Romans 9
9
Kiyaghneghem Nakmikegkii Yuget
1Apeghyukaqa elpesinun ipanguuq. Iqlengiqngunghitunga qayughllak Christ‑am pikaanga, Agleghnalghiim Taghneghamllu igleghutngwaak umyugagka. 2Ungipaasugamsi whaten: qivghughllaguunga qayughllak qaamggurugllak ilumkun naangigalngughmeng aqnighqutkeghllagwaanka 3yulgutenka, Jews‑et. Piyaqleguyaqan, ellngit apalluqluki Kiyaghneghemtuq nanqigtekanganga aghyuughnalunga, iqitestekangangallu Christ‑ameng. 4Yulgutenka Israel‑em kingunqii, Kiyaghneghem allughqikaqii ellminun avaqutaaluki. Aliightekaqaa nighughqelleni ellngitnun. Akequuqaqii salleghqamineng ellngitnun. Tuunegkaqii Liilightuusamineng. Apeghtuqaqii ellminun maniguutelleghqameng elqughulluki. Akequuqaqiillu quyasleqniluki qaatkegkangatni. 5Kingunqiit sivuneqsuwhaamta, taakutgun kinguneghteggun Christ‑a allgeqaaguq yuguluni. Ellnga Kiyaghneghuuq igleghutilghii sameng tamaghhaaneng. Usuqellengi quunperugllak kenlengunaan! Amen.
6Kiyaghneghaam akequsani pimangitaguu Israel‑eghmiinun? Nakaa! Akequsani pikaqaa ellngitnun, iwernga ilanginaghhii kingunghi Israel‑em Israel‑eghmiipiguut. 7Ilanginaghhiillu Abraham‑em kingunghi ellngan avaqutapiikii. Kiyaghneghem pikaqaa Abraham whaten, “Kingunghet elpenun akequsanka Isaac‑ekun ayuqsaghqaagut.” 8Taana whaten pisiiguq, ilangi avaqutat allgeqat Abraham‑emun avaqutaqenghitii Kiyaghneghem. Iwernga allgeqaghhiinaat Kiyaghneghem akequsaakun Abraham‑emun kingunepiikii Abraham‑em. 9Kiyaghneghem akequsaa Abraham‑emun whatetuq, “Ayumiqun uteghniquma whaten lliiqan Sarah ighnengellequq.”
10Taana Sarah‑m ighnegha Isaac‑nguuq, sivuneghput. Nulightughluni Rebecca‑meng, atakaak malghik ighneghegkenka Rebecca‑m. 11-12Talwa salin allgellghillukek, salinllu pingigallukek pinilghiimeng nalighmeng seghleghmeng, Kiyaghneghem pikaqaa Rebecca, “Nuyekliim qepghaalleqaa uyuqliq.” Ataneq tawaten pikaaguq liigikesqelluku ellnginaghmi nakmiightenguniluni salleghqamineng. Kiyaghneghem nakmikegkaqaa taana ighneq qayughllak ellnganguuq Kiyaghneghem tuqlughyukaa. Nakmikegkaqenghitaa qayughllak taam ighneghem sangwaa pikaqutanganeng. 13Akuzitni Igaqegkani igaqegkaalghii, “Piniqegkaqaqa Jacob, naqam ugumikegkaqaqa Esau.”
14Samengꞌngam pinaqesteggu taana? Kiyaghneq anaggutaa? Yeghlegillu! 15Qayughllak Moses whaten pikaqaa,
“Nangllegtaghllequnga kitumun alngunak nanglleqsaghqamnun;
nafughtaghllequnga kitumun alngunak nafuqsaghqamnun.”
16Enkaangam yuget allgeghtepagningitaat Kiyaghneghem nangllegtallgha piyukluku nalighmeng salleghmegteggun. Kiyaghneghhiinaaguq nakmiighyaghqaq nanglleksaghqaminun. 17Akuzitni Igakegkani igaqngaaq Kiyaghneghem pikaqaa Pharaoh whaten, “Umiilgughtestekaqamken kelgunnaluku aghtughyaghqaanghilqa elpegun. Enkaam yuget nunataghhaani tamaghhaani ungipaqelleqaat aatqa.” 18Enkaam Kiyaghneghem nangllegyagutkayugaa kina alngunak piyukegkani, pineghlluugtestaqaallu kina alngunak piyukegkani.
Kiyaghneghem Ugumiyullghallu Nangllegtallghallu
19Enkaam aapleqaghpenga whaten, “Kiyaghneq tawatetngukan, sanganꞌngam nanqiglleqaki kinkut alngunak aghyuughyaghqaaluki? Kitum alngunak aygiinaghyaghqaqenghitaa Kiyaghneghem piyukellgha.” 20Iwernga kinanguzin, yugmi, veghusnaasken Kiyaghneq? Qikumeng ulimaaghem sagneghem aapsigataa ulimasteni whaten, “Sangama whatellunga ulimazinga?” 21Yugem qikumeng sagnengllaghtem piyukelleghmitun atuqsaghqaqaa qiku. Ulimayukumikek maalghuk ataasimeng qikumeng piyaghqaqaak, aallgha megnunalghiimun atuuluku, ilanga samun alngunak atuuluku.
22Kiyaghneghem kelgusukaqaa ugumiyulleghllani, liisimakesugaallu aghtughyaghqaanghilleni. Iwernga nuqetunneghpakaqii nanqigtekani naafqennaluki. 23Tawaten pikaaguq liisimakesqelluku nighughqelleghllani nangllekegkaminun. Yataaghqekestaqaqii ellngitnun allgeghtesqelluku nighughqelleni. 24Talwa whangkutallu tuqluqaqiinkut, nakaan Jew‑nginaghneng iwernga Gentile‑enengllu. 25Hosea‑m uuknaliqellghani Kiyaghneq pikaaguq whaten Gentile‑eneng,
“Tamaakut yukenghilkenka, atighlleqanka, ‘Yugenka’.
Tamaakut yuget piniqenghilkenka, atighlleqanka, ‘Piniqegkanka’.
26Tawani Kiyaghneghem ungipaatfigitni, ‘Yukenghitamsi’,
tawanillu atighlleqiit,
‘Avaqutii unguvalghiim Kiyaghneghem.’”
27Isaiah‑m akilghuutkegkaqaa Israel whaten,
“Qaywa Israel‑eghmiit esnem qenaavzeghaatun uglaghtatkalighngaata,
tawalliima qafsinkuuraghhaat yugulillengyaghqaagut,
28qayughllak Atanghem kimaawillngunani nanqigtengngwaaghlleqii nunam yugi.”
29Sivunghani Isaiah‑m pinaqnillghatun ayuquq,
“Atanghem aghtughyaghqaghhaanghilnguum siipusimangisaqanginkut kinguneghmeng,
qamagtengngwaaghluta naafqellengnayaghtukut Sodom‑enkuk Gomorrah‑nkuk neghllagegketun.”
Israel‑eghmiit Ugpenghitellghat
30Samengꞌngam pilleqesta? Gentile‑et, ellmeggneng nallghusaghnaqutkumangitut Kiyaghneghmun, iwernga Kiyaghneghem nallghusaqaqii elqughutngalleghminun apalluqluku ugpeqillghat. 31Israel‑eghmiit malighqutaqnaqutkegkaagut Liilightuusanun elqughutnganaluteng Kiyaghneghmun, iwernga pilaataqumangitut. 32Sangameng pilaataqunghitat? Qayughllak nallghusaghnaqutkelghiit ellmeggneng Kiyaghneghmun salleghmegteggun, neghyukegpenaan Kiyaghneghmun nallghusiisqelluteng elqughutngallghanun. Enkaam naagtaqut “naagtusikun uyghagkun.” 33Igaqegkaalghii Akuzitni Igaqegkani whaten:
“Ii‑i, Zion‑mi nekegtaqa uyghak yuget naagtesqelluki,
taam uyghagem iqusleqii.
Iwernga kina alngunak ugpequmi ellngakun kaynguyugnaanghituq.”
Currently Selected:
Romans 9: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
