Revelation 19
19
1Kingunganeng iknaqeghllalghiim yaqulgem akuzillghan, qilagmi nagaqughanka yulghuteghllaget akilghuulghiit,
“Hallelujah!
Yugulilleq, quulvalleq, aghtughyaghqaanghilleqlu Kiyaghnemta pikii!
2Ellngan nanqigtillghi ipanguut, elqughutngaat!
Ellngan aghyuuqaqaa apeghseghuq aghnaq yugusimineng akikikayuk qayughllak nunam yugi seghletun pistekangi sex‑kun atuqestaqluni.
Kiyaghneghem akitkaqaa qayughllak qepghaghtengi tuququghtestekangi.”
3Yulghuteghllaget akilghuulaataghtut,
“Hallelujah!
Neghllagem kumalghiim agepsaa mayuuguq quunperugllak kenlengunaan!”
4Taagken yuginaq estamat siipneqluki elder‑et, estamatlu unguvalghiit niinghuquulluteng manigughaat Kiyaghneq, aqumgalghii umiilgusigmikun. Pikaat,
“Amen! Hallelujah!”
Penniighaghaam Nengughtellghan Neqenghaghqellgha
5Taagken umiilgusigneng aqumutaghllagegneng ma whaten piiq,
“Usuqiteggu Kiyaghneghput,
qamagllusi qepghaghtengani alikilghiini ellnganeng,
ukavanlengughnillu aangwaaghnillu!”
6Taagken nagaqughanka llangaqa mengit yulghuteghllaget. Nagatkaaluteng suksugistun tevlughteghllalghiit meghet, kallugemllu tengngaagtallghatun ayuqluteng. Akilghuugut,
“Hallelujah!
Ataneq Kiyaghneghput, Aghtughyaghqaghhaanghilnguq igleghutiiq!
7Quyatelta, elngaatall quyaghllageltallu usuqelteggullu!
Penniighaghaam nengughtelleghqaa kaatuq,
nuliighqaallu yataaghqumaaq.
8Kiyaghneghem aasightuumaa ugiighnaqelghii pinighrakegtameng qatelghiimeng linen‑meng.”
(“Linen‑a” whaten pisiiguq, elqughutngalghiit aneghneghqillghet Kiyaghneghem yugita piiqegkangit.)
9Taagken yaqulgem piinga, “Una igaqigu: Penniighaghaam nengughtellghan neqenghaghqellghanun neghyaghtiisqegkat quyastekaagut.” Whatenllu piinga, “Ukut ipanguut akuzitangi Kiyaghneghem.”
10Taagken niinghutunga yaqulgem itegaakun manigughnaluku, iwernga piinga, “Tawaten pigpenang! Manigughhu Kiyaghneq! Qepghaataqaqa Kiyaghneq elpetun, ugpeqaalgutegpetunllu. Ellnginguut ataasiighmelnguut ipalleghmun Jesus‑em apeghtuusaqegkaanun. Ipalleq Jesus‑em apeghtuusaqegkaa taananguuq ipalleq Kiyaghneghem Taghneghagkenka uuknaliqistenun ungipaqestekaa.”
Igleghastenga Qatelghiim Kuunim
11Taagken esghaghaqa qilak qelpelghii, taawa qatelghii kuuni! Kuunikun igleghlleghhiim aatgha “Ataasiighmelnguq, Ipapik”. Elqughutngaat nanqigtillghi, pilluwaqangillu anguyani. 12Iiskek kumaghullghatun kenghem ayuqlutek, naasqumikun qaghpalghutelguftuq. Aatgha ellngakun igaqngaftuq kitum alngunak nallukegkanga iwerngaqun ellnginaan. 13Atkuyaaghek atukek neptekaaftuk aawkun. Aatqeftaa, “Kiyaghneghem Akuzitanga”. 14Qilagmeng pilluwaghtengita maligsaaghaat uuglluteng qatelghiitgun kuunitgun, atkuyaaghluteng iqangilngughmeng qatelghiimeng linen‑meng. 15Qaanghaneng aanuq ipelghii savigpak, taaggun qamagtengngwaaghluki nakumiit kayaalqughlleqii. Igleghulleqii iron‑meng anagutalighluni. Taagken tutmaghlleqii anguyani katam yuget tutmaghaqellghistun grapes‑et qageghquusignilnguut. Taana tutmalleq sakraalleghllakaa Kiyaghneghem Aghtughyaghqaghhaanghilnguum. 16Atkuyaaghakunllu qugtuqaakunllu igaqngaftuq ateq whaten; Umiilga umiilget, Atangha atanghet.
17Taagken esghaghaqa yaqulek nekevghalghii siqineghqun. Qamaglluki qawaalghutet quulvani tengaalghiit iglagtupiglluni pii, “Tagilaghaallusi qerngughutek Kiyaghneghem neqenghaghqelleghllaganun! 18Tagitek, neghyaghtughteki kemegkwaaghit umiilget, pilluwaghtet umiilgit, pilluwaghtetlu. Neghyaghtughteki kemegkwaaghit kuunit, kuunikun igleghtestet, qamagllukillu yuget, qepghaghtelaaghet, qepghaghtelaaghunghilnguut, ukavanlenguut, aangwaaghetlu.”
19Taagken esghaghanka teghikusalluuklu, nunamllu umiilgi, pilluwaghtekullghiit qerngughutut pilluwaghnaluku igleghlleghhii kuunikun, pilluwaghtengillu. 20Tugwaagket teghikusalluugenkuk, uuknaliqistesighwaaghenkuk allaaghlluwaghtiighaataqaq tawanlluku teghikusalluuk. (Allaaghlluwaghtiiqelleghmikun puughquqii nalluniillengegkat teghikusalluugmeng, maniguqaatlu nangaghnegha.) Teghikusalluugenkuk, uuknaliqistesighwaaghenkuk unguvaagkenka miluutaak naayvam kenghanun kumaghulghiimun sulphur‑meng. 21Pilluwaghtengik kuunikun igleghlleghhiim tuququghii savigpagkun qaneghmineng aanegkakun. Taagken qamaglluteng qawaaget neghiit kemegkwaaghit kepsuqiinalleghmeggnun.
Currently Selected:
Revelation 19: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
