2 Corintio 6
6
1Taipa Tachi Ak'õre ome ichia oo bɨt'a oo p'anɨẽra, mãrá chichupuria idiutama Tachi Ak'õrepa ichi sõpiadepa k'aripa bɨt'a itu bɨpidaemaapa. 2Tachi Ak'õre pedeade nãɨya jara bɨma:
«Chi mɨa k'aripai k'orea bɨda ewaride pɨa idida mɨa ũrisima.
Mãɨ ewaride mɨa pɨ k'aripasima».#Isaía 49:8.
Mɨa piarã jararuma: idi Tachi Ak'õrepa ichi sõpiadepa k'aripa bɨma. Idi Tachi Ak'õrepa tachi k'aripaparima.
3Tai k'orea abaɨa piawẽa unupidawẽa p'anɨma, mi ãpia pida piawẽa pedeapidaemaapa taipa jarateapataɨ k'orea. 4Mãɨpari ne ãareaɨne unupi p'anɨma tai Tachi Ak'õre pae pari mimiapataɨrã. Minachia mĩa p'anɨne, nenea p'anɨne mãɨnepa nepɨrade p'anɨne jõma choa p'anɨnepa mãɨya unupi p'anɨma. 5Soapa p'e p'anɨne, eda jɨ̃a nɨbɨ p'anɨne mãɨnepa tai k'orea k'ĩruupik'a p'anɨne mãɨya unupi p'anɨma. Minachia mimia p'anɨne, k'ãinawẽa p'anɨne mãɨnepa nek'odawẽa p'anɨne mãɨya unupi p'anɨma. 6-7Tai jĩp'a nipadadepa, piarã k'ɨ̃risia k'awaadepa, jõma choa p'anɨnepa, sõpiadepa, Tachi Ak'õre Jaore tai sõne bɨdepa, piarã k'ɨ̃rianepa, chi piarã pedea jaratea p'anɨnepa, mãɨnepa Tachi Ak'õre jua chaareadepa mãɨya unupi p'anɨma. Tai jĩp'a p'anɨnepa nemietá p'uepatama mãɨnepa ara mãɨ jĩp'a p'anɨnepa taipa chi nemietá itu p'uepidakama.#6:6-7 Griego pedeade nãɨya bɨ bɨma: tachi juaraari mãɨnepa juawieri. 8Edaɨde waapẽarãpa tai k'orea pia jarapatama. Edaɨde k'achia pedeapatama. Edaɨde tai k'orea piawẽa t'ɨ̃ p'oapipatama. Edaɨde pia t'ɨ̃ p'oapipatama. Taipa chi piarã pedea jara p'anɨmina waapẽarãpa jara p'anɨma taipa sea jara p'anɨt'a. 9Tai pia k'awa p'anɨmina ãchia ununak'apɨ́ ẽpẽrarã jĩra oopatama. Tai piumaa p'anɨ jĩra k'ɨ̃risia p'anɨmina wapida chok'ae p'anɨma. Tai soapa p'epatamina peadak'ama. 10Tai sõp'uapatamina ewaricha arapá p'anɨma. Tai nenea k'edema. Maamina taipa chok'ará ẽpẽrarã́ Tachi Ak'õre k'orea k'awapipatama ãchi erreara uru be jĩra p'ananamẽrá. Tai nenea p'anɨmina Tachi Ak'õrenepa nejõma uru p'anɨma.
11Ũpẽarã Corinto p'uurudepemarã, taipa sõnepa mãra minachia k'ɨ̃ria p'anɨ pẽra mãɨya piarã jara p'anɨma. 12Piarã taipa mãra sõnepa k'ɨ̃ria p'anɨma, maamina mãrapa sõnepa tai k'ɨ̃rianawẽa p'anɨma. 13Mãɨpuru mɨa mãrá chichupuria idiruma ak'õrepa ichi warrarã́ chichupuria idipari jĩra: taipa sõnepa mãra k'ɨ̃ria p'anɨ jĩra mãra pida machi sõnepa tai k'ɨ̃ria p'anat'ɨ.
Cristode ĩjãanak'apɨɨrã ome pedea bɨrãt'ɨ
14Cristode ĩjãanak'apɨɨrã ome pedea bɨrãt'ɨ. ¿Ẽpẽra jĩp'a bɨ sãmaasã́ ẽpẽra k'achia ome pia baima? ¿Chi ɨnaane bɨ sãmaasã́ chi p'ãrione bɨ ome pia baima? 15¿Cristo sãmaasã́ tiore ome pia baima?#6:15 Tiore. Griego pedeade nãɨya bɨ bɨma: Belial. ¿Cristode ĩjãa bɨ sãmaasã́ Cristode ĩjãak'apɨ́ ome pia nipaima? 16¿Juapa oodada sãdo Tachi Ak'õre te minachia bɨde bai bɨk'ãra? Piarã tachi chi Tachi Ak'õre minachia chok'ae bɨ tepɨ. Mãɨ k'orea Tachi Ak'õrepa ichi pedeade nãɨya jarasima:
«Mɨ ãchi ome baipɨ. Ãchi t'ãena nipaipɨ.
Mɨ Tachi Ak'õre ichidirã paipɨ mãɨnepa ãchi mɨ ẽpẽrarã p'uuru padaipɨ».#Levítico 26:12; Ezequiel 37:27.
17Mãɨpuru Tachi Chiparipa nãɨya jarasima:
«Ãchidepema ãyá wãt'ɨ. Ãchi ome ará p'anarãt'ɨ.
Mɨmá chi piawẽa bɨt'a itu bɨt'ɨ. Maapae mɨa mãra pia jitaipɨ.#Isaía 52:11; Ezequiel 20:41.
18Mɨ mãra Ak'õre paipɨ. Mãra mɨ warrarã padaipɨ mãɨnepa mɨ k'aurã padaipɨ.
Tachi Chipari chi Ne Ãarea P'ue Bɨpa mãɨya jara bɨma».#2 Samuel 7:14; 1 Crónica 17:13; Isaía 43:6.
Currently Selected:
2 Corintio 6: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
