Revelation 9

1Taagken tallimiitangita yaqulgem qalghightaatni qalghightaa. Esghaghaqa ighaleqetaaq ifkaqaq qilagameng nunamun, key‑litkaaftuqlu qelpeghtesqelluku asilighneghilnguq laawaaq. 2Ighaleqetaaghem qelpeghtaa asilighneghilnguq laawaaq. Tesamaken agepsuq aanuq katam agepsaatun egllughllagem repall siqineqlu qilagallu mamlegtaa agepsum. 3Taagken agepsumeng aanleghaatut locust‑elghutet, nunamunllu ukigtuutut. Kaapigaqleghutekat yugneng, katam scorpion‑et kaapiiqellghistun. 4Ungipaatkaalghiit locust‑et naafqefqiita vegaaghet pisqelluki nalighmeng sungaghyuget nunivagseghat nalighmeng alngunak uqfiget. Aqnightesqegkiillu tamaakunginaat yuget Kiyaghneghem nalluniillghilkangi qawiitgun. 5Locust‑enun tuququghtesnaniqii tamaakut yuget, taawanginaq ikfiqesteghllagestesqegkii tallimanun tanqinun. Scorpion‑et kaapellghistun yuget ikfiqeghllakat. 6Taakuni tallimani tanqini tamaakut yuget tuquyupigllequt, iwernga tuqupagningillequt. Yuget tuqunaqeghllagllequt, iwernga tuqunaanghitut.

7Locust‑et esghaqaaluteng kuunistun ayuqut pilluwamun yataaghqegkat. Naasqwitniteftut llangaqa gold‑et qaghpat, gginiitlu yuget gginiistun ayuqluteng. 8Nuyiit aghnat nuyiistun ayuqluteng, gguutngitlu lion‑et gguutngistun ayuqluteng. 9Yugusimegteggun qaltelguftut esghaqaaluteng savikenghaaghet sakimagiitat. Yaqwghitallu sulugtallghit llangaqa chariot‑et kuunituqat sukeralghiit pilluwamun. 10Papelguftut scorpion‑estun kaapikayugmeng. Enkaam tallimanun tanqinun yuget ikfiqesteghllagiit papegmeggneng kapughluki. 11Umiilelguftut igleghutilghii ellngitneng, yaqulguftuq esghaamakistenga asilighneghilnguum laawaaghem. Hebrew‑stun aatgha Abaddon, Greek‑estun Apollyon, (whaten pisiq, “Naafqiista”).

12Sivuliq seghlepestaaghllak alpagtuq, taam kingunganeng paninang maalghuk seghlepestaaghllagek piyaghqaaguk.

Aghvinliitanga Qalghightallghem

13Taagken aghvinliitangita yaqulgem qalghightaatni qalghightaa. Nagaqughaqa ma gold‑egneng aghqefigegneng estamaneng sighunelgegneng tekerqamegnekun Kiyaghneghem sivunganilnguuk. 14Taam mem aleghqughaa aghvinliitangat yaqulget qalghightaatelek. Pikaa, “Itemutiki estamat yaqulget asighqengngalghiit kiigwllagegni Euphrates‑egni!” 15Enkaam estamat yaqulget itemutkii. Yataaghqegkaaftut taamun aflumun, aghneghmun, tanqimun, ayumiqulleghmunllu tuquqiisqelluki pingayughqellghi yuget. 16Ungipaataanga uglaghtalangitneng kuunitgun igleghlleghhiit pilluwaghtet, 200 million‑nguftut. 17Esghaghwaallemkun esghaghanka kuunit, igleghutistengitlu. Sakimagiitiit kenghestun kaviteftut, sapphire‑estun sungaghyukegteftut, sulphur‑estun, yellow‑nguftut. Kuunit naasqwit lion‑et naasqwistun ayuqeftut, qaanghitneng aanut keneq, agepsuq, sulphur‑a. 18Taakutgun pingayutgun naafqiilleghllagteggun tuququghiit pingayughqellghi yuget. Kuunit qaanghitneng aanleghaatut keneq, agepesuq, sulphur‑a. 19Kuunit aghtughyaghqaanghillelguut qaanghitnillu paapgitnillu. Paapgit nemeghyastun ayuqelghiit naasqulget kiitiqusiit yugnun.

20Ilangi tamaakut yuget tuqutellghilkangit tamaakut naafqiilleghllaget, avuteghqumangilnguut pegsugumangilkangit kiyaghnengllaqateng. Manigughnaniimangitiit tughneghaat, kiyaghnengllaqatlu ulimaaghet gold‑meng, silver‑meng, siilumeng, uyghagmeng, unaghsimengllu. Tamaakut esghaasaghqaanghilnguut, nagaquusaghqaanghilnguut, nalighmeng piyugyaghqaanghilnguut. 21Talwa avuteghqutkumangilkangit yugtalleteng, alignaghtaalleteng, nengughtegpenateng atuqutelleghteng, nalighmeng teglegniilleteng.

Currently Selected:

Revelation 9: ess

Highlight

Compare

Copy