1 Corintio 14
14
Tachia ũrinak'apɨ́ pedeade pedeapataɨ k'orea
1Waapẽarã k'ɨ̃ria p'anapariet'ɨ, mãɨnepa Tachi Ak'õre Jaorepa oopi bɨ jõma oo k'ɨ̃riat'ɨ. Maamina Tachi Ak'õre pari pedeadai atepe k'ɨ̃riat'ɨ. 2Chi tachia ũrinak'apɨ́ pedeade pedea bɨpa ẽpẽrarã́ pedea bɨwẽma, ichia jararu mi ãpia pida ũrinak'a pẽra. Aba Tachi Ak'õreapuru pedea bɨma. Tachia k'awadak'ama chi Tachi Ak'õre Jaoredepa chi tachia atua p'anɨ pedea bɨt'a. 3Maamina chi Tachi Ak'õre pari pedea bɨpa ẽpẽrarã́ pedea bɨma pia ĩjãanamẽrá, chaarea p'ananamẽrá, mãɨnepa sõpiadamẽrá. 4Chi tachia ũrinak'apɨ́ pedeade pedea bɨpa ara ichi k'aripa bɨma, pia ĩjãai k'orea. Maamina chi Tachi Ak'õre pari pedea bɨpa ũpẽarãt'u k'aripa bɨma pia ĩjãanamẽrá.
5Mɨmá jõma mãra tachia ũrinak'apɨ́ pedeade p'ue pedeautapara pia bai pasima. Maamina jõmãɨrã Tachi Ak'õre pari p'ue pedeautapara pia bai pasima. Piarã tachia ũrinak'apɨ́ pedeade pedeai k'aepẽra Tachi Ak'õre pari pedeait'u atepe pia bɨma. Maamina abaɨpa tachia ũrinak'apɨ́ pedeade pedeak'ari k'awa jaraipɨra, mãɨ sida pia bɨma. Mãɨya ũpẽarãpa arí ũrinak'ari Tachi Ak'õrene pia ĩjãanaipɨ. 6Mãɨ k'orea ũpẽarã, mɨ mãramá wãk'ari tachia ũrinak'apɨ́ pedeade pedeaipɨra, ¿mãra sãmaasã́ k'aripaima? K'aripaiwẽma. Maamina tachia ũripataɨ pedeade Tachi Ak'õrepa mɨá unupida jaraipɨra, wa Tachi Ak'õre k'ɨ̃risiadepa pedeaipɨra, wa Tachi Ak'õre pari pedeaipɨra, wa Tachi Ak'õre pedea jarateaipɨra mãɨpa ãarea p'ue k'aripaipɨ.
7Ara mãɨ jĩra abaɨpa siru wa arpa chaaipɨra maamina pia chaawẽpɨra, jĩk'ua bɨmina tachia k'awadaiwẽma k'ãre chaa bɨt'a. 8Ãnimara k'achu sida pia chaawẽpɨra, ¿papaká berã sãmaasã́ isapea ará bari k'op'aneenaima chõonai k'orea? 9Ara mãɨ jĩra mãrapa ũripataɨ pedeade pedeadaepɨra, ẽpẽrarãpa ¿sãmaasã́ k'awadaima mãrapa jara p'anɨ? Mãɨya pedeadaipɨra, pari pedeadaipɨ. 10Nãɨ ĩjũane pedea wawaria p'anɨma. Mãɨ pedeacha chi k'awa bɨpa arí ũriparima. 11Maamina mɨa mãɨ pedea atua bɨpɨra, chi pedearumá mɨ tua awaraɨdepema jĩra bɨma, mãɨnepa mɨmá ichi tua awaraɨdepema jĩra bɨma. 12Mãra ara mãɨ jĩra p'anɨma. Tachi Ak'õre Jaorepa oopi bɨ mãrapa minachia oo k'ɨ̃ria p'anɨ pẽra ũpẽarã k'aripai k'orea pia oo k'ɨ̃riat'ɨ ãchia pia Tachi Ak'õrene ĩjãanamẽrá.
13Mãɨ k'orea chi tachia ũrinak'apɨ́ pedeade pedea bɨpa Tachi Ak'õrea ɨt'aa chiidi bɨma ara ichia jarada p'ue k'awa jarai k'orea. 14Tachia ũrinak'apɨ́ pedeade mɨa Tachi Ak'õrea ɨt'aa chiidiipɨra, mɨ jaorepa ɨt'aa chiidi bɨma. Maamina mɨa atua bɨma k'ãre ɨt'aa chiidi bɨt'a. 15Mãɨyara ¿sãmaasã́ jĩp'a ooima? Mɨ jaorepa Tachi Ak'õrea ɨt'aa chiidiipɨ maamina mɨa chi k'awa bɨ pedeade pida ɨt'aa chiidiipɨ. Mɨ jaorepa Tachi Ak'õrea pia k'ariipɨ, maamina chi mɨa k'awa bɨ pedeade pida k'ariipɨ. 16Pɨ jaorepa Tachi Ak'õrea pia pedeaipɨra chi pɨa jarada k'awa ũrik'apɨɨpa ¿sãmaasã́ mãɨ piarãane aima, pɨa sõpia bɨade ada k'orea?#14:16 Mãɨ piarãane aima. Griego pedeade nãɨya bɨ bɨma: amén. Mãɨ pedea hebreo pedeapɨ. K'ɨ̃risia ume jara bɨma. Edaɨde jara bɨma «pia bɨma mãɨya bai» mãɨnepa edaɨde jara bɨma «piarã». 17Piarã pɨa mãɨya pedearude Tachi Ak'õrea sõpia bɨade a bɨma, maamina waapẽarã k'aripawẽa bɨma pia ĩjãanamẽrá. 18Mɨa Tachi Ak'õrea sõpia bɨade aparima mɨ mãra k'aepẽra tachia ũrinak'apɨ́ pedeade atepe pedeapari pẽra. 19Maamina ũpẽarã ará jere nɨbɨde mɨmá tachia ũrinak'apɨ́ pedeade pedea k'ak'o diez mil pedeai k'aepẽra pia bɨma tachia ũripataɨ pedeade pedea k'ak'o joesoma pedeait'a.
20Ũpẽarã, warra chak'erã jĩra p'anat'ɨ. Ãchia nemietá k'orea minachia atua p'anɨma. Maamina Tachi Ak'õre Jaorepa oopi bɨ k'orea chõarã jĩra k'ɨ̃risia p'anat'ɨ. Waa warra chak'erã jĩra k'ɨ̃risiarãt'ɨ. 21Tachi Ak'õre pedeade#14:21 Tachi Ak'õre pedeade. Griego pedeade bɨ bɨma: la ley. nãɨya bɨ bɨma:
«Tachi Chiparipa jara bɨma: mɨ nãɨ p'uurudepemarã ome pedeaipɨ, tua awaraɨdepemarã it'aedepa, chi ãchia ũrinak'apɨ́ pedea pedeapataɨrãnepa. Maamina mɨ pedea ũriemaa p'ananaipɨ».#14:21 Tachi Ak'õrepa israel ĩjũanepemarã́ jarasima ãchia ĩjãanawẽa p'anɨ k'orea tua awaraɨdepemarãpa ãchi ãyá ateewãnaipɨ. Isaía 28:11-12.
22Mãɨya k'awa p'anɨma chi tachia ũrinak'apɨ́ pedeade pedeait'a chi Jesude ĩjãanak'apɨɨrã paepuru bɨpɨ, mãɨpari chi Jesude ĩjãapataɨrã pae bɨwẽma. Mãɨnepa chi Tachi Ak'õre pari pedeait'a chi Jesude ĩjãapataɨrã pae bɨma, mãɨpari chi Jesude ĩjãanak'apɨɨrã pae bɨwẽma.#14:22 Waapẽarãpa k'ɨ̃risia p'anɨma nãɨ versiculode nãɨya jara bɨma: «Mãɨpa k'awa p'anɨma chi tachia ũrinak'apɨ́ pedeade pedeait'a Jesude ĩjãapataɨrã k'orea bɨwẽma, mãɨpari chi Jesude ĩjãanak'apɨɨrã́ unupi bɨma Tachi Ak'õrepa ɨtɨait'a». 23Mãɨ k'orea ũpẽarã ará jere nɨbeeutade jõmãɨrã tachia ũrinak'apɨ́ pedeade pedeamaa p'anɨpɨra, mãɨne waapẽarã Jesude ĩjãanak'apɨɨrã wa Tachi Ak'õre pedea ũri k'ɨ̃ria berã eda wãsidara ¿ãchia mãra k'ĩra piawẽa p'anɨane a jaradaiwẽk'ãra? 24Maamina jõmãɨrã Tachi Ak'õre pari pedeadaipɨra, mãɨne Jesude ĩjãawẽa bɨ wa Tachi Ak'õre pedea ũri k'ɨ̃ria bɨ eda wãsira mãrapa jara p'anɨ ũri bɨdepa ichi nemietá ooparí k'awaipɨ mãɨnepa Tachi Ak'õre k'ĩrari nepɨra pará bɨ k'awaipɨ. 25Ichi sõne mẽra uru bada pia k'awaipɨ. Mãɨne sĩraporode k'obeek'ari Tachi Ak'õrea pia pedeaipɨ mãɨnepa «Tachi Ak'õre piarã mãra ome bɨade» aipɨ.
Ará jere nɨbeeutade jõma arí oot'ɨ
26Mãɨ k'orea ũpẽarã, ¿sãmaasã́ arí oodaima? Mãra ará jere nɨbeeutade abaɨpa Tachi Ak'õre pedeadepema k'aripataɨ k'arii bɨma, abaɨpa Tachi Ak'õre pedea jarateai bɨma, abaɨpa Tachi Ak'õrepa unupida jarai bɨma, abaɨpa tachia ũrinak'apɨ́ pedeade pedeai bɨma, mãɨnepa abaɨpa mãɨ pedeada k'awa jarai bɨma. Maamina jõma mãɨ oodai p'anɨma ũpẽarãpa pia ĩjãanamẽrá. 27Tachia ũrinak'apɨ́ pedeade pedeadaipɨra, ume wa ũpea mãɨya pedeadai p'anɨma. Maamina abaabá pedeadai p'anɨma. Pedeak'ari abaɨpa mãɨ k'awa jarai bɨma. 28Maamina ũpẽarã ará jere nɨbeeutade mãɨ pedeada k'awa jaraparí neepɨra, tachia ũrinak'apɨ́ pedeade pedea k'ɨ̃ria bɨ k'ĩup'ea bai bɨma. Ichi k'ɨ̃risiade Tachi Ak'õrea k'ĩup'ea pedeai bɨma.
29Ara mãɨ jĩra Tachi Ak'õre pari pedeapataɨ ume wa ũpea pedeadai p'anɨma. Mãɨne jõmãɨrãpa ãchia pedea p'anɨ jĩrak'aua ũrinai p'anɨma piarã k'awadai k'orea. 30Ũpẽa aba pedeamaa bɨde Tachi Ak'õrepa chi ũri p'anɨnepema abaɨa#14:30 Chi ũri p'anɨnepema abaɨa. Griego pedeade nãɨya bɨ bɨma: chi suak'abari bɨa. ne unupisira, chi pedea bɨpa mãɨ ũpẽa itu pedeapii bɨma. 31Jõmãɨrã abaabá Tachi Ak'õre pari pedeadai p'anɨma pia k'awadamẽrá mãɨnepa pia ĩjãanamẽrá. 32Tachi Ak'õre pari pedeaparí paritua pedeak'ama, mãɨpari nɨ nɨbeeparima pedeai k'orea. 33Tachi Ak'õrepa ooroa nɨbeepik'ama, mãɨpari ne k'ɨ̃risiawẽa bapiparima.
Ẽpẽrarã Tachi Ak'õreneerã ará jere nɨbeeutacha 34wẽrarã pedeadaiwẽa p'anɨma, mãɨpari k'ĩup'ea ũrinai p'anɨma. Ãchi k'ima pedea ũri p'ananai p'anɨma Moisepa bɨdade jara bɨ jĩra. 35Wẽrarãpa ne idi k'ɨ̃rianaipɨra, tiida p'anɨne ãchi k'imá ididai p'anɨma. Ũpẽarã ará jere nɨbeeutade wẽra pedeai pia bɨwẽma.
36¿Tachi Ak'õre pedea mãranepa chesik'ãra? ¿Aba mãraapuru chesik'ãra? 37Abaɨpa Tachi Ak'õre pari pedeaparí k'ɨ̃risia bɨpɨra, wa Tachi Ak'õre Jaoredepa ne oo bɨ k'ɨ̃risia bɨpɨra, mãɨ ẽpẽrapa k'awai bɨma mɨa nãɨ k'art'ade bɨrude Tachi Chiparipa oopi bɨt'a. 38Abaɨpa mãɨ itu bɨipɨra, ichi sida itu bɨt'ɨ.
39Mãɨya ũpẽarã, pia jɨrɨt'ɨ Tachi Ak'õre pari pedeadait'a. Mãɨnepa tachia ũrinak'apɨ́ pedeade pedeapataɨrã pedeapit'ɨ. 40Maamina ãarea jĩrak'aua arí oot'ɨ.
Currently Selected:
1 Corintio 14: tdc
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
