Romans 12
12
Unguvalghiit Aghqutet
1Ugpeqaalgutemni, Kiyaghneq nangllegtapigtutanganeng, elngaatall kayemamsi tuunesqelluki yugusisi Kiyaghneghmun unguvalghiinguluki aghqutet. Pelungillit, tuguklighyugnaghlitlu Kiyaghneghmun. Taananguuq maniguutellepigsi. 2Uum nunam yugatun kiyaghtegpenasi. Yeghlegi Kiyaghneghmun allangughtestek nutaghtesluki umyugasi. Taagken liigikelleqaghsi piyukellgha Kiyaghneghem pinilghii, tuguklighyugnalghii, qamagtiingwaaghngalghiillu.
3Kiyaghneghem tuunegkaqutanganeng tunusameng apostle‑ngulunga, tamaghhaghpesinun piinga: Sumeghtaghaatkegpenasi elpesineng pinighataghaghnilusi ayuqelleghpesineng. Yeghlegi ipapighqellusi sumeghtaghaatkaqitek ugpeqilleghtulegpesigun Kiyaghneghem tuunegkaakun elpesinun. 4Yugusiput nalighneghtupigtut, tamaghaghmi nalighneq allatun sayaghqaaguq. 5Uglaghyaghngaamta, ataasigukut Christ‑am yugusiini. Enkaam whangkuta nalighneghni whangkunneng pikutukut. 6Qamaglluta allakullghiineng tunusalguukut Kiyaghneghem tuunegkaaneng nangllegtalleghmikun. Tunusaghput ungipaqingukan Kiyaghneghem ungipaaneng, ungipaqilta ugpeqilleghtutalemtestun. 7Tunusaghput qepghaatingukan, qepghaatilta, apeghtughingukan, apeghtughilta; 8kayemingukan ilameng, kayemilta; tuuningukan, ighlegpenaamta tuunilta; igleghutingukan, sagiqluta igleghutilta; nangllekingukan, quyakusiqluku nangllekilta.
9Piniqitek ipapighqellusi. Ugumikluku seghleq, piyukumanginaghteggu sangwaa pinilghii. 10Piniqututek anglegutkullghiistun. Quulvaatutaqitek pakiggulluku quulviisqesulleghpesineng. 11Taakunginaghhaagneng qepghaghtek, ighsanifqaafsi. Sagiqulluku qepghaataqiteggu Ataneq qamaken ilugpesineng. 12Quyangatek qayughllak sighimallelguusi, nuqetaqitek nekeggmellusi seghleliineghpesini, yughaghaqiteklu iiwleng. 13Ugpeqaalgutegpesinun aklulghiinun tuuniiqitek, upughatiiqitek kinkuneng alngunak.
14Yughaatkaqiteki amyuqetaatkistesi Kiyaghneghmun quyastesqelluki, nakaan aqnightesqelluki. 15Quyalgusighaqiteki tamaakut quyalghiit, qiyalgusighaqiteki tamaakut qiyalghiit. 16Kiyaghtek nekeggmetullusi. Qukaayugtegpenasi yeghlegi ilakiteki ukavantalghiit. Sumeghtaghaatkegpenasi peghqinghunilusi ilagpesineng.
17Kitum seghletun pikangisi, akitegpenaki seghletun. Piiqiteki pinilghiit tuguklighyugnalghiit tamaghhaanun. 18Piyaghqaakan, piiqiteggu sangwaa piyaghqaghsi kiyaghtesqellusi nekeggmellusi tamaghhaanun. 19Piniqegkamni, akiniighnaqegpenaki seghletun pistesi, itupill pegteki Kiyaghneghem sakraallghanun. Akuzitni Igaqegkani igaqngalghii whaten,
“Whanganguuq aghyuughiyaghqaq,
whanganguuq akiniighyaghqaq, piiq Ataneq.”
20Igaqngaaqlu Akuzitni Igaqegkani,
“Anguyagen iyataangukan neghesnaken,
meqsugukan meghsinaken.
Tawaten pikuvgu naasqwakun mayughfikelleqan kumangalghiimeng coal‑meng.”
21Kayaalqestegpenasi seghleghmun, itupill kayaalqiteggu seghleq pinitun pilleghqun.
Currently Selected:
Romans 12: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
