Hebrews 6

1Enkaam liitelteki apeghtuusat angtaniitkanun ugpeqanun ayuqelghiit. Liitngwaaqaqasi apeghtuusuwhaaqat Christ‑ameng ayuqelghiit enkaangam liinneqigsaghqaqenghitasi. Liitngwaaghumaasi atuqsaghqaafqiita pinaluki tamaakut tuqumun ayuqelghiit. Liinneqigsaghqaqenghitaghsillu ugpeqilleghmeng ayuqelghii Kiyaghneghqun, 2paaptaayelleghneng, iigtilleghneng, unguvaghtilleghneng tuqukaneng, Kiyaghneghemllu nanqigtilleghqaaneng yugneng aghyuughyaghqaaluki kenlengunaan. 3Kiyaghneghem pistekanginkut, apeghtughlleqamsi angtaniitesqellusi ugpeqat.

4-6Tamaa ilanganeng yulguuq allgeghutkaayalghiineng Kiyaghneghem nighuganeng, naasiiqaqaatlu qilagem tunusaa. Allgeghutkaagutlu Agleghnalghiigneng Taghneghagneng. Nanghiiqaqiit pinightulangi Kiyaghneghem akuzitangi, nanghiiqaqaatlu Kiyaghneghem aghtughyaghqaanghillgha nunakaghqamelnguq. Taagken ugpeqnaniqumegteggu Christ‑a, avuteghqenqigtepagningiillequt qayughllak qaquuranqigtekangat Kiyaghneghem Ighnegha, kayngusaakegkangatlu yugtuqami.

7Nuna meghaquq eslallugughnneghani, piitestiiquqlu nunivagseghameng atughqameng tamaakunun peksighqikanun nunameng. Enkaam Kiyaghneghem pinighqestaqaa nuna. 8Iwernga nuna piitestimakumi sikughllugnengllu weeds‑nengllu satngunghituq. Yakughnaanituq Kiyaghneghem seghleghunilleghqaaneng, enkaam paneghsaghqaaguq.

9Piniqegkamnni, qaywa elpesinun latatkeghngaamteki tamaakut, sumeghtaghaatkigatamsi tawatellusi. Liisimakaghput pinighataghalghiimeng quyastellelguusi yugulilleghpesigun. 10Kiyaghneq elqughutngaan nanqigtiiquq, enkaam puygunaanghitaa qepghalleghsillu, piniqilleghsillu ellminun kayusiitelleghpesigun yugi. Neqamikelleqaallu paninang kayusiitngukesi. 11Nagneghtesugamsi sagiqlusi qepghaatesqelluku Kiyaghneq unguvalleghpesi tagtalngatun. Enkaam allgeghtepestaaghlleqaghsi sighimakegkaghsi. 12Ighsanitalghiingughtesunghitamsi. Yeghlegi tamaakustun ayuqestesugamsi ugpeqilleghmegteggun, nuqetutilleghmegteggunllu allgeghusaghqat Kiyaghneghem akequsaqegkaaneng.

Kiyaghneghem Akequsaa Ayepsugituq

13Kiyaghneghem akeqaqngamigu Abraham, akeqegkaqaa piyaghqapestaaghuniluku. Avangitutanganeng aangataghalghiimeng ellmineng, atuqluku ellmi katam ateni akeqikaaguq. 14Abraham pikaqaa, “Quyastepestaaghluten, uglaapiglluku kingunelilleqamken.” 15Abraham qelaneghpenani utaqiikaaguq, enkaam allgeghtekaqaa Kiyaghneghem akequsaa. 16Kitum neklegsuneghminigu aaghtiiraaghutelleq, akeqiiquq sameng pilleni ipanguniluku atuqluku kitum aatgha ellmineng aangataghalghiim. 17Allgeghusaghqat akequsamineng, Kiyaghneghem liigikestesugwii allaangughsaghqaqenghitngwaaghniluki agghilleni. Enkaam akeqikaaguq atuqluku ateni. 18Kiyaghneghem tawaten kayemiinkut. Kiyaghneq iqlengiqigatuq akeqineghmini, iqlengiqnaanghituqlu akeqikumi atuqluku ateni ipapighqennaluku piyaghqaqutni. Taakuk allangughteqaghhnaanghituk. Whangkuta anagniiqani Kiyaghneghmun paqniinnaluta, kayemellengeghllagtukut sighimaknaluku Kiyaghneghem akequsaa. 19Taana sighimalleq uyghiitnguuq unguvasimnnun, paqnaniighutestiinkutlu ayepsugitestiinkutlu. Taana sighimalleq iteghtuq agleghnalleghpigaghmun nemun safkaaghutem awatanganilngughmun. 20Tawavek Jesus iitqaaguq sivumnni whangkuta apalluqluta. High Priest‑ngughtekaaguq quunperugllagmun, Melchizedek‑em priest‑ngumallghatun.

Currently Selected:

Hebrews 6: ess

Highlight

Copy