Hebrews 7

Priest‑a Melchizedek

1Taana Melchizedek umiilkesaghaa Salem‑em, priest‑ekaallu Qulighpigaam Kiyaghneghem. Abraham uteghniimaluku pilluwameng kayaalqughluki umiilget, Melchizedek‑em nallaghluku quyastekaqaa. 2Taagken Abraham‑em tuunegkaa qulaghqellghaneng sameng tamaghhaaneng tugukamineng pilluwami. Melchizedek‑em aatgha maalghugegneng sameng pisilguuq, sivuliq whaten pisiiguq, “Umiilga Elqughutngallghem.” Umiilkegkaatanganeng Salem‑em, aatghan aallgha whaten pisiiguq, “Umiilga Nekeggmellghem.” 3Igiituq igaqfikegkameng Melchizedek‑em atanganengllu naanganengllu nalighmeng sivunghaneng, talwa allgellghanengllu tuqullghanengllu. Kiyaghneghem Ighneghatun aghuliituq priest‑nguluni quunperugllak.

4Taawa liigikaghsi Melchizedek‑em aangumalleghllaga. Talwa sivuneqsuwhaamta Abraham‑em tuunegkaa Melchizedek qulaghqellghaneng tugulaqamineng pilluwami. 5Priest‑et kingunqii Levi‑em. Liilightuusani, Kiyaghneghem qelqaqii priest‑et qerngughtisqelluki yulgutangitneng qulaghqelleghmeng allgeghtekiitneng. Priest‑et tawaten piiqut, priest‑etlu yugetlu Abraham‑em kingunqeghngiisteng. 6Melchizedek kingunqenghitaa Levi‑em, iwernga tugukliqaqaa qulaghqelleq Abraham‑em tuunyagu. Quyastekaqaallu Abraham, allgeghutkaalghii Kiyaghneghem akequsaaneng. 7Nalluneqniituq taana quyastilghii aangataghaghtuq taagken quyastekameng. 8Priest‑et yuguut tuqukayuget naqamllu allgeghutkaagut qulaghqelleghmeng. Melchizedek‑llu allgeghutkaaguq qulaghqelleghmeng, iwernga kiyaghtengnguuq, Akuzitet Igaqegkat apellghistun. 9Levi allgeghutkaaguq yugneng qulaghqelleghmeng. Pinayalghiikut talwa ellngallu llivikikaaguq qulaghqelleghmeng Melchizedek‑mun Abraham‑kun. 10Qaywa Levi allgellghiteghngaaghmi, sivuneghmi Abraham‑em yugusiinitkaaguq Melchizedek‑em nallaghaqngagu Abraham.

Jesus Melchizedek‑etun Ayuquq

11Liilightuusani igaqngaaq priest‑et kingunqesaghqaqii Levi‑em. Ellngita Liilightuusat apeghtuutkaqiit yugnun, iwernga qepghaqaat Kiyaghneghmun nuughhutkaaguq. Tamaaken apalluqluku yuget aklukaagut priest‑meng Melchizedek‑etun ayuqelghiimeng, Aaron‑etun ayuqenghilnguq. 12Levite priest‑et simineghmegteki allaneng priest‑eneng, taawa Liilightuusatlu allangughsaghqaagut. 13Priest‑et quunpeng Levi‑em ramkenganeng pinguut, iwernga Ataneghput ramkenganeng pingunghituq. Kina alngunak Atanemta ramkenganeng pi qepghiigatngwaaghtuq priest‑nguluni aghqefigegni. 14Tamaghhaghmi liisimakaat Ataneghput allgeqaaguq ramkenganun Judah‑m. Moses‑em pimangitii kingunghi Judah‑m priest‑nguyaghqaaniluki.

15Enkaam tamaakut liigikataghaghaput whateglluwaaq qayughllak ilanga priest‑em Melchizedek‑etun ayuqelghii tagimaaq. 16Liilightuusat qelghutkaqaat priest‑a kingunqesaghqaqniluku Levi‑mun. Ataneghput priest‑ngughtekaanghituq Liilightuusat pisqellghitgun, iwernga priest‑ngughtekaaguq aghtughyaghqaanghilngughqun unguvalleghmikun kenletghuusaghqaanghilngughqun. 17Akuzitet Igaqegkat pikaalghiit,

“Priest‑nguuten quunperugllak,

Melchizedek‑em priest‑ngullghatun.”

18Tamaaken apalluqluku Kiyaghneghem simiqaqaa Liilightuusaq priest‑eneng ayuqelghii qayughllak kayaalnguqlu atuunghilnguqlu. 19Liilightuusat kina alngunak pistesimangitaa Kiyaghneghem piyukellghatun. Enkaam Kiyaghneghem tuunumiinkut pinighataghalghiimeng sighimalleghmeng. Taaggun sighimalleghqun aglaghyaghqaaghtukut Kiyaghneghmun.

20Taam sighimallghem saaghwakun Kiyaghneq allangughhnaanghilngughmeng akeqimaaq. 21Iwernga tawatelngughmeng akeqillghituq Levi‑em kingunghi priest‑ngughtaqngata. Jesus‑nginaghmun whaten pikaaguq,

“Ataneq akeqimaaq, allangughhnaanghitaaklu umyugagni;

‘Elpek priest‑nguuten quunperugllak.’”

22Tamaaken apalluqluku Jesus‑nguuq ipapighqelleq Kiyaghneghem akequsani pipestaaghlleqaa. Taana akequsaq pinighataghaghtuq akequsaqegkamineng Moses‑kun.

23Sivunghani priest‑etuyaghtuq. Tuqunghata ilangita priest‑et nagneghutaqaat qepghaqaat. 24Iwernga Jesus priest‑nguuq quunperugllak qayughllak unguvallequq quunpeng. 25Tamaaken apalluqluku Jesus‑em iiwleng yuguliyaqlegwii Kiyaghneghmun aglalghiit ellmikun, qayughllak quunpeng unguvanguuq maniguutunnaluki tamaakut Kiyaghneghmun.

26Jesus High Priest‑nguuq tuunikayuk sameng aklukegkamnneng. Agleghnaghtuq, avutngituq, pelungituq, aaftengngaaq seghleghqesteneng, Kiyaghneghem quulvaqaqaa qulighpigaghmun qilagmun. 27Jesus ilangistun high priest‑estun ayuqenghituq. Aghhutanga tamaghhaan high priest‑a aghqerraaghyaghqaaguq, sivukluni ellmi seghleghqelleghminun, taagken yuget seghleghqellghitnun. Jesus tuunaqngami ellmineng katam, aghqutkegkaaguq seghleghqellghitnun yuget, ataasighhaghmeng. 28Liilightuusani igaqngaaq yuget nakmiighyaghqaaniluki high priest‑ekaghqameng seghleghqegkayugughngaan alngunak yugestun. Kingunganeng Kiyaghneghem apellghan Liilightuusat Moses‑mun, tagtalmi taakwani allangughsaghqaanghilngughmeng akeqikaaguq. Taaggun akeqilleghqun Kiyaghneghem Ighneni High Priest‑ngughtestekaqaa, afkuyangunaan, quunperugllak.

Currently Selected:

Hebrews 7: ess

Highlight

Copy