Hebrews 1
1
Kiyaghneghem Akuzitangi Ighneghmikun
1Sivunghani agani uglaghlukullu, allaaghhiinaalukullu Kiyaghneghem aleghquqaqii sivuneput uuknaliqistetgun. 2Iwernga ukuni kingulighni aghneghni aleghquqaqiinkut Ighneghmikun. Ellngakun Kiyaghneq nunangllaqaaguq, nakmikegkaqaallu piliitesqelluku sangwaa tamaghhaan. 3Ighneghem kuukgutaqaa Kiyaghneghem nighughqellgha, Kiyaghneghtungwaaqlu ayuquq. Sangwaat qamaglluki nagneghastengngwii tawatelluki aghtughyaghqaanghilnguutgun akuzitmikun. Ighneghem tuunegkaqaa ellmi katam unguvalleni ukmangighnaluta tamaghhaaneng seghleghqellemnneng. Apeghiighyamigu tawaten pilleni, qilagmi aqumegkaaguq aghenqigneghakun Kiyaghneghem, aghtughyaghqaanghitelleghpigaam.
Ighneq Aangataghaghtuq Yaqulegneng
4Kiyaghneghem quliightekaqaa Ighneq yaqulegneng, atelitkaqaallu ingyaatngalghiimeng aatghitneng. 5Tawaten pikaqaa qayughllak Kiyaghneghem pimangitii nalighhiiniit yaqulget whaten,
“Ighneqamken;
aghneghmi Ataliitaghpenga.”
Kiyaghneghemllu pimangitii nalighhiiniit yaqulget whaten,
“Atakelleqaanga enkaam ellnga Ighneqelleqaqa.”
6Kiyaghneghem kayagsaghqaaghsamigu Ighneqsuwhaani nunamun, whatenllu pikaaguq,
“Yeqay qamaglluteng Kiyaghneghem yaqulgita manigughlitgu.”
7Whatenllu pikaaguq yaqulegneng,
“Kiyaghneghem yaquleni anuqestun lliightestekaqii.
Qepghaghtengi kumaghulghiistun kenghestun lliightestekaqii.”
8Iwernga Kiyaghneq Ighneghmineng whaten pikaaguq,
“Kaay Kiyaghneq, aqumutagken kenlengisaghqaaguk quunperugllak!
Igleghulleqan ataneghpagullghen elqughutngallelighluku.
9Piniqan elqughutngalleq, ugumikan anaggutngalleq.
Tamaaken apalluqluku Kiyaghneq,
Kiyaghneghpek nakmikumaatenllu quulvaamaatenllu pakiggulluku ilagpeneng.
Enkaangam quyastighllagtuq anoint‑eluten mesiighmeng.”
10Whatenllu pikaaguq,
“Elpek, Ataneq, piinlighyuggaaghmi nunangllaqaaguten,
iiggegpenengllu qilagangllaqaaguten.
11Qamaglluteng aviighusaghqaagut,
iwernga elpek kiyaghsaghqaaguten.
Aghyughyaghqaagut aatkastun.
12Imegteghlleqaten qaasligetun,
simighlleqatenllu aatkastun.
Iwernga elpek quunpeng almesiqelleqaaten,
aghyughyaghqaanghitutenllu.”
13Kiyaghneghem pimangitngwaaghii nalighhiiniit yaquleni whaten:
“Aqumi whagun aghenqignemkun,
kenlanga anguyagten tunemaliitestellemnun itegaghpek asinganun.”
14Sangaawanꞌngam yaqulget? Qamaglluteng taghneghaagut qepghaatilghiit Kiyaghneghmeng, kayagtaqiillu kayusiitesqelluki tamaakut yugulillengyaghqat.
Currently Selected:
Hebrews 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
