Philippians 4

Paul‑em Salleghqameng Ungipaaskangi Ugpeqat

1Enkaangam piniqegkamni ugpeqaalgutemni, esghaghyupigtamsi, quyamasiqamsi, akileghtuusaqamsillu qepghallemnun. Tawaten aghuliitekestaghtek Ataneghqun. 2Euodia, Syntyche, qevuullunga qeleghnaqamtek, taaqitek aghivanneghmeng. Ataasistun lliightek, qayughllak ugpeqaalgutkututek Ataneghqun. 3Qepghalgutemni Syzygus, elpeklu kayuusiitaghtikek aghnak taakuk taaqesqellukek aghivanneghmeng. Elkegkenka qevuullutek qepghalgusiqaqiinkut Clement‑lu ilangillu qepghalgutenka, qamaglluta ungipaqinguluta Pinilghiineng Ungipaneng yulghuteghllagnun. Qepghalgutma qamaglluteng aatghit igaqngaat Igaakun Unguvallghem. Tawantut igani aatghit qamaglluteng kenlengilngughmeng unguvallengegkat.

4Iiwleng quyamaaqitek Ataneghqun. Pinaqlaataghamsi, Quyamaaqitek! 5Nuqenneghtulleghsi yugem qamaglluni liilligu. Ataneq tagiyaghtungestaghtuq. 6Sumeghyalitkegpenaan sangwaa alngunak. Yeghlegi, sameng aklukufsi yughaneghpesini tungsighaqitek Kiyaghneghmun tuunesqellusi. Iiwleng tungsighaqitek igamsiqayullelighlusi. 7Enkaam Kiyaghneghem ilusillu umyugasillu nekeggmetesnaaghii Christ Jesus‑kun. Kiyaghneghem nekeggmellgha aangeghllagtuq, kitum alngunak liigikngwaaghnaanghitaa.

8Enkaangam ugpeqaalgutemni, naangniitangakun latama ungipaasuwamsi sumeghtaghaatkumanginiisqelluki pinilghiitlu usuqsaghqatlu whatelnguut: tamaakut ipapiget, quulvaghyaghqat, elqughutngalghiit, pelungilnguut, piniqsaghqat, tamaakutlu pinitun akuzitkesaghqat. 9Sangwaa qamaglluku nagneghuteggu liitkaghsi whangamneng apeghtughillemkunllu kiyaghtaallemkunllu. Enkaam Kiyaghneq nekeggmellelitikayuk elpesinillequq.

Paul‑em Iqamsiqayugvikegkangi Philippi‑yeghmiit Ugpeqat Tunusiitneng

10Elngaatall quyapigtunga Ataneghqun qayughllak qavngarugllaggaaneng whaa allameng kayusiillaataqefsinga! Liisimakaqa kayusiisukaqaghpesinga, iwernga pipagningitkaagusi. 11Aklungunilunga pingunghitunga qayughllak natesaghngaaghma itagnaghaqunga. 12Ilangani nuughngaghma kiyaghtaqunga, ilangani siiptiilunga kiyaghtaqunga. Itagnaghyagusimaanga nani alngunak satulemtun kiyaghhnemni. Itagnaghaqunga kepsughngaghma kiyaghhnemni, iyataghngaaghmallu kiyaghhnemni, talwa aklumaghngaaghmallu, aklunghiteghngaaghmallu. 13Sangwaa alngunak piyaghqaqaqa Christ‑akun iknaqughsaghtemkun. 14Paninang elpesi pinitungwaaq kayusiitaqaghpesinga seghleliinemni.

15Elpesi Philippi‑yeghmiini, liisimakngwaaghaghsi aghulaqaqngama Macedonia‑meng, ungipaqiyuwhaaghaqngama Pinilghiineng Ungipaneng, ellnginaagusi ugpeqani kayusighikat whangameng. Ellnginaagusi ilatngalghiit allgeghutellemnunllu ifliillemnunllu. 16Ataasighhaagpenaan aklupignemni manimeng Thessalonica‑mellunga, tuyughaqaghpesinga. 17Iwernga liigikesugamsi tunusasi manit megnunalleghpigaanghitut whangamni. Megnunalleghpigaqta esgha una: akileghtuusaghqaq allgeghsaghqaghsi Kiyaghneghmeng pinitun pillesi apalluqluki.

18Whaa maaten naamaanga, aa‑a, talwa siiptiilunga ayuqunga. Tuyuusasi Epaphroditus‑kun qamaglluteng kaasimaat, enkaam whaa aklungigatunga. Tunusasi whangamnun aghqutkegkastun ayuqut Kiyaghneghmi efqughtinapiglleghhiit. 19Enkaangam Kiyaghneghma yataaghqunnaaghiisi sameng tamaghhaaneng aklukegkaghpesineng aklungitelleghllagmikun Christ Jesus‑kun. 20Kiyaghnemnnun, Atamun usuqilta, quunperugllak kenlengunaan. Amen.

Kinguliit Suumqillghet

21Ungipaataghnakesi qamaglluki ugpeqat Christ Jesus‑kun suumqaqankanguq. Ugpeqaalgutet whangamnilnguut suumqaqiisinguq. 22Qamaglluteng Kiyaghneghem yugan suumqaqiisinguq, kiyang taakut Caesar‑em mangteghaghmiingita.

23Nangllegtallgha Jesus Christ‑am taghneghaghpesinilli.

Currently Selected:

Philippians 4: ess

Highlight

Copy