Romans 11
11
Kiyaghneghem Nangllegyaguskangi Israel‑eghmiit
1Enkaam aaptamsi, Kiyaghneghaam Israel‑eghmiit yuksugnanightakii? Yeghlegillu! Whanga katam Israel‑eghmiinguunga, Abraham‑em kingungha, Benjamin‑em ramkenganeng pinguunga. 2Kiyaghneghem yuksugnanillghitii yuni qayughllak nakmikegkaqii salin nunangllallghilluni. Liisimakenghistegguu Akuzitni Igaqegkani Elijah‑m qikeghqutkegkaqegkangi Kiyaghneghmun Israel‑eghmiit? Whaten pikaalghii, 3“Ataneq, tuququqaqiit uuknaliqisteten, ulleghquqaqiit aghqefigten; whanganginaghhaagunga siipneq, tuqunnaqutkaqaatngallu.” 4Iwernga Kiyaghneghem pikaqaa,
“Paninang 7,000‑meng yulguunga maniguusigalnguut kiyaghnengllaqamun Baal‑mun.”
5Maatenllu tawatetut. Siipnelguuq Kiyaghneghem nakmikegkaaneng nangllegtalleghmikun. 6Kiyaghneq nakmiighumakumi nangllegyulleghmikun, taawa nakmikellghitii pinitun pillghitgun. Tawaten nakmikumakumiki, taawa nakmikellghitii nangllegyulleghmikun.
7Whaten piiqunga: Israel‑eghmiit naalkellghitaat ivaqaghteng, Kiyaghneghem nakmikegkaghhiiniita naalkegkaqaat. Ilangi tamaakut Kiyaghneghem pineghlluugtestekaqii. 8Katam Akuzitni Igaqegkani igaqegkaalghii,
“Kiyaghneghem umyugiit liigiksaghqaananighqegkaqii.
Whavemun kenlanga aghneghmun iiyngit esghaghyaghqaananighqegkaqii,
sigutngitlu nagaquusaghqaananighqegkaqii.”
9David‑llu pikaaguq,
“Neqenghaghqellghit negaghaaghllit,
naaptellghughllit, naagtusiighllit, aghyuughisiighllit ellngitnun.
10Iiyngit ayaallenglit esghaghnaniisqelluki,
qukiitlu pakegnenglit uqigitneng seghleliillghita quunperugllak.”
11Enkaam aaptamsi, Israel‑eghmiit naagtaqngameng, alla nekevepagningitaqaat? Yeghlegillu! Iwernga Israel‑eghmiit seghleghqellghit apalluqluki, Gentile‑et yugulillengut. Enkaam yugulillengellghita Israel‑eghmiit aqinastiit. 12Kiyaghneghem atuqegkaqii seghleghqellghit Israel‑eghmiit taginnaluku quyastelleghllak nunam yuganun. Israel‑eghmiit ifliillghita tagitaat quyastelleghllak Gentile‑enun. Taagken qamaglluteng nakmikegkat Israel‑eghmiit, ilaskumeng yugulikanun, quyastellghet natenmi uglaghtatkalleqat!
Yugulillghat Gentile‑et
13Maaten aleghqughyugamsi elpesi Gentile‑eni. Kiyaghneghem nakmikegkaqaanga apostle‑ngulunga Gentile‑enun. Enkaam piraamsipigllunga piiqaqa una megnunalghii qepghaqaq Kiyaghneghem qelghutkaa whangamnun. 14Apeghtughillemkun elpesinun aqinasnaluki piinka Jews‑elgutenka, ilangi yugulillengesqelluki. 15Kiyaghneghem ighsakaqngaki Jews‑et, nunam yugi Jew‑ngunghilnguut ilaliightestekaqii ellminun. Enkaam Jews‑et tuguklinqigtekumiki, unguvaghlleghhiistun tuqukat ayuqsaghqaagut.
16Neqekrangllam ikelleqsuwhaagha tuunegkaq Kiyaghneghmun, agleghnaangukan, taawa iingunaghmi neqekrangllak agleghnaghtuq. Akghwi uqfigem agleghnaqata, avayiillu agleghnaghtut.
17Jews‑et piitesighaqastun olive‑em uqfigatun ayuqut ilangi avayaan ayemtekat. Elpesi Gentile‑eni avayastun ayuqusi ayemtekat piitesighallghilngughmeng olive‑em uqfiganeng. Taameng uqfigmeng, kitum tuguluku avayaq nekegtekumigu piitesighaqamun olive‑em uqfiganun, allgeghusaghqaaguq akum mesaaneng piinnapiglleghhiimeng. 18Sumeghtaghaghpenasi pinighataghaghnilusi avayaneng ayemtekaneng. Qukaayugtegpenasi, qayughllak avayaraaghinaagusi. Akut iknaqughtesigatasi, akuugut iknaqughsaghilghiit elpesineng.
19Iwernga pillequsi, “Aa‑a, avayat ayemtekaagut nekeggnaluta uqfigmun.” 20Taana ipanguuq. Kiyaghneghem ayemtaqii avayat qayughllak ugpeqenghilkangat ellnga. Iwernga elpesi nekegtestekaqiisi uqfigmun qayughllak ugpeqegkesi ellnga. Enkaam qukaayugtegpenasi, yeghlegi alingitek. 21Jews‑et avayaghpigaagut. Kiyaghneghem ayemtekaqutanganeng avayaghpigaat, taawa elpesillu ayemlleqiisi uqfigmeng nagneghunneghilkufsigu ugpelleghsi. 22Enkaam liigikaghsi Kiyaghneq nangllegtaghtuq, aghyuutapigtuqlu. Aghyuughaqii seghleghqegkat, iwernga nangllekaqiisi neghyukumanginaneghpesigu nangllegtallgha. Iwernga neghyuknaniimakufsigu elpesillu kepulleqiisi. 23Jews‑et ugpeqenqigtekumegteggu Kiyaghneq, nekeggneqiglleqii uqfigmun. Kiyaghneq aghtughyaghqaanghillelguuq nekeggneqigsaghqaaluki neksaqangitgun. 24Elpesi Gentile‑eni avayapikenghitiisi piitesighaqam olive‑em uqfigan. Kiyaghneghem kepegkaqiisi piitesighallghilngughmeng olive‑em uqfiganeng. Taagken nekegtekaqiisi piitesighaqamun olive‑em uqfiganun, qaywa yuget nekegtingigasaghngaata uqfigmun tawatelngughmeng avayameng. Jews‑et piitesighaqameng olive‑em uqfiganeng pingutmeggneng, Kiyaghneghmi piyaqniitut nekeggneqigsaghqaaluki ellngita katam uqfigitnun.
Kiyaghneq Nangllegtaghtuq Tamanganun
25Ugpeqaalgutemni, liigikesugamsi sameng qayvighsimangilngughmeng sivunghani. Apeluugusiqa elpesinun unanguuq: peghqinghuyugneghufqaafsi pisqellusi sumeghtaghalleghpesigun. Ilangita Israel‑eghmiit ugpeqsugumangitaat Kiyaghneq. Tawatellequt kenlanga Kiyaghneghem nakmikegkii Gentile‑et qamaglluteng tagilaghaatellghitnun ellminun. 26Taagken qamaglluteng Israel‑eghmiit yugulillengellequt. Akuzitni Igaqegkani igaqngalghii,
“Yugulighista tagillequq Zion‑meng; iqilleqii qamaglluki seghleghet kingunghaneng Jacob‑em.
27Taana akequsaqaqa ellngitnun
iqiskumki seghleghqellghit.”
28Jews‑et ighsakegkaqiit Pinilghiit Ungipat enkaam Kiyaghneghem anguyakii. Elpesi apalluqlusi Gentile‑eni Kiyaghneghem atuqegkaqaa ighsakillghat quyasnalusi. Iwernga Jews‑et paninang Kiyaghneghem nakmikegkaqii yuget. Piniqumanginaawii apalluqluku akequsani sivunghitnun. 29Kiyaghneghem umyugagni allangughteqaghhnaanghitaak. Veghhnaanghitii tunusani, peggnaanghitiillu nakmikegkani ellminun yuguluki. 30Sivunghani elpesi Gentile‑eni qaatkellghitaghsi Kiyaghneq. Iwernga maaten allgeghtaghsi Kiyaghneghem nangllegtallgha qayughllak Jews‑et qaatkunneghilnguut. 31Maaten Jews‑et qaatkusigatut Kiyaghneghmun, enkaam nangllekaqiisi Gentile‑eni. Iwernga ilangani aghneghem ellngitallu allgeghlleqaat Kiyaghneghem nangllegtallgha. 32Qamagtengngwaaghluteng yuget qaatkigataat Kiyaghneq. Qaatkunneghitellghat anusimingllaghvigtun ayuquq, Kiyaghneghem tawavek kanaghtaqegkangi. Tawaten piiquq nanglleknaluki qamaglluki.
Usuqilleq Kiyaghneghmun
33Kaay, seghleghllaguut Kiyaghneghem aklungingi, peghqinellgha, liisimallghallu!
Kitumngam liigikngwaaghlleqaki nanqigtillghi?
Kitumngam liigikngwaaghlleqaki igleghneghi?
34Katam Akuzitni Igaqegkani igaqngalghii,
“Kitum liisimakakek umyugakek Atanghem?
Kitumngam aleghqughlleqagu apaqunnaluku?
35Kitum alngunak salisigataguu‑u Ataneq,
Ataneghmun llivikesqelluku uteghmun?”
36Sangwaa qamaglluni ellnganeng pinguuq, ellngakun pinguuq, ellnganunllu pinguuq.
Ellnga usuqellengli quunperugllak! Amen.
Currently Selected:
Romans 11: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
