Romans 16

Paul‑enkut Suumqegkangit Ugpeqaalguteteng

1Ungipaasugamsi ugpeqaalgutemnneng, Phoebe‑meng. Pinilghiinguuq deaconess‑a ugpeqanun qerngughutkayugnun yughaghvigani Cenchrea‑m. 2Upughannakesi Kiyaghneghem yugita piiqellghistun qayughllak Atanghem pikaa. Kayutkesunghisi kayusighaqluku qayughllak kayuteghllaguuq uglalghiinun yugnun, whangamnunllu talwa.

3Ungipaataghhnakegsi Priscilla‑nkuk Aquila‑nkuk suumqaqagkanguq. Qepghalgutkagka Christ Jesus‑mun. 4Talwa tuqutelleghqaghtek pitkegpenaan paqniighsaghqaqaagnenga. Tamaaken apalluqluku iqamsiqayugllaguunga elkegkeneng. Qamagllutengllu ugpeqat Gentile‑et yughaghvigitnilnguut iqamsiqayuguut. 5Ungipaataghhnakesi ugpeqat qerngughutkayuget mangteghagkeni suumqaqankanguq.

Ungipaataghhnakesi piniqegkaqa Epaenetus suumqaqaqanguq. Asia‑mi ellnga ugpeghyuggaaqaaguq Christ‑akun. 6Ungipaataghhnakesi Mary suumqaqaqanguq; qevuulluni qepghaatkaqiisi. 7Ungipaataghhnakegsi Andronicus‑enkuk Junias‑enkuk Jew‑lgutegka, anusimingllaghalgutkegkaqagkallu, suumqaqagkanguq. Apostle‑nguuk yuget liisimakngwaaqegket; sivumni ugpeqaaghtekaaguk.

8Ungipaataghhnakesi Ampliatus, piniqegkaqa Ataneghqun, suumqaqaqanguq. 9Unipaataghhnakesi Urbanus, qepghalgutfut Christ‑amun, piniqegkaqallu Stachys, suumqaqagkanguq. 10Ungipaataghhnakesi Apelles suumqaqaqanguq. Nanghiighsaghallengaqngami ipapighqegkaqaa ataasighmitelleni Christ‑amun. Ungipaataghhnakesi nengllugutangi Aristobulus‑em suumqaqankanguq. 11Ungipaataghhnakesi Herodion, Jew‑elgutka, suumqaqaqanguq. Ungipaataghhnakesillu ugpeqat nengllugutanganilnguut Narcissus‑em suumqaqankanguq.

12Ungipaataghhnakegsi Tryphaena‑nkuk Tryphosa‑nkuk suumqaqagkanguq. Taakuk aghnak qepghaghtenguuk Ataneghmun. Ungipaataghhnakesillu piniqegkaqa Persis, suumqaqaqanguq; qevulluni qepghaqaaguq Ataneghmun. 13Ungipaataghhnakegsi Rufus‑enkuk naakullghiik, suumqaqagkanguq. Rufus Atanghem nakmikegkaqaa, naanganllu ighneqelghiistun piiqaanga. 14Ungipaataghhnakesi Asyncritus‑enkut, Phlegon‑enkut, Hermes‑enkut, Patrobas‑enkut, Hermas‑enkut, qamagllukillu ugpeqaalgutet ellngitnilnguut, suumqaqankanguq. 15Ungipaataghhnakegsi Philologus‑enkuk, Julia‑nkuk, Nereus‑enkuk nayakullghiik, Olympas‑llu qamagllukillu Kiyaghneghem yugi ellngitnilnguut, suumqaqankanguq.

16Quyakutaqitek naaghutmeng Kiyaghneghem piniqellghakun. Qamaglluteng ugpeqat Christ‑am yughaghviganilnguut, liisimakesugiisi suumqaqiisinguq.

Paul‑em Kinguliit Apeghtuusii

17Ugpeqaalgutemni, qelghamsi kelengasqellusi tamaakuneng aafquutestikayugneng, tunutestilghiineng yuget ugpeqillghitneng, kipullginaalghiineng apeghtuusaneng liitkaghpesineng. Iqitngatek tamaakuneng. 18Yuget tawaten pikayuget qepghaatngunghitaat Christ‑a Ataneghput. Taawanginaghhaq ellmeng katam efquqegkaghhiinateng piiqiit. Apeghtughineghmeggni akuziteghlluwhaat atuqaqiit, usuquughtaqiitlu yuget puughhnaluki puughsugumalghiit.

19Qamaglluteng yuget nagaquumaat qaatkutngalleghsi Ataneghmun, enkaam tamaaken apalluqluku quyakeghllawaamsi. Peghqinghusugamsi samun pinilghiimun, iwernga anaggutellngunasi seghleghmun.

20Kiyaghneghem nekeggmellelitilghiim qantaghaqun kagimlleqaa Tughneghaq itegaghpesi asingani.

Ataneghput Jesus Christ‑a nangllegtaghli elpesinun.

21Qepghalgutma Timothy‑m, Jew‑lgutmallu Lucius‑enkut, Jason‑enkut, Sosipater‑enkut suumqaqiisinguq.

22Tertius‑nguunga, igaataqaqa Paul latanganeng. Whangallu suumqaqamsi Ataneghqun.

23-24Whanga Paul, Gaius‑metaqunga. Mangteghaani qamaglluteng ugpeqat qerngughutkayuguut. Ellnganllu ugpeqatlu suumqaqiisinguq.

Neghllamta manimeng aflengakistengan, Erastus‑em, ugpeqaalgutemtallu Quartus‑em suumqaqiisinguq.

Usuqilleq Yughalleghqun

25Usuqelteggu Kiyaghneq! Ellngan ayepsugighsaghyaqlegwii ugpeqillesi Pinilghiitgun Ungipatgun Jesus Christ‑ameng ayuqelghiimeng ungipaqumanginaghaqegkemkun yugnun. Taananguuq aksaqegkaq ungipaq Kiyaghneghem qayvighsimangitkaa ima piinlighyuggaallghaneng nunam. 26Iwernga maaten, piinleghilnguum Kiyaghneghem qayvighsimii Pinilghiit Ungipat igaqullghitgun uuknaliqistet. Qelghusimii Pinilghiit Ungipat liitesqelluki yugnun nunataghhaani tamaghhaani. Tawaten pikaaguq ellngitnun ugpeqesqellunillu qaatkesqellunillu.

27Ellnginaaguq Kiyaghneq, peghqinelghii samun tamaghhaanun. Yuget usuqlitgu quunperugllak Jesus Christ‑akun! Amen.

Currently Selected:

Romans 16: ess

Highlight

Copy