2 Corintio 5

1Nãɨ ĩjũane tachi k'ak'ua tãaraa choak'a pẽra, te mẽa p'ãemari k'obɨ jĩra bɨma.#5:1 Nãɨ versiculode, chi te tachi k'ak'ua jĩra bɨma. Chi te ãnimara e oodada tachi piui bɨ k'ak'ua jĩra bɨma. Mãɨpari, chi pajãnepema te tachi piuk'apɨ́ k'ak'ua jĩra bɨma. Tachia k'awa p'anɨma nãɨ k'ak'ua piuk'ari Tachi Ak'õrepa tachiá tachi pajãnepema piuk'apɨ́ k'ak'ua teait'a. Mãɨ k'ak'ua ẽpẽrarãpa juapa p'ue oodaiwẽma. 2Mãɨ k'orea nãɨ k'ak'uade p'anɨne tachia chi pajãnepema k'ak'ua minachia jita k'ɨ̃ria p'anɨma. 3Tachia mãɨ pajãnepema k'ak'ua uru p'ananai pẽra k'ak'ua nea p'ananaiwẽma.#5:3 Chõarãena chi griegorãpa k'ɨ̃risiapachidama tachi k'ak'ua piawẽa bɨt'a. Mãɨpari tachi jaore pia bɨade a k'ɨ̃risiapachidama. Mãɨpuru k'ɨ̃risiapachidama tachi mãɨ piurude, tachi jaore tachi k'ak'uadepa wãpachima. Ãchimá, mãɨt'u tachi ewaricha baparí pasima. 4Piarã tachi nãɨ k'ak'uade p'anɨne minachia mĩapatama mãɨnepa sõp'ua bɨdepa pedeapatama. Maamina mɨa jarawẽa bɨma tachi piu k'ɨ̃ria p'anɨ, nãɨ k'ak'ua uru p'aneenaemaapa. Mãɨpari pajãnepema k'ak'ua jita k'ɨ̃ria p'anɨma. Mãɨya tachi k'ak'ua piui bɨt'a jõk'ari tachi k'ak'ua piuk'apɨɨt'u beeipɨ. 5Piarã Tachi Ak'õrepa tachi mãɨ k'orea oosima. Ichi Jaore tachiá teasima k'awadamẽrá jõma ichia teai jarada piarã atadait'a.

6Mãɨpuru ewaricha tachi ne k'ɨ̃risiadawẽa mãɨnepa wap'eawẽa p'anɨma. K'awa p'anɨma nãɨ k'ak'uade p'anɨne Tachi Chipari bɨmá p'anɨwẽma. 7Tachi taupa unu p'anɨnepa nipadak'ama, mãɨpari Tachi Ak'õrene ĩjãa p'anɨnepa nipapatama. 8Mãɨya tachi ne k'ɨ̃risiadawẽa mãɨnepa wap'eawẽa p'anɨma. Tachi nãɨ k'ak'uadepema minachia wã k'ɨ̃ria p'anɨma Tachi Chipari ome ará p'ananai k'orea. 9Mãɨ k'orea nãɨ k'ak'uade p'anɨne wa piusidara, tachia jõma oo k'ɨ̃ria p'anɨma Tachi Ak'õrepa pia unumẽrá. 10Piarã Cristopa jõma tachia oodada ak'ɨipɨ. Ichia tachicha teaipɨ tachia nãɨ k'ak'uade oo bada jĩra. Pia oo badapɨra, ara mãɨ jĩra teaipɨ. Piawẽa oo badapɨra, ara mãɨ jĩra teaipɨ.#5:10 Nãma Pablopa bɨsima chi Cristopa ĩjãapataɨrã oodada ak'ɨi k'orea. Apocaliside Juanpa bɨsima mãɨ awara ẽpẽra nepɨra ak'ɨi k'orea. Mãɨ k'aadeapema ewaride Tachi Pajãnepema Ak'õrepa ĩjãanak'apɨɨrã chok'ae p'irabaripik'oak'ari, ãchi nepɨra ak'ɨk'ari maapae ãchicha t'ɨpɨ uruade ɨtɨaipɨ. Apocalipsi 20:11-15.

Tachi Ak'õrepa nãɨ ĩjũanepemarã ichi ome pia bɨda

11Tachi Chipari wap'ea p'anɨ pẽra taipa ẽpẽrarã́ jara p'anɨma ichide ĩjãanamẽrá. Tachi Ak'õrepa k'awa bɨma taipa k'ɨ̃risia piadepa jaratea nipadada. Mɨa k'ɨ̃risia bɨma mãra pida mãɨ k'awa p'anɨt'a. 12Mãicha ara tai k'orea mãrá pia pedea p'anɨwẽma, mãɨpari k'ɨ̃ria p'anɨma mãrapa tai k'orea p'ue pia k'ɨ̃risiadait'a. Mãɨya chi eda waapẽarãpa tai k'orea k'achia pedeautade mãrapa tai k'orea p'ue pia jaradaipɨ. Jãɨrãpa ãchi taupa pia unu bɨt'a pia bɨade a k'ɨ̃risiapatama. Maamina sõnepema k'ɨ̃risiadak'ama. 13Waapẽarãpa jara p'anɨma tai k'ĩra piawẽa p'anɨt'a. Tai mãɨya p'anɨpɨra, Tachi Ak'õrepa jara bɨ oodai k'orea mãɨya p'anɨma. Tai k'ĩrip'a p'anɨpɨra, mãra k'aripadai k'oreapuru mãɨya p'anɨma. 14Cristopa tai k'ɨ̃ria bɨ pẽra ichia k'ɨ̃ria bɨt'a oo p'anɨma. Mãɨ k'ɨ̃risiadak'ari, piarã k'awa p'anɨma Ẽpẽra Aba piusit'a jõmãɨrã k'orea. Mãɨpuru Tachi Ak'õre k'ĩrari jõmãɨrã piusidama. 15Piarã Cristo jõmãɨrã k'orea piuk'ari chok'ae p'irabarisima tachi chok'ae berãpa ara tachia oo k'ɨ̃ria p'anɨ jĩra waa oopidaemaapa, mãɨpari ichia k'ɨ̃ria bɨ jĩra oo p'ananamẽrá.

16Mãɨ k'orea nãɨ ĩjũanepemarãpa waapẽarã ak'ɨpata jĩra naapae taipa mãɨya ak'ɨdak'ama. Naena taipa Cristo k'orea mãɨya k'ɨ̃risia p'anɨmina naapae mãɨya oodak'ama. 17Piarã abaɨ Cristo ome bɨpɨra, ichi naena bada jĩra bɨwẽma mãɨpari ichi ẽpẽra chiwidi jĩra bɨma. 18Jõma mãɨ Tachi Ak'õrepa oosima. Cristodepa tachi ichi ome pia bɨsima mãɨnepa tai bɨsima mãɨ k'orea ẽpẽrarã́ jarateadamẽrá. 19Piarã Cristodepa Tachi Ak'õrepa nãɨ ĩjũanepemarã ichi ome pia bɨsima. Tachia nemietá oodada jõma k'ɨ̃risia atuasima. Mãɨnepa mãɨ pedea ichi ome pia bai k'orea taiyá teasima jarateadamẽrá. 20Mãɨpuru Cristopa tai peesima ichi pari pedeadamẽrá. Taidepa Tachi Ak'õrepa mãrá t'ɨ̃ bɨma ichi ome pia p'ananamẽrá. Taipa Cristo t'ɨ̃nepa chichupuria idiutama: Tachi Ak'õre ome pia p'anat'ɨ. 21Cristopa nemietá ook'a pasima. Maamina tachi k'orea Tachi Ak'õrepa ichi nemietá ooparí jĩra unusima.#5:21 Ichi nemietá ooparí jĩra unusima. Griego pedeade nãɨya bɨ bɨma: ichi nemietá oosima. Mãɨya Cristodepa Tachi Ak'õre jĩp'a bɨt'a waapẽarã́ p'ue unupipatama.

Currently Selected:

2 Corintio 5: tdc

Highlight

Copy

Compare