Philippians 3

Yugulisighpigaq

1Ugpeqaalgutemni, naangniitkun ungipaasuwamsi, “Quyamaaqitek Ataneghqun!”

Qinuyagusigatunga ungipaanneqiggnemsi latatgun igaqegkamneng sivunghani, enkaam ilallequq paqniitelleghpesinun. 2Kelengalusi seghletun pikayugneng, tamaakuneng qikmineng, yuguut sagiqutilghiit kepfikesqelluki yugusit. 3Whangkutanguukut ugpeqani circumcise‑epiiwaaqani qayughllak manigughaqaghput Kiyaghneq Taghneghagkenkun, usuqaqaghputlu Christ Jesus. Neghyungigatukutlu Kiyaghneghmun piliitesqelluta whangkuta katam sallemteggun. 4Kina alngunak Kiyaghneghem piliisaghqaqsaqagu ellngan katam sallghakun, whanga piyaghqaayaghtunga. Yuget tawaten piyaghqaayaqata whanga wataqaaghaq pinayaghtunga ukut apalluqluki: 5Circumcise‑ekaqaatnga pingayuneng inglulek aghneq atughyamkun kingunganeng allgelleghma. Israel‑eghmiineng pinguunga, ramkenganeng Benjamin‑em. Hebrew‑piiguunga, angayuqagkallu Hebrew‑nguuk. Malighqutaqngaghllagtunga Jewish‑et Liilightuusiitnun, tamaaken apalluqluku Pharisee‑ngughtunga. 6Sagiqepigllunga amyuqetaatkegkaqanka ugpeqat. Qaatkengngwaaqaqanka Jews‑et Liilightuusiit repall anaggutelleghmun avutngitkaagunga. 7Iwernga tamaakut allgeghtekaqnikaqsaqenka iflamaanka apalluqluku Christ‑a. 8Ipa sangwaat qamaglluki iflamaanka apalluqluku megnunaghtulnga liitngwaallemneng Christ Jesus, Atanqa. Ellnga apalluqluku sangwaat qamaglluki egsimaanka. Esghaghanka mallastun ayuqluki allgeghteqeghnaluku Christ‑a, 9ilatngwaaghtungallu ellnganun. Ugpeqnaniimaaqa whangamneng pinighnaqelleq qaatkutellemkun Kiyaghneghem Liilightuusaanun. Yeghlegi liisimakaqa Kiyaghneghem pinightestaqaanga qayughllak ugpeqegkegka Christ‑a. Una pinilleq Kiyaghneghmeng ayuquq, yuget allgeghtaqaat ugpeqilleghmegteggun Christ‑ameng. 10Piyukelleghllakaqa, liinnaluku Christ‑a, nanghiighnalukullu aghtughyaghqaanghillgha unguvaghtellghan; ilannalungallu ikfiqellghanun, ellngatunllu lliighyaghqaalunga tuqullghani. 11Tawaten pikuma, Kiyaghneq sighimakaqa whangallu unguvaghtesqellunga tuqulleghmeng.

Ketanqustestun Ayuqunga Kenlemun Kaasuwhaaghyugllak

12Whaten pingunghitunga, “Christ‑atun lliighumaanga nalighmeng Christ‑atun kiyaghtaqunga quunpeng.” Iwernga pinaqellghaqa qamaglluku atuqngwaaqa Christ‑am piyukellghatun lliighnalunga atuqnalukullu pisqesullgha whangamnun. 13Ugpeqaalgutemni, sumeghtaghiigatunga kayaalqelghagtuumaniluku. Iwernga ataasiq piiqaqa, puyguluku sangwaa tunutemnilnguq sivutmiighnaqutkaqunga kaannaluku sangwaa sivumnilnguq. 14Enkaam taklaghruketun kilgaaqunguunga kayaalqiisiqnaluku akileghtuusaq, Kiyaghneghem tuqluutkaanun pamavek Christ Jesus‑kun. 15Tawaten sumeghtaghanghilkufsi, Kiyaghneghem liigikesnaaghii sumeghtaghallesi anaggutngalghiit. 16Una megnunapigtuq, nagneghutelteki kiyaghtaalleput maliglluku ipapighqelleq liitkaghput.

17Ugpeqaalgutemni, usputaqlunga maligtengnga. Esghapagluki ilangillu kiyaghlleghhiit whangamtun. 18Sivunghani uglaghngaan ungipaataataqaqamsi, maaten ungipaannaqlaataghamsi qunituumaghma. Uglaapigtut kiyaghlleghhiit anguyaguluteng Christ‑am tuqullghaneng qaquurakun. 19Suumqaqiit yugusimeng piyukellghit kiyang, Kiyaghneq avelghaghluku. Kaynguyugusighqaqsaqeteng aangaayugusiqaqiit. Sumeghtaghaatkaqaat nunamelngughhiinaq kiyaghtaalleghteng enkaam naafqellengyaghqaagut hell‑mi. 20Iwernga ugpeqani whangkuta qilagmiinguukut. Enkaam utaqangwaaghput yugulighista, Ataneq Jesus Christ‑a, ukigyaghqaq whangkunnun qilagmeng pamaken. 21Tagikumi allangughsaghqaqii kayaalnguut, tuqumun ayuqelghiit yugusiput. Unguvaghtekatun yugusimitun lliighsaghqaqii aghtughyaghqaanghilleghmikun. Taaggun ataasikun aghtughyaghqaanghilleghqun igleghusaghqaaghlleqaa sangwaa qamagtengngwaaghluku.

Currently Selected:

Philippians 3: ess

Highlight

Copy