Revelation 8
8
Maaghraghvinliitangi Seal‑ellghem
1Penniighaghaam qelpeghtaqngamigu maaghraghvinliitanga seal‑ellghem, qilagmi qallegnanighwaaghutut entaqun aflum avellghatun tagkaan. 2Taagken esghaghanka taakut maaghraghvinlek yaqulget nekevghalghiit Kiyaghneghem sivungakun. Tamaghhaghmeng qalghightaatenguutut. 3Taagken ilanga yaqulek, tugumiilek gold‑meng sagneghmeng, tagiluni nekevuq aghqefigegni. Tuunegkaat incense‑elghutmeng ilatesqelluki qamaglluki yughiitnun Kiyaghneghem yugan. Yaqulgem llii gold‑egnun aghqefigegnun sivunganilnguuk umiilgusim aqumutam. 4Incense‑em agepsaa mayughtuq maligulluni yughallghitgun Kiyaghneghem yugita. Mayughtut Kiyaghneghmun sagneghmeng yaqulgem tugumiighaneng. 5Taagken yaqulgem, tuguluku sagneq, imighaa kenghaneng aghqefigem. Sagneghem imii miluutii nunamun. Enkaam kallugughteghllagtuq, kavlegtaghllagtuq, nighwaaghpagtaghllagtuq, nunallu ufsuguteghllagtuq.
Qalghightaatet
6Taagken maaghraghvinlek yaqulget, qalghightaatelget yataaghqut qalghightinaluteng.
7Sivuliim yaqulgem qalghightaatni qalghightaa. Taagken kaftekragenkuk, kenghenkuk akumlutek aawmeng nunamun miluutagket. Enkaam pingayughqellgha nunam paneghtuq, pingayughqellghitlu uqfiget paneghtut, qamagllutengllu sungaghyulghiit vegaaghet paneghtut.
8Tuunglighhaan yaqulgem qalghightaatni qalghightaa. Taagken sangwaa naayghaghllagsugnilnguq kumaghugngalghii, miluutaat kelliinun. Enkaam pingayughqellgha kelliim aawgughtuq. 9Pingayughqellghit kelliinilnguut unguvalghiit tuquut, pingayughqellghitlu angyaghpaget naafqengngwaaghii.
10Pingayiitangita yaqulgem qalghightaatni qalghightaa. Taagken ighaleqetaaghllak, kumaghughngalghii torch‑etun, qilagameng ifkaghtuq pingayughqellghitgun kiiwetlu sengngulghiitlu meghet. 11Aatgha ighaleqetaaghem “Sungaghni”. Pingayughqellgha meghem sungaghnightekaq enkaam yulghuteghllaget meghluteng tuqukat qayughllak meq sungaghnightekaalghii.
12Estamiitangita yaqulgem qalghightaatni qalghightaa. Taagken saam tenpii siqineq, tanqiq, ighaleqataaghetlu, enkaam pingayughqellghi mamlegtii. Pingayughqellgha aghneghem mamlegtaa, pingayughqellghallu unugem.
13Esghaghaqallu nagaqughaqallu qawaagpak tengaalghii quulvani, iglagtuluni pilghii, “Seghleghwaaghunaqnguuq! Seghleghwaaghunaqnguuq! Seghleghwaaghunaqnguuq! Kinguliit pingayut yaqulget qalghighhnaqegkumegteki qalghightaateteng, taagken elngaatall seghlepestaaghunaqnguuq yugnun nunami kiyaghlleghhiit tamaani pilleghni!”
Currently Selected:
Revelation 8: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
