Titus 3
3
Ugpeqat Kiyaghtaalleghqaat
1Neqangughtiki ugpeqat malighqutaqesqelluki kavemem igleghutistengitnun, umiilwaaghnunllu. Qaatkutngayaghqaagut, apeghiighngayaghqaagut tamaghhaanun aneghneghqilleghnun. 2Ungipaatiki kina alngunak seghletun akuzitkefqaan, aaghtiiraafqaan pisqelluku. Itupill nekeggmetulluki, qusevegngatulluki pisqelluki tamanganun. 3Whangkutallu sivunghani nalluyaghtukut, qaatkusigasaghtukut, puughtengngayaghtukutlu. Yugusimta piyukellgha ayghiilluku, itagnaghqusiqluku ayuqsaghaghput. Unguvalleput kiyaghusiqsaghaput seghlepestaaghmun, aqinalleghmunllu. Yuget ugumiksaghiinkut, ugumikusaghtukutlu. 4Iwernga Kiyaghneghem Yugulighistemta liisimakestekaqiinkut nangllegtalleghmineng, piniqelleghminengllu. 5Yugulikaqiinkut apalluqluku nangllegtalleni, nakaan aneghneghqillemteggun. Agleghnalghiignekun Taghneghagnekun ughvuqaqii seghleghqelleput, nutaghamengllu unguvallelitkaqiinkut. 6Kiyaghneghem kuuvegkaqaak Agleghnalghiik Taghneghak kemnapigllukek whangkunnun Jesus Christ‑akun, Yugulighistemteggun. 7Kiyaghneq tawaten pikaaguq piniqilleghmikun nallghusaghnaluta elqughutngalleghminun. Enkaam sighimallelguukut whangkuta piliinnaluku kenlengilnguq unguvalleq. 8Tamaakut pillghet ipanguut. Tamaakut apeghtuusat elpenun sagiqutesqesuganka yugnun qaatkesqelluki. Taagken ugpellelget Kiyaghneghqun aneghneghqipestaaghllequt. Tamaakut aneghneghqillghet pinilghiinguutlu kayutnguutlu tamanganun.
9Iwernga elpek iqitngaluten tamaakuneng temngi qaniqullghiineng, aaghtiiraaghullghiineng sivuneghmeng aatghitneng, Liilightuusanengllu. Tamaana sasiinghituq, kayutngunaanghituq kitumun alngunak. 10Kina alngunak aafquutestilghii kelengasaaghnaken ataasimeng nalighmeng alghighluku. Naganneghilkan peggnaken. 11Liisimakan tawatelnguum yugem ighsakegkaqaa ipapilleq, seghleghqestenguuqlu. Enkaam ellngan katam seghleghqellghan nanqigsaghqaaghtesleqaa aghyuughyaghqaaluku.
Taaqniitet Apeghtughallghet
12Aglaghtestekumkun Artemas nalighmeng Tychicus elpenun, Nicopolis‑ennaqeghllaggaaten, qayughllak uksughsugaqunga tamaani. 13Kayusighnaqeghllagnakegken lawyer‑a Zenas, Apollos‑lu igleghalleghqagkenun. Wataghllak yataaghqunnakegken kelqesaghqameng sameng aklukegkagkeneng. 14Ugpeqaalgutemta peghqigsaatkellitgu aneghneghqutkaghqaq enkaam kayusighyaqlegughhnakangit aklukegkapilget. Temngi kiyaghtaafqaameng pilit. 15Qamaglluteng whangamnilnguut piniqiisinguq. Piniqelleghput aapqaghnaken ugpeqaalgutemnnun piniqistemnnun. Kiyaghneghem quyaslisi qamagllusi.
Currently Selected:
Titus 3: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
