Hebrews 10

1Liilightuusat taghneghangullghiistun ayuqut pinilghiinun kaasaghqanun, iwernga Liilightuusat taakughpigaanghitut. Liilightuusat qelellghistun Jews‑et aghqerraaghumanginaghaqut ayumiitanga tamaghhaan. Iwernga tamaakut aghqerraallghet ukmangighwaaghpagningitiit seghleghqellghitneng manigughyaghtuneghmegteggu Kiyaghneq. 2Yuget maniguutestengi Kiyaghneghem ukmangipiigumakumeng seghleghqelleghmeggneng, seghleghninanighnayaghtut. Enkaam aghqutkinanighnayaghtut. 3Iwernga ayumiitanga tamaghhaan, tamaakut aghqerraallghet neqangughtestaqiit yuget seghleghqellghitneng, 4qayughllak aawita bull‑etlu goat‑etlu seghleghqellghighpagningitiit. 5Tamaakut apalluqluki Christ‑a tagiiqngami nunamun pikaqaa Kiyaghneq:

“Aghquteyugumangitutenllu tunusaghyugumangitutenllu,

iwernga yataaghqegkaqan yugusiq whangamnun.

6Efququmangitaten teghikusat iinguniita paneghtekat aghqefigegni nalighmeng aghqutet seghleghqelleghnun.

7Taagken whanga piiqa,

‘Ii‑i Kiyaghneq, tagiinga piyukelleghpetun pinalunga,

katam tawaten igaquqaqegkangatnga Akuzitni Igaqegkani.’”

8Christ‑a pikaalghii, “Aghquteyugumangitutenllu tunusaghyugumangitutenllu. Aghquteyugumangituten teghikusaneng iingunaghmeng paneghtekaneng aghqefigegni nalighmeng aghqutneng seghleghqelleghnun. Tamaakut efqughsimangitaaten.” Christ‑a tawaten pikaaguq Liilightuusat qelghutkaqeghngaatki tamaakut aghqutet pisqelluki. 9Taagken pikaaguq, “Ii‑i, tagiinga piyukelleghpetun pinalunga.” Enkaam Kiyaghneghem qamaglluki iqiqughluki aghquteluget nengitgun nekegtekaqaa Christ‑a aghqutnguluku. 10Jesus Christ‑am qaatkesaqminigu Kiyaghneghem piyukellgha, pelungiqaqiinkut seghleghqellemnneng tuunelleghmikun yugusini ataasighhaghmeng quunperugllak.

11Aghhutanga tamaghhaan, tamaghhaghmeng priest‑et nekevghaghmeng qepghaqateng piiqiit. Uteghpagtiinaq tuuniiqut tawatelkullghiineng aghqutneng. Tawalliima tamaakut aghqutet seghleghqellghighiyaghqaghhaanghitut. 12Iwernga Christ‑am tuunegkaqaa ataasiq aghqun seghleghqelleghnun quunperugllagmun. Taagken aqumegkaq aghenqigneghakun Kiyaghneghem. 13Tawani Christ‑a utaqiigaquq kenlanga Kiyaghneghem nekegtelleghqaanun anguyagi itegaan asinganun. 14Taaggun ataasikun aghqutkelleghqun, Christ‑am quunperugllak naamigtestekaqii pelungighsaqat seghleghqelleghmeggneng.

15Agleghnalghiimllu Taghnegham ungipaatiinkut tamaakuneng. Sivukluni whaten pikaaguq,

16“Unanguuq akequsaqa yumnun,

kingungitneng tamaakut aghneghet, piiq Ataneq,

Liilightuusanka kanaghlleqanka ilungitnun,

igaqelleqankallu umyuwiitgun.”

17Taagken piiq,

“Allamengllu neqamiknaanghitanka seghleghqellghit, seghletunllu pillghit.”

18Enkaam Kiyaghneghem seghevuskaki seghleghqellghit, aghqutet atuqsaghqaananighllequt seghleghqelleghnun.

Tughaaghelta Kiyaghneghmun

19Tamaaken apalluqluku, ugpeqaalgutemni, alingellngunaamta itelleghqangukut Agleghnalleghpigaghmun aawakun Jesus‑em. 20Qelpeghusimiinkutlu tumeghraghaghmeng unguvalleghmun safkaaghutkun; taana safkaaghun yugusiqaa. 21Priest‑elegllaaguukutlu igleghutilghii Kiyaghneghem mangteghaaneng. 22Tamaakut apalluqluki tughaaghelteggu Kiyaghneq ipapighqelluta, neghyukngwaaghluku. Tawaten pilleghqangukut qayughllak umyugalluput sivillagtaqaagut Christ‑am aawaneng ukmangiightesqelluki, yugusiputlu ughvughqegkaagut pelungilngughqun meghqun. 23Yeqay ataasiighmelluta sighimalleghmetekestaalta whangkunnun piknikamnnun, qayughllak ugpeqaghput Kiyaghneq ataasiighmetuq enkaam piyaghqaqii akequsani. 24Yeqay sumeghtaghaalta naten qiilngumighusaghqaaluta piniqsaghqaaluki ilat, pinitunllu piyaghqaaluta. 25Yeqay taaqefqaamta qerngughunneghmeng pilta manigughnaluku Kiyaghneq, ilangita piiqellghistun. Yeghlegi qerngughusimanginaalta kayemutunnaluta. Wata kayemusimanginaalta qayughllak Atanghem Aghnegha tughaalghii.

26Seghleghqesugaataqumta kingunganeng liilluku ipapilleq, taawa aghqutkaghqiituq iqitusighqameng tamaavek seghleghqelleghnun. 27Tamaakut tawaten pilghiit alingruughmeng utaqiillequt Kiyaghneghem nanqigtillghaneng. Atuqelleqaak uguqnaghllagek kenghek naafqennaluki tamaakut kipullginaalghiit ellmineng. 28Maalghuk nalighmeng pingayut liisimakistet aapqatgu yuuk qaatkusimanginniluku Moses‑em Liilightuusaanun, nanqigtistem nangllekegpenaan tuqutesleqaa. 29Sumeghtaghaatkaghteggu natenmi angkaslugan Kiyaghneghem aghyuughlleqagu yuuk tutmaasghaqiiqelghii Ighneghaneng Kiyaghneghem, piiqelghii satngunghinniluku aawk apeghiighutkaq akequsaghraghaghmeng (qaywa Kiyaghneghem ukmangiisiqegkaqeghngaagu seghleghqellghanun), seghlequughiiqelghiillu nangllegtalghiignun Tagneghagnun. 30Liisimakaghput Kiyaghneq; ellngangulghii whaten pikaq, “Whanganguuq aghyuughiyaghqaq, akisaghqaqanka seghletun pillghit.” Whatenllu pikaaguq, “Atanghem nanqigsaghqaqii ellmi yuni.” 31Tatamaataghnapigtuq kina alngunak iigganisaghqaq unguvalghiim Kiyaghneghem Nanqigtillghem Aghneghani!

32Neqamikegkesi tamaakut aghneghet sivunghani liisuwhaaghaqngafsigu ipapilleq Christ‑ameng ayuqelghii. Aghuliitkaagusi ataasiighmellusi qaywa ikfiqeghllaghngaaghpesi. 33Ilangakun yugtuqami yuget seghletun akuzitkaqiisillu amyuqetaatkaqiisillu. Ilangani nekevghalgusighaqasi tamaakut amyuqetaatkesilghiit. 34Nangllekaqasi anusimingllaghvigmelnguut. Talwa quyangaaqusi yuget tugulanghatki saghyasi qayughllak liisimakaghsi paninang salguusi pinighataghalghiimeng quunpekaghqameng. 35Enkaangam iilqayugpenasi qayughllak ilutumanginaqufsi allgeghullequsi akileghtuusaghllagmeng. 36Aklukngwaaghsi nuqenneghtulleq atuqsaghqaaluku Kiyaghneghem piyukellgha. Taagken allgeghlleqasi akequsaqegkii. 37Katam igaqngalghii Akuzitni Igaqegkani whaten,

“Qantaghaqun taana tagiyaghqaq kaallequq; kimaawinaanghituq.

38Elqughutngalghiit yugenka kiyaghllequt ugpeqilleghqun.

Iwernga kitum alngunak pegtekumigu ugpeqilleni, unguvasigma efquqnaanghitaqa.”

39Iwernga whangkuta pegtikastun ugpeqilleghmeggneng ayuqenghitukut, naafqellengyaghqastun. Iwernga ugpeqillelguukut enkaam unguvasiput yugulikaagukut.

Currently Selected:

Hebrews 10: ess

Highlight

Copy