Colossians 1

1Ukut latat Paul‑meng pinguut. Kiyaghneghem piyukellghakun apostle‑ngughtekaagunga Christ Jesus‑mun. Timothy‑mengllu pinguut ugpeqaalgutemnneng.

2Kiyaghneghem yugitnun pinguut Colossae‑melngughnun, ataasiighmelnguut ugpeqaalgutet Christ‑akun.

Kiyaghneghem Atamta, nanglleklisillu nekeggmellelisillillu.

Yughii Iqamsiqayullghem

3Iiwleng iqamsiqayugvikaqaghput Kiyaghneq, Atanga Atanemta Jesus Christ‑am, yughaatkennemsi. 4Tawaten piiqukut qayughllak nagaquumaaghput ugpeqilleghsi Christ Jesus‑meng, piniqilleghsillu tamaghhiitnun Kiyaghneghem yugitnun. 5Pinilghiit Ungipat ungipapiguut. Nagaqughyuwhaaghaqngafsiki, liitkaagusi sighimalleghmeng Kiyaghneghem tuunegkaaneng elpesinun. Enkaam sighmalleghpesi ugpeqillelgustaqiisillu piniqillelgustaqiisillu. Qilagmi Kiyaghneghem kagpagumaa elpesinun sangwaa sighimakegkaghsi. 6Pinilghiit Ungipat quyastimanginaagut yugnun. Enkaam Pinilghiit Ungipat mingitnguut iingunaghhaanun nunam, katam tawaten quyastillghistun elpesinun nagaqughyuwhaaghaqngafsigu Kiyaghneghem nangllegtallgha. Taagken kenlanga liitaghsi Kiyaghneghem nangllegtallgha. 7Liitkaqaghsi Kiyaghneghem nanglleghtallgha Epaphras‑meng, piniqegkamnneng qepghalgutemnneng. Ataasiighmelluni qepghaaguq Christ‑amun, qepghaqaqaa whangkuta qepghaghyukaqsaqefut. 8Ellngan ungipaasimiinkut piniqilleghmeng Agleghnalghiim Taghnegham tuunegkaaneng elpesinun.

9Aghneghmeng taagken nagaquutemnneng tamaakut, yughaatkennaniigatamsi. Tungsiitngwaamsi Kiyaghneghmun liisimakesqelluku qamaglluku ellngan piyukellgha. Yughaatkaqamsillu peghqinghusqellusi, liigikesqellukillu sangwaat Agleghnalghiim Taghnegham apeghtuutkii. 10Taagken kiyaghsaghqaaghllequsi Atanghem piyukellghatun, iiwleng atuqaqelleqaghsi sangwaa efqughnalghii ellngani. Tawaten kiyaghtelleghpesini allaaghhiinaq pinilghii qepghaghlleqaghsi enkaam wata liilleqaghsi Kiyaghneq. 11Yughaatkaqamsi Kiyaghneghmun iknaqughsiisqellusi ilugpesigun aghtughyaghqaanghilleghllagmikun. Tawaten piiquq nuqenneghtughteghllagesqellusi nekeggmellelighlusi samun tamaghhaanun. 12Enkaam quyamallelighllaglusi iqamsiqayugvikelleqaghsi Ata. Ellngangulghii elpesinun nengilgutestikaq sameng tamaghhaaneng akequsaqegkamineng tuunelleqniluki yuni kiyaghlleghhiit nighugmi. 13Ellngan yugulikaqiinkut aghtughyaghqaanghillghaneng mamlegem enkaam tagitkaqiinkut Ataneghpagullghanun piniqegkami Ighneghmi. 14Ellngan tukfiqaqiinkut, seghevutkaqiillu seghleghqelleput.

Christ‑a Kiyaghneghtungwaaq Ayuquq

15Christ‑a tawatetngwaaghtuq aliinneghilngughtun Kiyaghneghtun. Kiyaghtenguuq sivungani sangwaa alngunak ulimallghilluku, enkaam qulighpigaaguq ulimaaghyaggaghneng. 16Ellngakun Kiyaghneghem ulimakaqii sangwaat qamaglluki qilagmelnguutlu nunamelnguutlu. Ulimakaqii esghaqayuput, esghiigalkeputlu tamaakutlu umiilget, atanghet, igleghutistet, pilleghqalgetlu. Kiyaghneghem ulimakaqii sangwaat qamaglluki Christ‑akun, Christ‑amunllu. 17Christ‑a tawantekaaguq sivungitni sangwaat alngunak, aghtughyaghqaanghillghakunllu sangwaat qamaglluki ellngan nekaghqaghlluwaaghitnitestaqii. 18Ellnga naasquutinguuq ugpeqanun yughaghvigmelngughnun, ellngan yugusiqii. Ellngan yugusiq unguvangustengngwaa. Ellnganguuq unguvaghyuwhaaqaq tuqulleghmeng, enkaam qulighpigaaguq samun tamaghhaanun. 19Kiyaghneghem piyukelqaa qamagtengngwaaghluni ellmi katam kiyaghhnaluni Ighneghmi ilungani. 20Kiyaghneghem Ighneghmikun veghutestekaqii ellminun sangwaat qamaglluki nunamillu qilagmillu. Enkaam aawakun Ighneghmi tuqaaqngan qaquurami ilaliighutestekaqii ellminun.

21Ataasimeng pelleghngayaghtusi Kiyaghneghmeng. Enkaam anguyaksaghiisi sumeghtaghalleghpesigun, seghletunllu pilleghpesigun. 22Iwernga Kiyaghneghem ilaliighunneqigtestiisi ellminun Ighneghmi yugusiin tuqullghakun. Tawaten pikaaguq taginnalusi nayuutngalleghminun agleghnaghlusi, pelungillusi, avutngillusillu. 23Kiyaghneq tawaten pillequq nagnequfsi ugpeqluki Pinilghiit Ungipat aygughikellngunaki. Iqitegpenasi sighmalleghmeng allgeghtekaghpesineng nagaqughaqngafsiki Pinilghiit Ungipat. Taakut Pinilghiit Ungipat ungipaqnguut tamaghhaani nunam. Kiyaghneghem nakmikegkaqaanga, whanga Paul, qepghaghtengulunga ellminun ungipaqesqelluki Pinilghiit Ungipat.

Paul‑em Qepghaatillgha Ugpeqanun Yughaghvignilngughnun

24Ikfiqelleghma yugusimkun elpesi apalluqlusi quyasteghllagaanga. Tawaten kayusighinguunga apeghiighnaluki Christ‑am ikfiqellghi yugusiminun. Ellngan yugusii ugpeqaagut yughaghvigmelnguut. 25Kiyaghneghem qepghaghtengllaqaqaanga ugpeqanun. Tagivaqaqaa una qepghaqaq kayusiitesqellusi, elpesinun liigikngwaaghesqelluki Kiyaghneghem akuzitangi. 26Sivunghani Kiyaghneghem qayvighsimangitaa una ipapilleq tamaghhaanun yugnun, iwernga maaten qayvightengngwaa ellmi yugminun. 27Kiyaghneghuuq nakmiilghii yugminun liisimakesqelluku sangwaa qayvightellghilkenni sivunghani. Nakmikegkaqaa liisimakesqelluku aangelleghllaga uum ipapillghem akulngitni Gentile‑et. Ipapilleq qayvightekaa unanguuq: Christ‑a kiyaghtengnguuq ilugpesini. Christ‑anguuq sighimavut kiyaghtesqelluta Kiyaghneghmi ellngan nighughqellghani. 28Enkaam ungipaqngwaaghput Christ‑a tamaghhaanun. Qamaglluku peghqinelleghqun, kelengasaaghaqaputlu apeghtughaqaputlu qamaglluki yuget. Tawaten piiqukut taginnaluki ataasikaghtiita yuget Kiyaghneghem nayuutngallghanun angtaniitkaaluki Christ‑akun. 29Taana pinaluku taakunginaghhaagneng ughleghiightunga atuqluku Christ‑am aghtughyaghqaanghillgha qepghalghii iknaqepiglluni ilumnni.

Currently Selected:

Colossians 1: ess

Highlight

Copy