Hebrews 5

1Tamaghhaan high priest‑a Kiyaghneghem nakmikegkaqaa yulgutanganeng. Kiyaghneghmun aglaghaquq yuget apalluqluki tuunaluki tunusiit aghqerraaghunnalukillu seghleghqellghitnun. 2High priest‑a kayaalliqegkayugutmineng nangllegtaghyaghqaaguq tamaakunun nallukelghiinunllu ugpeqinanilghiinunllu ipapilleghmun. 3Qayughllak kayaalliqegkayugutmineng, high priest‑a aghqerraaghyaghqaaguq ellmi katam seghleghqelleghminun, seghleghqellghitnunllu yuget. 4Kina alngunak nakmikigatuq ellmineng high priest‑ngughhnaluni quulvaghyaghqaaluni. Iwernga yuuk high priest‑ngughtaquq Kiyaghneghem nakmikenghatni, katam tawaten nakmikellghatun Aaron.

5Tawatenllu Christ‑a quulvallghituq ellmineng nakmikluni high priest‑ngughtelleghmun, iwernga Kiyaghneghem nakmikegkaqaa. Pikaqaa,

“Ighneqamken; aghneghmi whani Ataliitaghpenga.”

6Nalighneghitni Akuzitni Igaqegkani Kiyaghneghem pikaqaa,

“Priest‑ngullequten quunperugllak,

Melchizedek‑em priest‑ngullghatun.”

7Kiyaghneq aghtughyaghqaanghillelguuq yuguliyaghqaaluku Jesus tuqulleghmeng. Enkaam Jesus nunametnguluni, iglagtuluni qunituumaghmi yughaqaalghiillu tungsiqaalghiillu Kiyaghneghmun yugulisqelluni tuqulleghmeng. Kiyaghneghem nagatkaqii yughallghi, qayughllak quseveglluni qaatkegkaa Kiyaghneghem piyukellgha. 8Qaywa Jesus Kiyaghneghem Ighneqeghngaatni, paninang liitkaaguq qaatkusimalleghmeng ikfiqelleghmikun. 9Apeghiighyagu qamaglluku Kiyaghneghem pisqellgha, Jesus‑ngughtuq kenlengilngughmeng yugulillengestiyaghqaq tamaghhaanun qaatkullghiinun ellminun. 10Enkaam Kiyaghneghem nakmikegkaqaa high priest‑nguluku, Melchizedek‑em high priest‑ngullghatun.

Taghnughhaghhaatlu Angtaniitkatlu Ugpeqat

11Apeghyaghqaghllaguukut tamaakuneng. Iwernga apeghtuneghllupigtusi tamaakuneng qayughllak liigikaghaghsigalnguusi. 12Neghipigllusi ugpeqaalghiisi enkaam apeghtughiyaghqaaghtekaagusi ilagpesinun. Yeghlegi paninang aklaaqusi kitumun apeghtunqigtesqellusi ugpenghhat liisuwhaaghyaghqiitneng Kiyaghneghem akuzitanganeng. Katam taghnughhaghhaghestun mamaghtughyugaqusi, neqepigyugpenasi. 13Kina alngunak mamaghtuqayuk paninang taghnughhaghhaaguq. Salin nallukaa elqughutngalleqlu anaggutngalleqlu. 14Iwernga neqepik angtaniitkanun pinguuq. Peghqigsaqaagut liigiksaghqaalukek pinilghiinkuk, seghleghenkuk.

Currently Selected:

Hebrews 5: ess

Highlight

Copy