Revelation 20

Thousand Ayumiqullghet

1Taagken esghaghaqa yaqulek qilagmeng ukilghii tugumiiqluni key‑nganeng Saamnangilnguum Laawaaghem, qiipraghuteghllagnengllu. 2Kayaalqelluku dragon‑a tuwaa. (Dragon‑a taananguuq ayumightaq nemeghyaq, aatgha Tughneghaq, Tughneghaq.) Taagken yaqulgem asighqaa qiipraghutneng thousand ayumiqulleghnun. 3Miluulluku Laawaaghmun, taagken amigmeng uumgulluku maghqatutkaa seal‑eluku. Enkaam Dragon‑em puughsaghqaananighii yuget kenlanga thousand ayumiqullghet alpallghitnun. Alpakata itemutaghlleqaat.

4Taagken esghaghanka umiilgusit aqumutat, aqumgalghiitlu taakutgun. Kiyaghneghem nanqigtiyaghqaaghtestekii yugneng. Eshaghankallu unguvasiit tamaakut naasqwightuqiit apalluqluku Jesus. Ungipaqegkaqegkangat ipalleq Jesus‑em qayvighqegkaa, akuzitangillu Kiyaghneghem. Taakut maniguusimangitut teghikusalluugmun, nalighmeng nangaghneghanun. Talwa qagumegteggun, nalighmeng iiggmegteggun allgeghtellghitaat nalluniilkutaa teghikusalluugem. Unguvaghtuulluteng igleghutilgusighaat Christ‑a thousand ayumiqulleghnun. 5Taana sivuliiguq unguvaghqulleq. (Ilangi tamaakut tuqukat unguvaghtuunnaanghitut kenlanga thousand ayumiqullghet alpallghitnun.) 6Tamaakut Kiyaghneghem unguvaghtekii unguvaghtuusuwhaalleghmi quyastekaagutlu agleghnaghtutlu. Tuqunaanghitut tuunglighhaani tuqullghem. Iwernga priest‑ngunaqnguut Kiyaghneghmunllu Christ‑amunllu. Igleghutilgusighlleqaatlu Christ‑a thousand ayumiqulleghni.

Kiyaghneghem Kayaalqegkanga Tughneghaq

7Thousand ayumiqullghet alpakata, Tughneghaq anusimingllaghviganeng itemusaghqaaguq. 8Enkaam aanluni puughqughlleqii nunatat mingitngalghiit nunataghhaani tamaghhaani. Tamaakut nunatat aatqiit Gog‑enkuk Magog‑enkuk. Yugik uglaghllagtut qenaavzeghaatun esnem. Taagken Tughneghaam qerngughlleqii pilluwamun. 9Tughneghaam pilluwaghtengi iqelmun mingilluteng igleghllequt nunakun. Kaalluteng kangllulleqagket nunaaqlu Kiyaghneghem yugita nayaat, neghllaklu Kiyaghneghem piniqegkaa. Taagken qilagmeng Kiyaghneghem keneq ukigtesluku paneghtekii pilluwaghtet. 10Taagken Tughneghaq puughtikaq nunataneng, Kiyaghneghem yaqulgita miluulleqaat naayvamun kumaghulghii sulphur‑meng. Tawavek miluutkaqegkegket teghikusalluugenkuk, uuknaliqistesighwaaghenkuk. Tawani ikfiqeghllagllequt aghneghtuumaan unugtuumaan quunperugllak kenlengunaan.

Kinguliq Nanqigtilleq

11Taagken esghaghaqa Kiyaghneq aqumgalghii qatelghiignekun umiilgusignekun aqumutaghllagegnekun. Nunallu qilagallu qimaaguutuk Kiyaghneghem tawantellghaneng, allallu esghaghyaghqaagpenatek. 12Esghaghankallu tuqulaghaatkat, ukaliiwaqlutengllu aangwaaghwaaqlutengllu ayuqelghiit. Nekevghatnguftut sivungani umiilgusim aqumutaghllagem. Taagken igat qelpeghtiit, Igii Unguvallghem, igaqughvikegkat aatghitneng tamaakut unguvayaghqat quunperugllak. Ilangillu igalghutet qelpeghtiit igaqughvikegkat tuqukat kiyaghtaallghitneng ayuqelghiit. Kiyaghneghem nanqigtii atuqluki igaquqat igatgun. 13Taagken kelliim tuqumasliini pegtii. Tuqullghemllu Hades‑emllu tuqumasliitek pegtiik. Qamagtengngwaaghluki Kiyaghneghem nanqigtii kiyaghtaallghistun. 14Taagken Tuqulleqlu Hades‑lu miluutagket naayvam kenghanun. Naayvam kengha tuungliqaa tuqullghem. 15Kitum alngunak aatgha igaqumangilkan Igaani Unguvallghem, miluutkaat naayvam kenghanun.

Currently Selected:

Revelation 20: ess

Highlight

Compare

Copy