Revelation 18
18
Babylon‑em Naafqellgha
1Taam kingunganeng esghaghaqa ilanga yaqulek qilagmeng ukilghii. Aghtughyaghqaanghillelegllaguftuq, nighughqelleghmineng iingunaghhaan nuna nighugtaa. 2Akilghuughllagtuq,
“Naavumaaq! Naavumaaq Babylon‑eghllak!
Nekaaghsimaat tughneghaat,
nukeggnalghiit tughneghaat,
ukmanginneghilnguut kusgenalghiit qawaaget.
3Babylon‑em seghletun atuqillgha sex‑meng wine‑etun ayuquq,
nunataghhan tamaghhaan meghaa.
Nunam umiilgita atuqaqaat,
nunamllu akilpegaghtengita aklungighisiqngwaat nuqetusaghqaanghilngughqun sex‑kun atuqiyullghakun.”
4Taagken nagaqughaqa ilanga ma qilagmeng pilghii,
“Yumni, aanleghaatek Babylon‑meng!
Ilategpenasi seghleghqellghanun aghyuullengnayukafsi ellnganun maligullusi.
5Seghleghqellghi mayughteghllagngaat uusqaghtutkaghmeng qilagtun,
Kiyaghneghem neqamikii seghleghqellghi.
6Seghletun piteggu Babylon katam ellngan seghletun pillghatun.
Malghughqelluku seghletun pillgha piteggu.
Qayuusiikun kuuviteggu wine‑a iknaqetulnga malghughqengngaan ellngan atuqaqegkanganeng.
7Ellmineng usuqeghllagaquq,
aklungighllanillu atuqaqaa samun alngunak piyukegkaminun.
Enkaam ikfiqesteghllagteggullu qivghusteghllagteggullu atunekiitesluku qaghyalleghllaganun.
Ellmineng piiquq,
‘Queen‑nguunga aqumgalghii umiilgusimkun.
Ugingighaanghitunga enkaam qivghunaanghitngwaaghtunga!’
8Tamaaken apalluqluku aghneghhiinaghmi kaalleqaa tuqullghem,
qivghullghem, neqangisagllagem.
Taagken kenghem paneghlleqaa qayughllak aghyuughistenga,
Ataneq Kiyaghneq, aghtughyaghqaanghiteghllagtuq.”
9Nunam umiilgi ilatkat atuqillghanunllu qiliighyullghanunllu, esghaqumegteggu agepsaa panellghan qiyakelleqaat, iglagtupigllutengllu qiyakeghllaglleqaat. 10Uyavanlluteng nekevellequt qayughllak alingelghiit ellmengllu ilannayukameng ikfiqellghanun. Pillequt,
“Seghleghhaghmeng! Seghleghhaghmeng elpek aangeghllak aghtiigalnguq neghllak, Babylon!
Aghyuullenguten ataasighhaghmi aflumi!”
11Nunam akilpegaghtengita qiyaaghwaatkaat qivghughllagumaghmeng, qayughllak kitum alngunak tukfighnaniqangit saghyangit. 12Babylon‑mi akilpegaghtet akikaqsaqangit gold‑et, silver‑et, akitughllaget uyghaget, pearl‑etlu; akikaqsaqangitlu qiipaghaghqat ulimaaghet linen‑meng, silk‑meng, qiipaghaghqatlu iqeghtaqelghiit esnegyaaghet, kavirrakegtatlu. Akikaqsaqangitlu tepkegtepiglleghhiit unaghsit, ulimaaghet naangquneng, akitughllagneng unaghsineng, siiluneng, savikenghaagneng, marble‑enengllu. 13Akikaqsaqangitlu cinnamon‑et, spice‑et, incense‑et, myrrh‑et, frankincense‑et; wine‑et, olive‑em mesiighi; avlawat, wheat‑et; cattle‑et, penniighet, kuunit, wagon‑et; talwa yuget akikaqsaqangit qepghaghtelaaghuluki. 14Akilpegaghtet Babylon pilleqaat, “Qamaglluteng pinilghiit allgeghsukeghllakaghten aviighutut. Qamagllutengllu aklungighllagten qelmeghllaget aviighutut, allamengllu allgeghsaghqaananighaten!” 15Akilpegaghtet aklungighikat akikiluteng Babylon‑mun, nekevghallequt uyavanlluteng qayughllak alingelghiit ilannayukameng ikfiqellghanun. Qiyallequt qivghughllagumaghmeng, 16whatenllu pillequt,
“‘Seghleghwaaghuuq! Seghleghwaaghuuq neghllak!
Aatkayuguyaghtuq linen‑meng, esneyaaghmeng,
kavirrakegtamengllu, ullngaqegkayuguyaghtuqlu gold‑meng,
akitughllagmeng uyghagmeng, pearl‑mengllu!
17Ataasimi aflumi aklungighllagiitaa!’
“Qamaglluteng angyalget, yugit, passenger‑ngit, akilpegaghtetlu igleghakayuget angyaghpagteggun allgeghunnaluteng kiyaghusighqameggneng, angyaghpagit aghuliiqat uyavanlluteng Babylon‑meng kumaghaqngan. 18Esghaghluku agepsaa kumallghan, akilghuugut, ‘Alla neghllagituq whatelngughmeng!’ 19Naasquteng pagulalightughiit qiyatkelluku, qivghutkelluku akilghuugut,
‘Seghleghwaaghuuq! Seghleghwaaghuuq neghllak!
Aklungighllaganeng qamaglluteng angyaghpalget aklungighikayuguyaghtut!
Iwernga ataasimi aflumi aklungighllagiitaa!’”
20Taagken qilagmeng kina piiq,
“Kaay qilagmelngughni, quyakiteggu qayughllak Kiyaghneghem naafqaa Babylon!
Quyatek Kiyaghneghem yugitni,
apostle‑eni, uuknaliqistenillu!
Kiyaghneghem aghyuughaa qayughllak seghletun pikaqegkangisi!”
21Taagken iknaqeghllalghiim yaqulgem kevgaa uyghagrugllak, grain‑mun kagimtisistun ayuqelghii. Miluutaa kellimun, whaten pimaghmi,
“Tawateghpigaq neghllak Babylon,
Kiyaghneghem miluuteghllaglleqaa asitmun enkaam allamengllu esghaghnaanghitaat.
22Kitum alngunak nagaqughnaanghitii harp‑esteten,
pillgughikat aynganangasteten,
flute‑esteten, qalghightaghtetenllu!
Qamaglluteng pillgughikat qepghaghteten aviighusaghqaagut,
grain‑meng kagimtesteten allallu nagaqughnaanghitiit!
23Kenelghutam nighuga kuukgunnaanighnaquq elpeni.
Mengik nulightughnaqelghiimllu ugiighnaqelghiimllu nagaqughnanighnaquk elpeni.
Akilpegaghteten aghtiigatngwaaghyaghtut nunataghhaani tamaghhaani.
Alignaghtaalleghpegun puughquqaqaten qamagtengngwaaghluki nunam yugi!
24Babylon‑mi taawa aawit uuknaliqistet,
Kiyaghneghem yugi, qamagllutengllu tuqutkat nunami.”
Currently Selected:
Revelation 18: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
