Hebrews 2

Kiyaghneghem Yugulighilleghllaga

1Tamaaken apalluqluku sumeghtaghaatkengngwaaghelteki ipapillghet nagaquqaput luuraq waaknaniqestaghnayukamteki. 2Kiyaghneghem apeghtuusii ipanguut; aapqaqii yugnun yaqulegteggun. Kina alngunak qaatkunneghilnguq apeghtuusanun, Kiyaghneghem aghyuughlleqaa aghyuulleghqaghtutalangatun. 3Enkaam ighsakumakumteggu Kiyaghneghem yugulighilleghllaga anagpagningitaghput aghyuughilleghqaa. Atanghem apeghyuggaaqaqaa taana yugulilleq. Taagken tamaakut nagaquutkat ellnganeng, ipapighqaat whangkunnun. 4Kiyaghneghemllu ipapighqegkaqaa whangkunnun. Tawaten pikaaguq atuqelleghmikun allaaghhiinaat allaaghlluwhaghtillghet, uyegtelleghmikunllu tunusii Agleghnalghiim Taghnegham piyukelleghmitun.

Jesus, Yugulillengestikaq Whangkunneng

5Kiyaghneghem nakmikellghitii yaqulget igleghutisqelluki sivumelngughmun nunakaghqamun. (Taananguuq nuna akuzitkegkefut.) 6Nalighneghitni Akuzitni Igaqegkani whaten igaqngaaq,

“Kiyaghneq, sangaawa yuuk umyugaghmikaqegken,

nalighmeng ighnegha yugem aflengakegkan?

7Ulimaaqan ukavaqaanlluku yaqulegneng,

qaghpaliqaqan nighughqelleghmengllu quulvalleghmengllu,

8igleghutistengllaqaqanllu samun tamaghhaanun.”

Tawanillu Akuzitni Igaqegkani igaqngaaq, Kiyaghneghem ulimaaqaa yuuk “igleghutistenguluku samun tamaghhaanun.” Taana whaten pisiiguq sangwaa qamaglluni ilatngaaq igleghutillghanun. Naqamllu salin esghiigataghput yuuk igleghutilghii samun tamaghhaanun. 9Iwernga esghaghaghput Jesus! Kiyaghneghem natengiighhaq ukavaghtestekaqsaghaa yaqulegneng. Maaten esghaghaghput qaghpaluni nighughqelleghmengllu quulvalleghmengllu qayughllak ikfiqluni tuqukaaguq. Kiyaghneghem piniqellgha apalluqluku, Jesus tuqukaaguq tamaghhaanun. 10Kiyaghneghuuq ulimaghikaq sameng tamaghhaaneng ellminun, nagneghastengngwiillu tawatelluki. Itagnapigtekaaguq Kiyaghneghem pinighsaghwaaqaqaa Jesus ikfiqelleghqun piinlightenguluku yugulillghitnun. Enkaam Jesus‑em tagisaghqaaghtekaqii yulghutet nighughqelleghmun.

11Jesus‑em pelungighsaqaqii yuget seghleghqellghitneng. Enkaam ellngallu tamaakutlu pelungighsaqii, qamaglluteng Atakaat Kiyaghneq. Tamaaken apalluqluku Jesus‑em kayngukigatii atighyaghqaaluki anglegutnguluki. 12Jesus‑em pikaqaa Kiyaghneq,

“Apeghlleqaqa aatghen anglegutemnun;

usuqelleqamken qerngughutkata.”

13Whatenllu pikaaguq,

“Neghyukelleqaqa Kiyaghneq.”

Pikaaguqlu,

“Whaantunga, taghnughhaatlu Kiyaghneghem tagivaqii whangamnun.”

14Taakut taghnughhaat yuguut kemekralgetlu aalguutlu, enkaam Jesus ellngistun lliiqaaguq. Tawaten pikaaguq tuqunaluni naafqennaluku Tughneghaq, aghtughyaghqaanghillelek tuqumun. 15Enkaam tawaten pilleghmikun itemutkaqii tamaakut qepghaghtelaaghestun ayuqelghiit unguvalleteng qamaglluki qayughllak alikngukangat tuqulleq. 16Whateghllugaaghuuq yaqulgunghitut Jesus‑em kayusiqii, iwernga Abraham‑em kingunghi kayusighaqii. 17Tamaaken apalluqluku Kiyaghneghem Jesus lliightestengngwaaghyaghqaqaa whangkutestun. Tawaten qepghaasaqlegwaa Kiyaghneq High Priest‑nguluni, nangllegtaghlunillu ataasiighmellunillu. Enkaam tuuniyaqlegughtekaaguq aghqutmeng Kiyaghneghmun seghevutesqelluki yuget seghleghqellghit. 18Jesus ikfiqegkaatminengllu nanghiiqullengegkaatminengllu, kayusighyaqlegwii tamaakut nanghiiqullengelghiit.

Currently Selected:

Hebrews 2: ess

Highlight

Copy