Philemon 1

1Ukut latat Paul‑meng pinguut, anusimingllaghaq Christ Jesus apalluqluku, ugpeqaalgutemnnengllu Timothy‑meng.

Piniqegkamtegnun qepghalgutemtegnun Philemon‑mun, 2ugpeqanunllu qerngughutkayugnun mangteghaghpeni, Apphia‑munllu nayamnnun Christ‑akun, Archippus‑munllu pilluwalgutemtegnun.

3Kiyaghneghem Atamta, Atanemtallu Jesus Christ‑am nanglleklisillu, nekeggmellelguslisillu.

Philemon‑em Piniqillghallu Ugpeqillghallu

4Philemon‑mi, quunpeng iqamsiqayugvikaqaqa Kiyaghneqa yughaatkennemken, 5qayughllak nagaqughaqaqa piniqellghen tamaghhiitnun Kiyaghneghem yugitnun, ugpeqillghenllu Ataneghqun Jesus‑kun. 6Yughaatkaqamken ungipaatesqelluki ilaten ugpeqillemnneng Christ‑akun. Tawaten pikuvek liigikataghaghlleqaten qamaglluki quyastellghet allgeghtekaput Christ‑akun. 7Ugpeqaalgutemni, piniqilleghpek Kiyaghneghem yuganun quyasteghllagaangallu kayemaangallu! Piniqelleghpek quyastii Kiyaghneghem yugi.

Paul‑em Aapuskanga Onesimus

8Tetugnaanghitunga qeleghnaluten Christ‑akun atuqesqelluku elqughutngalghii, iwernga tawaten pinaanghitunga. 9Piniqutelleghpung apalluqluku aapfikamken atuqesqelluku elqughutngalghii. Whanga, Paul, nanevgaagunga, anusimingllaghaagungallu apalluqluku Christ Jesus. 10Whanganguuq aaputilghii ighnemnun, Onesimus‑mun. Anusimingllaghvigmi ataliitkaqaanga Christ‑akun. 11Sivunghani sasiinghisaghtuq elpenun, iwernga whaa kayutngughtepigsimaaq whangkutegnun.

12Onesimus elpenun aglaghtesnaqaqa, leganqun iluka maligunnaquq ellngakun. 13Whangamnitesuguyaghaqa kayusiitesqellunga anusimingllaghvigmi, katam elpek kayusiinnayaqevnga maansaquvek. Liisimakegkenqun anusimingllaghaalghiinga Pinilghiit Ungipat apalluqluki. 14Iwernga whangamnitesnaanghitaqa wetkuqun sivukluten aaptaghlluten. Itagnaqumakuvgu whangamnitesqelluku taawa elpek piyukelqelleqan, qayughllak qelghunghitamken tawaten pisqelluten.

15Entaqun Onesimus iqitaghtekaaguq elpenisaghqaaluni quunperugllak. 16Ellnga paninang qepghaghtelaaghuuq. Iwernga qepghaghtelaaghumalleghmineng angliighataghaamaaq qayughllak piniqegkaaghsimaaq ugpeqaalguta. Piniqepigtaqa, iwernga elpek piniqataghaghlleqan qepghaghtelaaghuluku, ugpeqaalgutngulukullu Ataneghqun.

17Enkaangam tugukliimakuvnga qepghalgutngulunga, tuguklighnaken Onesimus whangangusluku. 18Sameng seghletun pimakangaten nalighmeng asengemakangaten, asengenga whanga llivikelleqaqa. 19Whaa, whanga katam iiggemneng igaghtunga whaten: whanga, Paul, llivikelleqamken. Iwernga puygugpenaan unguvallghen asengeluku ayuqan whangamnun. 20Aa‑a, ugpeqaalgutemni, aapfikamken Ataneghqun tugukliisqelluku Onesimus. Tawaten pikuvek quyasleqaghpenga Christ‑akun! 21Lataamken liisimakngwaaghluku qaatkesaghqaqan qelghutkaqa elpenun, repall qaayghulluku pillequten. 22Atwhay, nekaghqangllaataghhnakevnga qayughllak sighimanguunga Kiyaghneghem kiimsighlleqii yughallesi, enkaam elpesinun pillequnga.

Paul‑em Taaqniitangi

23Epaphras‑emnguq piniqiisi; anusimingllaghalgutkaqa apalluqluku Christ Jesus. 24Qepghalgutmallu Mark‑enkut, Aristarchus‑enkut, Demas‑enkut, Luke‑enkut ellngitallunguq piniqiisi.

25Piniqellgha Atanghem Jesus Christ‑am tamaghhaghpesinilli.

Currently Selected:

Philemon 1: ess

Highlight

Copy