Hebrews 12

Kiyaghneq Whangkuta Atavut

1Qamaglluteng tamaakut yuget liigikestiinkut ugpeqilleghmeggneng naten kiyaghtelleghmegteggun. Maaten uvitangighluta esghapagaqiinkut. Enkaam kilgaaqustestun iqitelteki qamaglluki uqigkutat, seghleghqellghetlu iglagullghiit whangkunnun. Sagiqlutangam kilgaaqulta sivumnnilngughmun, 2esghaamakluku Jesus, piinlighistengallu apeghiighistengallu ugpeqillemta. Kayngunaghtuq tuqulleghqaq qaquurakun, iwernga Jesus‑em pitkumangitaa kayngusaghaatelleq. Yeghlegi nakmiiqaaguq ikfiqnaluni qaquurakun apalluqluku quyalleq allgeghsaghqani. Enkaam maaten aqumgaaq aghenqigneghani Kiyaghneghem.

3Sumeghtaghaatkaghtegguqun Jesus. Iilqayugumangituq qaywa seghleghqestet ugumikeraaghllaghngaatni. Tawaten elpesillu ilutullghiinnaanghitusillu iilqayugnaanghitusillu. 4Seghleghqenghinnaqutkelleghpesi salin yugnun tuqutesigatiisi. 5Puygustekii ilutughsaasit akuzitet ungipaatilghiit Kiyaghneghmun ighneqnilusi? Akuzitni Igaqegkani igaqngaaq,

“Ighnemni, avelghaqiinaghpenaan Atanghem nallghusanghaten,

iilqayugpenangllu aghyuunghaten.

6Qayughllak qamaglluki piniqegkani Atanghem apeghtughaqii qaatkesqelluni,

aghyuughaqiillu tugukliqani avaqutaaluki.”

7Tuguklighaqiteggu Kiyaghneghem aghyuughillgha qayughllak ighneqelghiistun piiqiisi. Qamaglluki avaqutateng atangita aghyuughaqiit nallghughqennaluki. 8Qamaglluteng avaqutat aghyuullengaqut. Aghyuullengenghilkuvek taawa atangilnguuguten enkaam avaqutapikenghitaaten. 9Taam saaghwakun, atamta nunamelnguut aghyuughaqiinkut apeghtughnaluta qaatkesqelluteng, iwernga paninang quulvaghaqaput. Enkaam Atavut qilagmelnguq qaatkataghaghyaghqaqaghput unguvanaluta. 10Atamta nunamelnguut aghyuughaqinkut natengiighhaq, sumeghmeggni elqughlluku aghyuughinguniluteng. Iwernga Kiyaghneghem aghyuughaqiinkut pinighqelleghqamnnun pelungiightesqelluta ellmitun. 11Quyaniituq aghyuullengnemta qayughllak aqnightaqegkanginkut. Iwernga tagtalmi, liitfiknemteggu, nekeggmellengaqukut qayughllak kiyaghsagutaqukut elqughulluta.

Apeghtughallghetlu Kelengasaallghetlu

12Kevegteki iiggesi qughaghngalghiit, taagken iknaqughsaghteki kayaalnguut segesqusi! 13Taklaghtiki tuumngi tutmalleghpek, taagken kayaalnguq ighun aanqaghnaanghituq naflumineng, iwernga naallghullequq.

14Kiyaghhnaqitek nekeggmetullusi tamaghhaanun yugnun, kiyaghhnaqiteklu seghleghqellngunasi. Kinkut alngunak pelunginneghilnguut esghaghnaanghitaat Ataneq. 15Esghaamakullusi kinkut alngunak luuraq allgeghhneghisaaghaat Kiyaghneghem nangllegtallgha. Nagusaqunaanllu sungaghnilnguq akuq seghleliighqiiluni naafqiiyaghqaq yulghutmeng. 16Esghaamakullusi kinkut alngunak seghleghqesaaghtut sex‑kun, nalighmeng kinkut alngunak quulvaghinghisaaghtut Kiyaghneghmeng Esau‑tun. Akikegkaqegkanga pagitaghqani ataasighhaghmun neghyaghqamun. 17Liisimakaghsi taam kingunganeng, allgeghsugaqngamigu atami quyastellgha, atangan ighsakegkaqaa. Esau‑m allangughtepagningitkaqaa apeghiiqani, qaywa qunituumaghmi tungsighngaaghmigu atami quyastillgha.

18Sivuneghpesistun ayuqenghitusi Mount Sinai‑mun pikastun. Esghaghyaghqaat, saafsaghqaatlu. Tawani mamlegllagukaq, naafteghllagukaq, naayghaqlu kumaghughllagulghii. 19Nagaquqaat qalghightaan qalghighlleghhii, nagaquqaatlu Kiyaghneghem menga. Iwernga nepiiqiisqegkaat, 20qayughllak tuguklighyunghilkangat qelghillgha whatelnguq, “Taana naayghaq, yugem nalighmeng teghikusam saaftekumigu, tuqusaghqapestaaghuuq milughpagaatameng.” 21Moses‑em esghaqaa kakavaataghnapiglleghhii repall whaten pikaalghii, “Ellngaatall ungelegtunga alingruughem.”

22Iwernga katam elpesi tagikaagusi Mount Zion‑mun, qilagem Jerusalem‑nganun, neghllaganun unguvalghiim Kiyaghneghem. Tagikaagusi kestekaanghilngughnun yaqulegnun qerngughutkanun quyallelighllagluteng. 23Tagikaagusi qerngughutellghitnun qamagtengngwaaghluteng ugpeqat ighneqsuwhaaghestun ayuqelghiit. Qilagmi aatghit igaqngaat igatgun. Tagikaagusi Kiyaghneghmun nanqigtistengitnun qamagtengngwaaghluteng yuget, taghneghiitnunllu elqughutngalghiit yuget iighwightestekanun. 24Tagikaagusi Jesus‑mun, ellngakun Kiyaghneq akequsaghraghangllaqaaguq. Tagikaagusillu sivillagtaatkamun aawanun Jesus‑em. Pinighataghaghtuq Abel‑em aawaneng, qayughllak Kiyaghneghem seghevutii seghleghqellghet Jesus‑em aawakun.

25Enkaam kelengatek, nagasunghitegpenaan Kiyaghneq akuzilghii. Sivunemta nagasunghitkaqaat kelengasaaghillgha nunami whani, enkaam anagumangitaat aghyuughillgha. Whangkuta aghyuughataghaghlleqiinkut nagasunghilkumteggu kelengasaallgha qilagmeng. 26Kiyaghneq akuziiqngami Mount Sinai‑meng, mengan ufsugutkaqaa nuna. Iwernga maaten akeqimaaq whaten, “Ataasighhaghmeng ufsugunneqiglleqaqa nuna, iwernga qilaklu ufsugulleqaqa.” 27Tawaten akuzillghan, “Ataasighhaghmeng ufsugunneqiglleqaqa nuna,” liigikestengngwaaghiinkut whaten, sangwaat qamaglluki ulimaani, Kiyaghneghem iqilleqii ufsugusaghqat. Tamaakunginaghhaat ufsugutepagningilnguut tamaanllequt quunperugllak.

28Tamaaken apalluqluku iqamsiqayugvikelteggu Kiyaghneq qayughllak tuunegkanginkut ataneghpagulleghmeng ufsugusaghqaanghilngughmeng. Enkaangam maniguulteggu Kiyaghneq efqughnalkegkaatun alingellelighlutallu quulvaghillelighlutallu, 29qayughllak Kiyaghneghput naafqiilghiinguuq keneq.

Currently Selected:

Hebrews 12: ess

Highlight

Copy