James 2

Piniqluki Yulgutesi

1Ugpeqaalgutemni, ugpeqingutegpesineng Atanemnneng Jesus Christ‑ameng, Atanghaneng nighughqellghem sumeghtaghaatkegpenaki ilangi yugem megnunaghataghaghniluki ilameggneng. 2Maalghuk yugek iteghyaqayek qerngughutfigpesinun, aallgha aarraghluni, gold‑meng alangqughiitightughluni, aallgha aatkalukaghlluni, 3taana aarraghngalghii yuuk pikufsigu, “Whagun aqumi pinillghakun aqumutam,” naqam aklumalghii yuuk pikufsigu, “Tawani nekevgha,” nalighmeng, “Aqumi itegama saaghwakun,” 4tawaten pikufsi pakiggulleqasi ilangi yuget enkaam seghleghqellequsi sumeghtaghalleghpesigun.

5Piniqegkamni ugpeqaalgutemni, nagataghtekqun. Kiyaghneghem nakmikegkaqii aklumaalghiit nunami whani ugpeqilleghtusqelluki. Nakmikegkaqii tuguklightenguluki Ataneghpagulleghmineng, akequsaqegkamineng yugminun, piniqingalghiinun ellmineng. 6Iwernga elpesi aklumaalghiit yuget ukaliistaqasi. Liisimakasi aklungilnguut piyaqliighqaqiisi, aglaataqlusi nanqigtivigmun. 7Ellnginguut seghletun akuzitkilghiit quulvaghngalghiimeng aatghaneng Jesus‑em, ateq tuunegkaq elpesinun qayughllak ellngan pikegkangisi.

8Kiyaghneghem Ataneghpagullghan Liilightusaa unaanguq: “Piniqluku yulguten piniqelleghpetun elpeneng katam.” Qaatqegkufsigu taana Liilightuusaq, taawa pinitun piisi. 9Iwernga pakigguskufsiki ilangi yuget seghleghqellequsi, qaatkennaanghitaghsillu taana Liilightuusaq. 10Kitum qaatkesaghngaaghmiki qamaglluki Kiyaghneghem Liilightuusii, ataasiq qaatkenghilkumigu, qamaglluki qaatkengngunghitii. 11Kiyaghneq pikaaguq, “Gelgaghniighpenang.” Whatenllu pikaaguq, “Yugtaghpenang.” Gelgaghniinghisaghngaaghpek yugtaquvek taawa qaatkengngunghitaten Kiyaghneghem Liilightuusii. 12Akuzilleghpesigun, salleghpesigun piraamsilusi qayughllak elpesinguusi nanqigsaghqat megnunalleghpigaghqun Liilightuusakun. Taam Liilightuusam itemutkaqiisi atuqesqelluku Kiyaghneghem piyukellgha elpesinun. 13Kiyaghneghem nanqigtekumisi nangllegyagunnaanghitiisi, nangllegyagunneghilkufsiki yulgutesi. Iwernga nangllekegkufsiki yulgutesi Kiyaghneghem nangllegyagulleqiisi.

Ugpeqillghenkuk Aneghneghqillghenkuk

14Ugpeqaalgutemni, kina whaten pighngaaghmi, “Ugpeqillelguunga,” iwernga taam ugpeqillghan yugulinaanghitaa atuqenghilkumigu ugpeqilleni aneghneghqilleghmikun. Sasiilleqangam ugpeqillgha aneghneghqillngunani? 15Sanayaghetsi ugpeqaalgutsi aatkiisagyaqanllu, neqangisagyaqanllu? 16Tuunegpenaan aklukegkaaneng temngi whaten pikufsigu, “Kiyaghneghem quyasnaaghaaten; sunanguq neghyaghqangillu aatkangillu maqalghiimeng,” sasiilleqanꞌngam akuzitesi aneghneghqillngunateng? 17Ugpeqilleqlu tawatetuq, aneghneghqilleghqun atuqenghilkumi sasiinghituq.

18Kina pillequq, “Elpek ugpeqillelguuten, whanga aneghneghqellelguunga.” Kelguvikinga ugpeqilleghpeneng aneghneghqillghilngughmeng, kelguvikelleqamken ugpeqillemneng aneghneghqillemkun. 19Ugpeqan ataasighhaatanga Kiyaghneq. Taana pinightuq! Tughneghaatlu ugpeqaqaat taana enkaangam alingruughaqut, ungelegtaqut qayughllak liisimakegkangat Kiyaghneghem nanqigsaghqaqegkangi. 20Uyuq nalluuqaq yuuk, paninang liigikigasiguu ugpeqilleq aneghneghqillngunani sasiinghitulanga? 21Sangan Kiyaghneghem tugukliqaqagu sivuneghput Abraham seghleghqumangilngughestun? Tugukliqaqaa Abraham qayughllak ugpeqilleni atuqegkaqaa aneghneghqelleghmikun aghqutkaqngamigu ighneni Isaac aghqefigegnekun. 22Liigiksiguu? Ugpeqilleqlu aneghneghqilleqlu qerngaagmek qepghaqayuguuk. Tamaaken apalluqluku Abraham‑em ugpeqillgha iighwightekaqaa aneghneghqelleghqun. 23Enkaam Akuzitet Igaqegkat whaten pillghit Abraham‑emeng apeghiiqaagut, “Abraham‑em ugpeqegkaqegkanga Kiyaghneq. Tamaaken apalluqluku Kiyaghneghem tugukliqaqegkanga Abraham seghleghqumangilngughestun.” Enkaam Kiyaghneghem Abraham ilakumtaaqniluku pikaqaa. 24Kiyaghneghem tuguklighaqaa yuuk aneghneghqillghakunllu ugpeqillghakunllu; tugukliigataa ugpeqilleraaghinaakun.

25Rahab‑llu usputaaguq. Akikikayuguyalghii yugusimineng. Iwernga Kiyaghneghem tugukliqaqegkanga seghleghqumangilngughestun apalluqluku kayusighillgha. Joshua‑m kayagtekaqegkek maalghuk yugek aksaqluku nunangat yuvghiighesqelluku. Yuget ivaghyatkek, Rahab‑em allakun tuumkun anagtestekakek.

26Enkaangam yugusiq taghneghangunani tuqungaaq, ugpeqilleqlu aneghneghqillngunani tuqungaaq.

Currently Selected:

James 2: ess

Highlight

Copy