Philippians 1

1Ukut latat Paul‑mengllu Timothy‑mengllu pinguut, qepghaghtekiinkung Christ Jesus‑em. Lataaqamsi qamagllusi Kiyaghneghem yugitni, yughaghvigem igleghutistengitni, deacon‑enillu Philippi‑melngughni, ugpeqilghiit Christ Jesus‑kun. 2Kiyaghneghem Atamta, Atanemtallu Jesus Christ‑am nanglleklisillu nekeggmellelguslisillu.

Paul‑em Yughaatkegkangi Ugpeqat Philippi‑melnguut

3Iqamsiqayugvikaqaqa Kiyaghneqa elpesineng sumeghtaghaatkennemsi. 4Yughaatkennemsi quyapigtaqunga, 5qayughllak neqamikaqa ungipaqilgusiqaqaghpesinga Pinilghiineng Ungipaneng. Kayusiqaqaghpesinga ugpeqiyuggaalleghpesineng Pinilghiineng Ungipaneng whavemun kenlanga. 6Liisimakngwaaghaqa Kiyaghneq piinlighikaq pinilghiimeng qepghaqameng ilugpesini, ellngan apeghiighlleqaa Christ Jesus uteghniqan. 7Itagnapigtuq whangamni sumeghtaghaatkennemsi tawaten qayughllak ilumnitaqusi. Ungipaqingulungallu ipapighqingulungallu Pinilghiit Ungipat ipanguniluki, maatenllu anusimingllaghvigmellunga, qamagllusi allgeghtengngwaaghsi Kiyaghneghem nangllegtallgha whangamnun maligullusi. 8Kiyaghneq liisimakistekaqa esghaghyupigtaqamsi, qayughllak qamagllusi piniqamsi Christ Jesus‑em piniqellghatun elpesi.

9Yughaatkaqamsi piniqighllagesqellusi, liisimallengataghiisqellusi, liigikellengataghiisqellusillu. 10Tawaten lliiqufsi kiyaghtelleghpesini sangwaa pinilleghpigaq nakmikumanginaghyagulleqaghsi. Taagken Christ‑a taginqigtekan pelungillequsillu anaggutellghillequsillu. 11Enkaam unguvallesi imighllequt ipapestaaq piniipiglleghhiimeng Jesus Christ‑anginaghhaam piitestekaaneng. Taagken yuget quulvaghlleqaatlu, usuqelleqaatlu Kiyaghneq.

Paul‑em Anusimingllallghan Ungipaqestii Pinilghiit Ungipat

12Ugpeqaalgutemni, elpesinun liisimakesugaqa anusimingllaghvigmetelleghma ipapestaaq uglalghii yuuk nagatestaa Pinilghiineng Ungipaneng. 13Tamaaken apalluqluku qamaglluteng umiilgem mangteghaan kelengakistengita liitaat anusimingllaghaagunga qayughllak qepghaghtekegkanganga Christ‑am. 14Anusimingllaghvigmetelleghma allulluteng ugpeqalghutet ugpeqiighataghaghtestii Ataneghqun. Enkaam wata tetugnanighataghaghtut ungipaqneghmegteggu Christ‑a.

15Ipanguuq ilangi ungipaqinguut Christ‑ameng qayughllak aqinakngukangatngallu aaghtiiraaghukangatngallu. Iwernga ilangi ungipaqinguut Christ‑ameng elqughulluteng. 16Ungipaqinguut qayughllak piniqegkangatnga. Liisimakegkangat Kiyaghneghem tagistekaqaanga whavek nekevghatesqelluki Pinilghiit Ungipat anguyamnneng. 17Iwernga ilangit ungipaqinguut Christ‑ameng ellnginaayugtem, ipapighqegpenateng. Sumeghmeggni tawaten pilleghmegteggun seghleliighqataghaghnilunga piitnga anusimingllaghvigmesimalunga. 18Itagnaghtuq, ungipaqillghat elqughutngayaghngaan nalighmeng sameng allaneng apallulguyaghngaan, ungipaqillghita quyastaqaanga, qayughllak ungipaqinguut Christ‑ameng uglapiglleghiinun.

19Aa‑a quyangallequnga, qayughllak liisimakaqa aanyaghqaagunga anusimingllaghvigmeng yughaatkelleghpesigun, kayusillghakunllu Jesus Christ‑am Taghneghaan. 20Piyukelleghllakallu, sighimakelleghllakallu esgha taana, kayngusaghaatefqaama pinalunga Christ‑amun. Itupill kiyaghsugaqunga ilutulunga wataqaaghaq maaten anusimingllaghvigmetellemni. Enkaam Christ‑a quulvallengellequq unguvaghngaaghma, nalighmeng tuquyaghngaaghma. 21Whangamni unguvalleq Christ‑anguuq, enkaam tuqulleq allgeghutaghallghuuq. 22Iwernga unguvanaqngukuma qepghaghataghaghllequnga Christ‑amun. Nalikek nakmikelleghqaqa nallukaqa, unguvalleq nalighmeng tuqulleq. 23Kukriqnguunga naligkeneng nakmiilleghqamneng. Aghulaqsupigtaqsaghtunga Christ‑amennalunga, qayughllak pinighataghaghyaghqaaguq taana. 24Iwernga megnunaghataghaghtuq elpesi apalluqlusi unguvanguunga. 25Ipapighqutkumaaqa taana, liisimakaqa wiin unguvanaqnguunga. Elpesininnaqnguunga kayusiinnalusi nagusqellusi, quyamallengesqellusi ugpelleghpesigun. 26Elpesinun pikuma, usuqataghaghlleqaghsi Christ Jesus whanga apalluqlunga.

27Sayaghngaatnga nagneghuteki kiyaghtaallesi Christ‑am apeghtullghatun Pinilghiitgun Ungipatgun. Enkaam esghaghyaghtuqumsi, nalighmeng aviiteghngaaghma nagaququmsi, liigikelleqaqa ataasistun pilleghsi. Liigikelleqaqallu qerngaghpesi nekevghannaqutkellesi Pinilghiit Ungipat anguyagpesineng. 28Alikegpenaki anguyasi, quunpeng ilutullusi. Enkaam tawaten pilleghpesi ipapighqelleqaat ellngit kayaalqiinaanghitut. Elpesi kayaalqiillequsi qayughllak Kiyaghneghuuq kayaalqiistilghii elpesineng. 29Elpesinun qepghaasaqlegughtestekaqaa Christ‑a, ugpeqnginaghpenaan, ikfiqelgusiqesillu. 30Pilluwalgusightengnga. Sivunghani esghapakaqaghpesinga piyaqliilghiinga, nagaquqaqasillu piyaqliillghenka maaten. Elpesillu tamaakut ataasit piyaqliighutkennaqngwaasi.

Currently Selected:

Philippians 1: ess

Highlight

Copy