Hebrews 9

Maniguutelleq Nunamelngughmi Tabernacle‑mi

1Akequsaqsuwhaaghmini Kiyaghneghem igaqegkaqii qelghusat naten maniguutelleghqameng ellminun, natenllu nekeftelleghqaa sanctuary nunami. 2Taana sanctuary yuget ulimakaat tiintanguftuq maalghugegneng nelek. Sivuliim nem aatqeftaa Agleghnalghii Na. Ilunganiteftut kenelghutalghutak, tipelek neqekrangllalgek tuunegkameng Kiyaghneghmun. 3Awalighneghani tuunglighhaan safkaaghutem ilanga nem atilqelghii Agleghnalleghpigaq Na. 4Ilungani taawa gold‑ek aghqefigek paneghreghaasik incense‑mun. Taawallu salngagek qaspeghiqak gold‑meng, ateghqek ark‑ek, neqanguusighqak Kiyaghneghem akequsaanun. Ark‑em imaqeftii gold‑ek aqimleghutak manna‑meng imalgek, Aaron‑em ayaviigha piitqughvikegkaq, maalghuklu lliivneqegtak uyghagek igaqughvikngalghiik Kiyaghneghem qelghusaaneng. 5Quulngani ark‑em taawa gold‑ek cherubim‑ek, yaqghwik taghneghangullghiik mercy seat‑kun. Iwernga uumi pilleghmi akuzitkepagningitaput tamaakut.

6Sangwaa tamaghhaan tiintanilnguq apeghiighluku, taagken aghhutanga tamaghhaan priest‑et iitghaqut sivulighmun nemun qepghaghnaluteng. 7Iwernga high priest‑nginaghhaq iteghyaghqaaguq tuunglighhaanun nenganun tiintam. Tawaten piiquq ataasighhaghmeng ayumiqulleghmi. Iteneghmini tawavek nemun iiwleng kelqesaghqaaguq aawaneng aghqutkegkam teghikusam. Tuuniiquq aawmeng Kiyaghneghmun ellmi seghleghqelleghminun, yugetlu seghleghqellghitnun. Taana aawk seghleghqellghitnun pinguuq nallukluteng pikiitnun. 8Tamaakutgun Agleghnalghiim Taghnegham liigikestiinkut iteghvik Agleghnalleghpigaghmun Nemun salin qelpeghsigalnguq tabernacle‑a atuqnguluku. 9Taakut usputaagut maatemun. Liigikestiinkut tunusatlu aghqutkegkatlu teghikusat nallghusaghpagningitaat maniguutistem sumeghnegha. 10Tamaakut tunusatlu aghqutetlu atuqegkaagut qaatkesaghqaaluki qelghusat neqnengllu, meghyaghqanengllu, pelungighsalleghqanengllu yugusiitneng ayuqelghiit. Tamaakut qelghusat yugusighhiinaghmun ayuqut. Qaatkesaghqaagut kenlanga Kiyaghneghem akequsaghraghaa atuughtellghanun.

11Christ‑a tagiiqngami High Priest‑nguluni, tagitkaqii qamaglluki pinilghiit quyastillghet whaa maaten whaanlenguut. Iitqaqaa tabernacle‑a qilagmelnguq, megnunaghataghalghiillu pinighataghalghiillu nunamelngughmeng tabernacle‑meng. Qilagmelnguq tabernacle‑a yuget ulimaaqenghitaat enkaam nunam pikenghitaa. 12Taagken Christ‑a iitqaaguq ataasimeng quunperugllak Agleghnalleghpigaghmun Nemun seghleghqellemnneng itemunnaluta kenlengunaan. Tawaten pikaaguq tuunelleghmikun ellmi katam aawni, atughpenaki aawit goat‑etlu, kaawaghaatlu. 13Liightuusat qelqaqiit priest‑enun sivillagtiisqelluki yuget aawitneng goat‑et, bull‑et, panellghanengllu kaawaghaam. Tawaten piiqut pelungighsaghnaluki yuget yugusiit tuguklighyugnaghtesqelluki Kiyaghneghmun. 14Tamaakut pelungighiyaqlegukata yuget yugusiitneng, taawa Christ‑am aawan wata pilleqii. Pelungighlleqii umyugasi satngunghilngughneng ugpeqilleghneng elpesinun qepghaatesqelluku unguvalghii Kiyaghneq. Kenlengilnguugnekun Taghneghagnekun, Christ‑a seghleghqellghilnguq, tuunegkaaguq ellmineng katam Kiyaghneghmun aghqutnguluni.

15Enkaam Christ‑am tagitkaqaa Kiyaghneghem akequsaghraghaa yugnun tuqluqaanun. Christ‑a tawaten pikaaguq ellngitnun allgeghtesqelluku kenlengilnguq pagitaq Kiyaghneghem akequsaqegkaa ellngitnun. Allgeghlleqiit pagitat qayughllak Christ‑am tuqumatkegkaqegkangi. Enkaam yuget kiyaghtekat akequsaqsuwhaaghmi, itemumaat seghleghqelleghmeggneng.

16Igakun yugem igaqughlleqii saghyani kitumun pagisaghqaaniluki tuqukumi. Pagitiyaghqam allgeghhnaanghitii pagisaghqani wetku kitum ipapighqegkagu yuuk tuqumatanga. 17Taam yugem igaquqii pitngunaanghitut salin kiyaghtengnguluku. Igaquqii pitngughllequt kingunganeng tuqukan. 18Tamaaken apalluqluku talwa akequsaqsuwhaaq pitngumangituq aawngunani. 19Moses‑em aapqaqii yugnun qamaglluki qelghusat Liightuusanilnguut. Taagken kaawaghaatlu, goat‑etlu aawitneng tugulluni meghmeng akumegkaa. Tugulluni kavilngughmeng wool‑meng, avayaanengllu hyssop‑em neptekii aawmun. Taagken sivillagtaqii igat Liilightuusalghutat, qamagllukillu yuget. 20Pikii, “Unanguuq aawk apeghiighilghii Kiyaghneghem akequsaaneng qelghuskanga elpesinun qaatkesqelluku.” 21Tawateghpigaq Moses‑em sivillagtaqaqii aawmeng tabernacle‑a, qamagllukillu saghyat atuqegkat maniguutelleghmun. 22Ipapestaaq Liilightuusat pillghitni, qamagtevzigluni sangwaa tamaghhaghmi pelungiqaaguq aawkun. Kiyaghneghem seghevunnaanghitii yuget seghleghqellghit wetkuqun aawk maaqegkan.

Christ‑am Aghqutkellghan Seghleghqellghet Iqitkaqii

23Nunamelnguq tabernacle‑a, ilunganilnguutlu saghyat qilagmelngughestun ayuqut. Tamaakut nunamelnguut saghyat pelungighyaghqaagut aawitgun teghikusat. Iwernga qilagmelnguut saghyapiget pelungighyaghqaagut aghqutetgun pinighataghalghiit nunami aghqutkegkaneng. 24Christ‑a iitghumangituq Agleghnalleghpigaghmun Nemun yuget ulimaaghitnun. Taana ipapigtun qilagmelngughtun ayuquq. Yeghlegi qilagmun iitqaaguq enkaam maaten Kiyaghneghmetuq High Priest‑nguluni whangkunnun. 25Christ‑a nunam high priest‑ngatun ayuqenghituq. Ataasighhaghmeng ayumiqunghani high priest‑a iitghaquq Agleghnalleghpigaghmun Nemun kelqelluni aawmeng ellmi pikenghilkemineng. Iwernga Christ‑a aghqutkumangituq ellmineng uteghpagtiinaq, 26qayughllak ikfiqnayaghtuq ugliinaghluku ima ulimallghaneng nunam. Iwernga ukuni kingulighni aghneghni tagikaaguq ataasimeng quunperugllak iqinnaluki seghleghqellghet aghqutkelleghmikun ellmineng. 27Tamaghaghhmi tuquyaghqaalghii ataasighhaghmeng, enkaam taam kingunganeng Kiyaghneghem nanqiglleqii. 28Tawateghpigaq ataasighhaghmeng Christ‑a aghqutkegkaaguq ellmineng iqinnaluki seghleghqellghit yulghutet. Iwernga alla tagikumi, aghqutkesaghtuunghituq ellmineng seghleghqelleghmun. Yeghlegi yuguliyaghtughlleqii qelanqilghiit ellmineng.

Currently Selected:

Hebrews 9: ess

Highlight

Copy