Revelation 21

Qilagraghaqlu Nunaghraghaqlu

1Taagken esghaghagka qilagraghaqlu nunaghraghaqlu. Qilaksuwhaaghiisimaaq, nunaksuwhaaghiisimaaq, kelliingiitkaaguqlu. 2Esghaghaqallu Agleghnalghii Neghllak, Jerusalem‑eghraghaq, ukilghii Kiyaghneghmeng qilagmelngughmeng. Neghllak yataaghqelluni ugiighnaqelghiim ullngaqellghatun ugiminun. 3Nagaqughaqa ma iglagtupiglleghhii umiilgusigneng aqumutagneng pilghii, “Esghaqaghhuqun, Kiyaghneghem kiyaghfiga yugnituq! Kiyaghfikelleqii enkaam ellngit yukelleqii. Kiyaghneq ellnga katam ellngitnillequq enkaam ellnga Kiyaghneqelleqaat. 4Quningighlleqii qamaglluki. Tuqungiilleqaa, qivghungiilleqaa, qiyangiilleqaa, talwa aqnighqengngiilleqaa qayughllak tamaakut atuqsaqangit atuqnanighlleqiit.”

5Taagken umiilgusignilnguq aqumutagni piiq, “Esghaqaghqiqun, ulimaaqanka sangwaat qamagtengngwaaghluki nutaghaaluki!” Whatenllu piiq, “Igaqiki tamaakut aapqanka elpenun qayughllak tamaakut akuzitet ipanguut, ugpeqsaghqaagutlu.” 6Piingallu, “Apeghiightuq! Whanga Alpha‑nguunga Omega‑nguunga, whanga piinleghuunga kenlenguunga. Kina alngunak meqsulghii, akingunaan meghsilleqaqa sengngulghiimeng unguvallengestikayugmeng meghmeng. 7Kitum alngunak kayaalqiilghiim allgeghlleqii tamaakut whangamneng. Kiyaghneqelleqaatnga enkaam ellngit avaqutaqelleqanka. 8Iwernga tamaakut quyughtalghiit, ugpeqillghilnguut, seghlelleghpigaghneng seghleghqelghiit, yugtaghtet, nengughtegpenateng atuqullghiit, alignalghiit, maniguutkayuget kiyaghnengllaqanun, qamagllutengllu iqlengalghiit, nekaghqaat naayvaaguq kumaghulghii keneghmengllu sulphur‑mengllu. Taananguuq tuunglii tuqullghem.”

Jerusalem‑eghraghaq

9Taagken yaqulget maaghraghvinlegneng sagnelget esleqngalghiineng kingulighneng seghleliilleghllagneng, ataasim taakuneng takwaanga. Piinga, “Tagi, kelguviknaqamken Ugiighnaqelghiimeng, nuliighqaa Penniighaghaam.” 10Kiyaghneghem Taghneghagkenkun yaqulgem tugulunga aglaataanga uusqalleghpigaanun naaygham. Tawani kelgutaa Jerusalem, Agleghnalghii Neghllak ukilghii Kiyaghneghmeng qilagmelngughmeng. 11Kuukgutngaghmi Kiyaghneghem nighughqellghaneng. Neghllak kuukgutuq akitughllalghiitun uyghagtun, jasper‑etun, meghraakegtutkaghmi crystal‑etun. 12Uusqaghllagmeng mingllutelek, qula maalghuk siipneqluku amigllalgaataq. Qula maalghuk siipneqluku yaqulget amigllagniteftut. Ataasikaghtaghmeng amigllaget igaqfikngaftut ateghmeng qula maalghuk siipneqluku ramkenganeng Israel‑em. 13Mingllutanga neghllagem qula maalghuk siipneqluku amigllalek, pingayut asivaghmi, pingayut aywaani, pingayut ikevaghmi, pingayut pakfallami. 14Neghllagem mingllutanga tunemiqaaftuq qula maalghuk siipneqluku uyghagneng. Ataasikaghtaghmeng uyghaget igaqfikngaftut ateghmeng qula maalghuk siipneqluku apostle‑nganeng Penniighaghaam.

15Yaqulek aleghqughteka gold‑meng usputalguftuq usputaghnaluku neghllak, amigllagillu mingllutangallu. 16Neghllak ulluviighrakegteftuq tagtalnga, pateghtulngatun ayuqeftuq. Yaqulgem neghllak usputaghyaqminigu: 1,500 miles tagtalkeftaa, pateghtulkeftaa, uusqaghtulkeftaallu. 17Mingllutangallu usputaghyaqminigu, 216 feet‑nguftuq uusqaghtulnga. Yaqulgem usputallghatun ayuqeftuq yugem usputallgha. 18Mingllutanga ulimaaghuftuq jasper‑meng. Neghllak ulimaaghuftuq gold‑eperegwaaghmeng. Gold‑a meghraakegtepiglleghhii siqinwhaaghtun. 19Neghllagem mingllutangan tunemii pinighnaaqusighluteng allaaghhiinaghneng akitughllagneng uyghagneng. Sivuliq jasper‑nguftuq, tuunglighhaa sapphire‑nguftuq, pingayiitangat agate‑nguftuq, estamiitangat emerald‑nguftuq, 20tallimiitangat onyx‑nguftuq, aghvinliitangat carnelian‑nguftuq, maaghraghvinliitangat chrysolite‑nguftuq, pingayuneng ingluliitangat beryl‑nguftuq, estamaneng ingluliitangat topaz‑nguftuq, quulngughutangat chrysoprase‑nguftuq, qula ataasiq siipniitangat jacinth‑enguftuq, qula maalghuk siipniitangat amethyst‑nguftuq. 21Qula maalghuk siipneqluku amigllaget pearl‑nguftut, tamaghhaghmeng amigllaget ataasimeng pearl‑meng ulimaaghuftut. Neghllagem tuumngi gold‑eperegwaaghuftut; gold‑a meghraakegtepiglleghii siqinghwaaghtun.

22Neghllagmi esghaanneghitunga Temple‑meng, qayughllak Temple‑nga Atanghuuq Kiyaghneq Aghtughyaghqaghhaanghilnguq, Penniighaghaaguqlu. 23Neghllak siqineghsughniituq, nalighmeng tanqighsughniituq nighugkameng, qayughllak nighughqellgha Kiyaghneghem nighukegkanga, Penniighaghaqlu kenelghutaqegkanga. 24Qamagtengngwaaghluteng nunam yugi kiyaghllequt nighugakun kuukgutngalghiikun. Nunamllu umiilgita aklungiteng tagiquutiit neghllagmun. 25Neghllagem amigllagi umegnaanghitut aghneghem naangneghani qayughllak unugnaanghilnguq tamaani. 26Nunam yugita neghllagmun tagiquulleqiit pinighnaghllaget aklungiteng. 27Iwernga neghllagmun iteghyaghqaanghituq sangwaa seghleq, talwa kina alngunak seghleghnatun pista, nalighmeng iqlengiqesta. Iwernga neghllagmun iteghyaghqaagut tamaakunginaghhaat aatghit igaqngalghiit Igaakun Unguvallghem. Taakut Igat Penniighaghaam pikii.

Currently Selected:

Revelation 21: ess

Highlight

Compare

Copy