Revelation 22
22
1Taagken yaqulgem kelguvikaanga kiiwegneng maaqelghiik Kiyaghneghemllu Penniighaghaamllu umiilgusigkenka aqumutagkeneng. Unguvallelitikayugmeng melgek, meghraakegtutkalghiik crystal‑etun. 2Maaqngalghiik qukaakun tumangan neghllagem. Kiiwek inglugtun uqfigtuqak unguvallelitikayugneng. Tamaghhaghmi uqfik piitestikayuguuq fruit‑neng tanqiinaghqun, ayumiqulleghmi, ququngiitlu naallghutusiiftut nunataanun. 3Sangwaa alngunak Kiyaghneghem nanqigtekaa aghyuughyaghqaaluku, neghllagmennaanghituq. Kiyaghneghenkuk Penniighaghhaankuk umiilgusik aqumutagket neghllagmesaghqaaguk, Kiyaghneghemllu qepghaghtengita manigughlleqaat. 4Gginaa esghaghlleqaat, aatghallu qawiitgun igaqngallequq. 5Tamaani unugnanighlleqaa, kenelghutaghsughniighulleqii, nalighmeng siqineghsughniighulleqii, qayughllak Ataneq Kiyaghneq nighukelleqaat. Igleghutillequtlu umiilguluteng quunperugllak kenlengunaan.
Tagilleghqaa Jesus‑em
6Taagken yaqulgem piinga, “Ukut akuzitet ugpeqsaghqaagut, ipanguutlu. Atanghem, Kiyaghneghem igleghutilghiim taghneghiitneng uuknaliqistemi, kayagtekaqaa yaquleni kelguvikesqelluki qepghaghteni sangwaat piyaghtungestaghniluki.”
7Jesus piiq, “Nagatek! Tagiyaghtughtunga! Quyastekaagut qaatkullghiit uuknaliqelleghnun igaqngalghiinun ukutgun igatgun.”
8Whanga, John, nagatkaqankallu esghaqaqankallu tamaakut. Nagaqughaqngamkillu esghaghaqngamkillu tamaakut, niinghutunga yaqulgem itegaani manigughnaluku, kelguvikisteka tamaaken. 9Iwernga piinga, “Tawaten pigpenang! Whangallu qepghaghtenguunga elpetun, ugpeqaalgutegpetunllu uuknaliqistestun, qaatkullghiistunllu akuzitangitnun ukut igat. Manigughhu Kiyaghneq!” 10Piingallu, “Aksaqegpenaki uuknaliqellghet ukut igat aapqiit, qayughllak tamaakut pilleghqiit kaasaghtuumaat. 11Kina alngunak seghletun pilghii nagneghli seghletun, enkaam kina alngunak nukeggnameng suumqelghii nagneghli nukeggnameng suumqelluni. Kina alngunak elqughutngalghii nagneghli elqughutngaluni, kinallu alngunak pelungilnguq nagneghli pelungilluni.”
12Jesus piiq, “Nagatek! Tagiyaghtughtunga! Akileghtuusaghqanka kelqelleqanka nallangightughnaluki yuget kiyaghtaallghistun. 13Whanga Alpha‑nguunga Omega‑nguunga, whanga sivuliigunga kinguliigunga, whanga piinleghuunga kenlenguungallu.”
14Quyastekaagut tamaakut atkuyaateng aghvikiit iqangiitesluki. Tamaaken apalluqluku neghyaghqaaghtekaagut piitestekaaneng unguvallelitikayugem uqfigem. Iteghyaghqaaghtekaagutlu neghllagem amigllagitgun. 15Iwernga neghllagem eslataanilnguut qikmiigut, alignalghiinguut, nengughtegpenateng atuqistenguut, yugtaghtenguut, kiyaghnengllaqanun maniguutestenguut, iqlengiqsuneghtuut, iqlengiqumanginaghaqutlu.
16“Whanga, Jesus, kayagtekaqaqa yaqulka elpesinun ugpeqanun yughaghvignilngughnun. Apeghlleqaak ukuk elpesinun, ‘Whanga David‑em kingunqaanga, whanga nighugrakegtaagunga unaangum ighaleqetaagha.’”
17Taghneghaklu Ugiighnaqelghiillu piik, “Tagi!” Tamaghhaghmillu nagallghii pili, “Tagi!” Kina alngunak meqsulghii tagili; tuguklighligu akingilnguq meq unguvallelitikayuk.
Naangniitet
18Whanga, John, kelengasaaghyuganka nagallghiit uuknaliqelleghnun igaqegkatgun ukutgun igatgun. Kitum alngunak ilaraaqaki uuknaliqutkegkat ukuni igani, Kiyaghneghem aghyuughlleqaa. Ellnganun ilalleqii tamaakut seghleliilleghllaget igaqngalghiit ukutgun igatgun. 19Kitum alngunak ikuvikegkaki uuknaliqutkegkat ukuni igani, Kiyaghneghem iqilleqii nengighqii piitestekat uqfiganeng unguvallelitikayugem. Kiyaghtesnaanghitaallu agleghnalghiimi neghllagmi. Taakuk apeghngaak ukuni igani.
20Jesus‑nguuq aapghilghii tamaaken qamaglluteng ipanguniluki. Piiqlu, “Ipapestaaq tagiyaghtughtunga!”
Amen. Tagi, Ataneq Jesus!
21Nangllegtallgha Atanemta Jesus‑em tamaghhaghpesinilli. Amen.
Currently Selected:
Revelation 22: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
