Hebrews 3

Jesus Aangataghaghtuq Moses‑meng

1Enkaangam ugpeqaalgutemni, Kiyaghneghem aaftekaqiisi ellminun yugulusi, tuqluqaqiisillu ellminitesqellusi qilagmi. Sumeghmikluku Jesus. Kiyaghneghem kayagtekaa Apostle‑ngulukullu High Priest‑ngulukullu aapghaqegkefut ugpeqniluku. 2Jesus ataasighmetkaaguq Kiyaghneghmun nakmikisteminun, katam Moses ataasighmetkaq Kiyaghneghmun qepghaataqngamigu Kiyaghneq mangteghaani. 3-4Tamaghhaghmi mangteghaq kitumeng ulimaghistelgulghii, iwernga Kiyaghneghem Jesus‑kun sangwaa tamaghhaan ulimaaqaa. Yuget usuqataghaghyaghqaqaat Jesus pakiggulluku Moses‑meng, qayughllak yuget usuqelleqaat mangteghangllaghta pakiggulluku mangteghameng. 5Moses ataasiighmetkaaguq qepghaghta Kiyaghneghem mangteghaani, ungipaatkaqiillu yuget Kiyaghneq sameng apeghyaghqalguniluku taaganiqaaghaq. 6Iwernga Christ‑a ighneghuluni ataasiighmetkaaguq igleghutista Kiyaghneghem mangteghaani. Whangkuta mangteghaqiinkut Kiyaghneghem, ilutumanginaqumta, ipapighqutkumanginaqumteggullu sighimakegkaghput.

Qaatkunneghitellghat Israel‑eghmiit

7Enkaangam katam tawaten Agleghnalghiik Taghneghak piik,

“Aghneghmi whani nagaququfsigu Kiyaghneghem menga,

8pineghlliqegpenasi sivuneghpesistun.

Tamaani aghneghni kilgaanilluteng qaatkesugumangitaat Kiyaghneq,

nanghiighsaghaqaqaatlu nuqenneghtullgha.”

9Kiyaghneq piiq,

“Tamaani 40 ayumiqulleghni sivuneghpesi esghaqaqeghngaaghmegteki apeghiiqanka, paninang nanghiighsaghaqaqaatnga.

10Tamaaken apalluqluku tamaakut yuget sakritestekaqaatnga.

Enkaam pikaagunga,

‘Iiwleng ataasiighmesigatut whangamnun,

liigikigatutlu natelluku kiyaghtesqesullemneng.

11Sakritngulunga akeqikaagunga allangughsaghqaanghilngughmeng.’

Whaten piinga,

‘Iteghnaanghitngwaaghaat meghnaalivigkaq yataaghqegkaqa ellngitnun.’”

12Ugpeqaalgutemni kelengalusi, seghleghmeng sumeghtaghalleghnengllu ugpenghitelleghnengllu, iqitutestegpenasi unguvalghiimeng Kiyaghneghmeng. 13Iwernga aghhutanga tamaghhaan kayemutaqitek pilleghqalgumaluku atilqelghiimeng “Aghneghmi.” Tawaten pinghilkufsi taawa seghleghqellghem puughllusi pineghllungllaghlleqiisi. 14Iwernga ataasiighmelkumta unguvallemta kenlenganun, neghyukluku Kiyaghneq ugpeghyuwhaallemtestun, taawa Christ‑am pilgutkelleqiinkut ellmi pimineng. 15Akuzitni Igaqegkani igaqngaaq,

“Aghneghmi nagaququfsigu Kiyaghneghem menga,

pineghllugugpenasi sivuneghpesistun qaatkusimangilnguut Kiyaghneghmun.”

16Kinkungaawat nagaquutkat Kiyaghneghem menganeng naqam qaatkutegpenateng? Tamaakunguut yuget Moses‑em maghyaghquqii Egypt‑meng. 1740 ayumiqulleghni kinkut Kiyaghneq sakritestatgu? Tamaakunguut seghleghqelluteng tuqulaghaatkat kilgaani. 18Kinkunun Kiyaghneq akeqikaawa iteghnaanghitngwaaghniluki meghnaalivigkamun yataaghqegkaminun? Akeqegkaqii qaatkusimangilnguut ellminun. 19Taawa liigikaghput iteghpagningitkaagut tawavek meghnaalivigmun qayughllak ugpeqenghilkangat.

Currently Selected:

Hebrews 3: ess

Highlight

Copy