrã k'orea, chi k'ɨɨrɨwẽa be k'orea, chi Tachi Ak'õre nea be k'orea, chi nemietá oo be k'orea, chi Tachi Ak'õre wap'eadak'á be k'orea, chi nãɨ ĩjũanepemarã jĩra p'anapataɨrã, chi ãchi ak'õre peapataɨrã k'orea, chi nae peapataɨrã k'orea, chi mĩa peapataɨrã k'orea, 10chi k'ima awaraɨ ome k'ãipataɨrã k'orea, chi ara ãchi abarik'aɨrã ome k'ĩra p'era oopataɨ k'orea, chi ẽpẽrarã jitadak'ari netopataɨrã k'orea, chi seajarapataɨrã k'orea, chi nepɨra ak'ɨparí k'ĩrari seajarapataɨrã k'orea mãɨnepa chi piarã pedea jara bɨt'a oodak'aɨrã k'orea. 11Tachia chi Tachi Ak'õre k'orea pedea pi-ia jarateautade, mãɨ ãarea k'awapidaipɨ. Tachi Ak'õre pia bɨpa mãɨ mɨá teasima jaratea bamẽrá.
Tachi Ak'õrepa Pablo k'ĩra chupuriada
12Tachi Chipari Jesucristopa mɨ jua chaarea bɨpisima ichi pedea jaratea bamẽrá. Ichia k'awasima mɨa nejõma jĩp'a ooit'a ichi pae. Mãɨpuru mɨ bɨsima ichia k'ɨ̃ria bɨt'a oo bamẽrá. Mãɨ k'orea mɨ sõpia bɨade aruma ichiá. 13Naena mɨa ichi k'orea piawẽa pedea bapachima mãɨnepa ichidirã ẽp'ẽ bapachima mĩapii k'orea. Chĩará k'achia pedea bapachima. Ichide waidi ĩjãawẽa bada pẽra mãɨnepa atua bɨdepa mãɨya piawẽa oo bapachima. Maamina ichia mɨ k'ĩra chupuriasima. 14Tachi Chipari Jesucristopa ichi sõpiadepa mɨ minachia k'aripasima ichide ĩjãamẽrá mãɨnepa ichi k'ɨ̃ria uru bamẽrá.
15Nãɨ pedea piarã arí bɨ pẽra jõmãɨrãpa ĩjãanai p'anɨma: Jesucristo nãɨ ĩjũanea chesima nemietá oopataɨrã k'aripai k'orea. Mãɨrãnepema, mɨt'u chi atepe k'achia pará basima. 16Maamina mãɨ k'orea Tachi Ak'õrepa mɨ k'ĩra chupuriasima. Mãɨya Jesucristopa mɨ, chi k'achia badadepema unupisima ichia ãarea pia choa bɨt'a. Mɨnepa chi wapida ĩjãanak'apɨɨrã́ k'awapisima sãmaasã́ ẽpẽra k'achia k'ĩra chupuriaparit'a ewaricha chok'ae p'aneenamẽrá. 17Tachi Ak'õre chi ewaricha jõmãɨrã Chiparipɨ. Ichi chi tachia ununak'aɨ piuk'ama. Ichit'u Tachi Ak'õrepɨ.#1:17 Ichit'u Tachi Ak'õrepɨ. Griego pedeade chi eda waapẽarã k'art'ade bɨ bɨma: ichit'u chi ne k'awa bɨ Tachi Ak'õrepɨ. Ichiá tachia ewaricha pia pedeadai p'anɨma mãɨnepa wap'eadai p'anɨma. Mãɨya beese.
18-19Mɨ warra Timoteo, mɨa Tachi Ak'õrepa naena jara peeda pɨ k'orea k'ɨ̃risiarude, pɨa ooi bɨt'a jara peeruma. Mãɨne Cristode ĩjãa bɨdepa mãɨnepa k'ɨ̃risia jĩp'a bɨdepa chi pedea piarã uru base waapẽarã t'ãena, papaká bɨ k'ĩruupari jĩra. Waapẽarãpa k'ɨ̃risia pia uru p'anana itu bɨdak'ari ãchia Cristode ĩjãa p'anɨ itu bɨsidama. 20Mãɨnepemarã aba Himeneo pasima. Abaɨ Alejandro pasima. Ãchi mɨa tiore juade bɨsima k'awadamẽrá Tachi Ak'õre k'orea waa piawẽa pedeapidaemaapa.
Currently Selected:
1 Timoteo 1: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
