Hebrews 8

Jesus, High Priest‑evut

1Aapqaghput elpesinun, whaten pisiiguq: tawatelngughmeng high priest‑elguukut aqumgalghii aghenqigneghani saaghwakun Aghtughyaghqaanghitelleghpigaam qilagmi. 2Qepghaatinguuq high priest‑nguluni sanctuary‑mi. Taana tabernacle‑epiguuq Atanghem nekeftekaqaa, yugem nekeftekaqenghitaa.

3Tamaghhaghmi high priest‑a nakmikegkaaguq tuunisqelluku tunusaneng, teghikusanengllu aghqerraaghesqelluku Kiyaghneghmun. Enkaam High priest‑evutlu sameng tuunyaghqalguyaghqaaguq Kiyaghneghmun. 4Jesus nunamesaqumi priest‑ngunayanghituq, qayughllak priest‑elguuq nunami tuunikayugneng tunusaneng Kiyaghneghmun Liilightuusat pisqellghistun. 5Priest‑et qepghaqaagut sanctuary‑mi, qilagmelngughtun ayuqesugnilngughmi. Salin Moses‑em tabernacle‑a nekeftellghilluku, Kiyaghneghem apaqutkaqaa, “Wataghllak sangwaa qamaglluku ulimanaken tawatengwaaq uspeqellemtun kelgutkamtun elpenun naayghami.” 6Kiyaghneghem Jesus qepghaqalitkaqaa priest‑nguluku. Qepghaqaa megnunaghataghaghtuq Levite‑et priest‑et qepghallghitneng. Tawateghpigaq akequsaghraghaq pinighataghalghiinguuq akequsalugmeng qayughllak taaggun Jesus‑em ilaliighutestekaqii Kiyaghneqlu yugetlu. Pinighataghaghtuq qayughllak tunemiitngaaq akequsatgun pinighataghalghiitgun.

7Sivuliq akequsaq afkuyiisaqan, taawa tuungliinnayaghtuq. 8Iwernga Kiyaghneghem afkuyalgunikaqii yuni whaten piiqngami,

“Aghneghet kaallequt, piiq Ataneq,

akequsaghraghaq pilleqaqa Israel‑eghmiinunllu Judah‑ghmiinunllu.

9Akequsaghraghaqa tawatennaanghituq akequsaqegkamtun sivunghitnun tasluqluki aghulaqutaqngamki Egypt‑meng.

Qaatkusimangitut akequsama pisqellghatun.

Enkaam avelghaqiinaqaqanka, piiq Ataneq.

10Aghneghet taakut kingungitneng una akequsaghraghaq pilleqaqa Israel‑eghmiinun, piiq Ataneq:

Liilightuusanka umyugiitnun kanaghlleqanka,

igaqelleqankallu qamagun ilungitgun.

Kiyaghneqelleqaatnga, ellngit yukelleqanka.

11Nalighhiiniita apeghtughyaghqaqenghitaa nunalgutni,

nalighmeng nengllugutni liitesqelluku Ataneq,

qayughllak qamaglluteng liisimakelleqaatnga,

ukalighpigaghhaghneng pingwaaghllagnun.

12Seghevulleqanka anaggutellghit,

allamengllu neqamiknaanghitanka seghleghqellghit.”

13Kiyaghneghem akuzitkaqngamigu akequsaghraghaq, sivuliq akequsaq atuunanightestekaqaa. Enkaam sangwaa alngunak atuunanighluni aghyughluni mulugpenani aviighullequq.

Currently Selected:

Hebrews 8: ess

Highlight

Copy