Romans 10
10
1Ugpeqaalgutemni, qamagun ilumkun piyukepigtaqanka whanga katam yugenka Jews‑et yugulillengesqelluki! Elngaatall Kiyaghneghmun yughaatkaqanka! 2Whaten piighhnaqanka yugenka: Qepghaasupigtaqaat Kiyaghneq iwernga liigikigataat naten Kiyaghneq qepghaatesugaqutni ellngitnun. 3Liigikellghitaat naten Kiyaghneghem nallghusaghaqutangi yuget elqughutngalleghminun. Enkaam elqughutngangllaghnaqutkaqut qaatkelluki Liilightuusii. Tawaten pilleghmegteggun tugukliigataat Kiyaghneghem elqughutngallgha. 4Christ‑a kenlekaat Liilightuusat. Enkaam tamaghhaghmi ugpeqillelek Kiyaghneghem nallghusaghlleqaa elqughutngalleghminun.
Yugulilleq Tamaghhaanun Pinguuq
5Moses igaqaaguq Kiyaghneghmeng nallghusaghilghiimeng yugneng elqughutngalleghminun qaatkutellghitgun Liilightuusanun. Whaten igaqegkaqaa, “Yugem qaatkumakaki Liilightuusat, taakutgun kiyaghllequq.” 6Iwernga nallghusaqaq Kiyaghneghem elqughutngallghanun ugpeqilleghqun, qelqaaguq, “Aaptegpenang, ‘Kina mayughlleqa qilagmun?’” (ukiggnaluku Christ‑a nunamun). 7Nalighmeng aaptegpenang, “Kina ukiglleqa Abyss‑mun?” (mayuunnaluku Christ‑a tuqumeng.) 8Akuzitni Igaqegkani whaten igaqngaaq, “Kiyaghneghem ungipaa qantaghantuq elpenun. Akuzitkelleqan qaneghpegun, ugpeqelleqanllu ilugpegun.” (Kiyaghneghem ungipaa ugpeqilleghmeng ayuqelghii, taananguuq ungipaqegkefut.) 9Aapquvgu qaneghpeneng, “Jesus Atanghuniluku,” ilugpenengllu ugpeqegkuvgu Kiyaghneghmun unguvaghtesimaniluku tuqulleghmeng, yugulillengellequten. 10Yuuk ugpeghtuq ilumikun, enkaam Kiyaghneghem nallghusaghaa elqughutngalleghminun. Aapghaallu qaneghmikun ugpeqegkani, enkaam yugulillenguq. 11Akuzitni Igaqegkani igaqngaaq, “Kitum alngunak ugpeqegkumigu ellnga kaynguyugnaanghituq.” 12Allangughutngitut Jews‑etlu Greek‑etlu qayughllak ataasiiguq Ataneq, Atanqaa tamaghhaan. Quyasteghllagaqaa tamaghhaan tuqlughilghii ellmineng. 13Katam Akuzitni Igaqegkani igaqngalghii, “Tamaghaghmi tuqlughilghii aatghakun Atanghem yugulillengyaghqaaguq.”
14Iwernga naten yuget tuqlughlleqatgu ugpenghilkumeng? Naten ugpeghlleqat, nagaquunneghilkumeng? Natenllu nagaqughlleqat ungipaqistengunateng? 15Naten yuget ungipaqilleqat ellnganeng wetku kayagtellengegkuyeng? Katam Akuzitni Igaqegkani igaqngalghii, “Pinighnaghhaghmeng itegiit tamaakut ungipaqilghiit Pinilghiineng Ungipaneng!”
16Iwernga ilanginiita qaatkegkaqiit Pinilghiit Ungipat. Isaiah aaptekaaguq, “Ataneq, kitum ugpeqegkaqagu ungipaghput?” 17Kina alngunak ugpeqillelgunaanghituq nagategpenani ungipameng Christ‑ameng ayuqelghiimeng.
18Iwernga piiqsingaa Israel‑eghmiit nagaquunneghinniluki ungipameng? Aa‑a, nagaqupestaaqaagut. Akuzitni Igaqegkani igaqngalghii,
“Mengit aghulaqumaat tamaghhaanun nunam;
akuzitangitlu kenlengitnun nunam.”
19Alla aapqughaallelguunga: Israel‑eghmiit liigikenghitatkii‑i Israel‑eghmiingunghilnguut ellngitlu Kiyaghneghem yukatkii? Aa‑a, liigikumiit. Sivukluku Kiyaghneghem Moses whaten pistaa: “Elpesinun aqinakesnaqanka Israel‑eghmiingunghilnguut. Israel‑eghmiingunghilngughteggun liigikigalngughteggun ugumiyugtesnaqamsi.” 20Taagken Isaiah tetugpenani aapghikaaguq whaten Kiyaghneghem pillghaneng,
“Tamaakut ivaghimangilnguut whangamneng, naalkegkaqaatnga.
Tamaakunun aaptinghilngughnun whangamneng, liitestekaagunga.”
21Iwernga Israel‑meng Kiyaghneq whatenllu pikaaguq,
“Aghnelqusighllak nengugutanka iiggenka qaatkusigalngughnunllu,
kipullginaalghiinunllu whangamneng.”
Currently Selected:
Romans 10: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
