Hebrews 13
13
Ugpeqat Kiyaghtaalleghqaat
1Piniqekestaghteki ugpeqaalgutesi. 2Upughamanginaghtek aqiiyagnun qayughllak ilangita upughataqiit nallukluki yaqulgutangi. 3Neqamikluki anusimingllaghvigmelnguut, nikimqun elpesillu anusimingllaghvigmetellghistun. Neqamikluki ikfiqngalghiit, nikimqun elpesillu ikfiqelghiistun.
4Tamaghhaghpesi siivakiteggu nengughutelleq enkaam ugitlu nulighhetlu ataasiighmetullit. Kiyaghneghem nanqigsaghqaqii gelgaghniilghiit, tamaakutlu ilanganeng sex‑kun seghleghqelghiit.
5Kiyaghtek pakigneghugpenasi manimun, itagnaghaqiteklu satutalegpesistun. Kiyaghneq pikaaguq,
“Uninnaanghitngwaaghamsi;
peggnaanghitngwaaghamsi.”
6Enkaam tetullngunaamta whaten pilta,
“Ataneq kayutkaqa!
Alingnaanghitunga yuget salleghqiitneng.”
7Neqamikluki igleghutistesi ungipaqikat elpesinun Kiyaghneghem akuzitanganeng. Neqamikluki naten kiyaghtekaatangi enkaam ugpellelgunaqitek ellngistun. 8Jesus Christ‑a almesiqaqaa ighivgaq, aghneghmi, quunperugllaklu. 9Iqitutestegpenasi ipapilleghmeng allaaghhiinaghnunllu allakaayagnunllu apeghtuusanun. Nangllegtallghakun Kiyaghneghem ayepsugighsaghteki ilusi, nakaan qaatkelluki Liilightuusat neqneng ayuqelghiit. Taakut neqet Liilightuusiit qaatkegkufsiki ayepsugighsaghnaanghitiit ilusi.
10Priest‑et qepghalghiit tabernacle‑mi ineghtekaagut neghelleghqiitneng aghqutkegkameng aghqefimteggun. 11High Priest‑em tagitaqii aawit teghikusat Agleghnalleghpigaghmun aghqutkennaluki seghleghqelleghnun. Iwernga kemegkwaaghit teghikusat neghllagmeng iqitulluki paneghtaqiit. 12Tamaaken apalluqluku Jesus‑llu iqitutkaaguq neghllagmeng. Tawani tuqukaaguq, pelungighsaghnaluki yuget seghleghqellghitneng ellmi katam aawmineng. 13Enkaangam neghllagmeng whangkutallu aglaalta Jesus‑mun, seghletun akuzitkesqelluta katam ellnga seghletun akuzitkellghistun. 14Nunami whani quunpekaghqameng neghllagitukut, iwernga utaqangwaaghput neghllak tagiyaghqaq.
15Jesus‑kun iiwleng aghqutkilta Kiyaghneghmun. Aghquteput usuqilqaput apenemteggu Jesus Atanghuniluku. 16Puygugpenaan pinitun pilleq, tuunutaqiteklu qayughllak tamaakut aghqutnguut efqughnalghiit Kiyaghneghmun.
17Qaatkiteki igleghutistesi atuqluki qelghusiit. Kelengakinguut unguvasighpesineng liisimakluku Kiyaghneghmun nanqigsaghqaatseng. Quyanghitestegpenaki igleghutistesi, itupill qaatkelleghpesigun qepghaqateng pilleqiit quyakusiqluki. Qaatkenghilkufsiki kayusiitepagningitiisi.
18Yughaatkitekut. Liisimakukut umyugamta anaggutellghinniinkut, qayughllak iiwleng piyukelqaghput elqughutngalghii piyaghqaaluku. 19Taakunginaghhaagneng kayagtamsi yughaatkesqellunga qantaghaqun elpesinun uteghnighnalunga.
Taaqniita Yughaq
20Kiyaghneghem nekeggmellelitistem Ataneghput Jesus unguvaghtestekaqaa tuqulleghmeng. Enkaam aawmikun Penniighniighteghllagughtekaaguq penniighnun. Aawan atuuyaghqaaghtestekaqaa Kiyaghneghem quunpekaghqaq akequsaa. 21Yughaghtunga Kiyaghneghmun tuunesqellusi sameng tamaghhaaneng pinilghiimeng elpesinun piyukellgha pisqelluku. Jesus Christ‑akunllu ilugpesinun Kiyaghneghem piligu efqughnalghii ellminun. Christ‑a usuqellengli quunperugllak kenlengunaan. Amen.
Naangniitet
22Ugpeqaalgutemni, nagatngwaaqaghteki latanka qayughllak kayemyugaqamsi. Tamaaken apalluqluku takestaaghhaaluku lataamsi. 23Liisimakesugamsi ugpeqaalgutemnneng, Timothy‑meng, aanesimaaq anusimingllaghvigmeng. Kaatelghaghtughyaqan qerngaamtung esghaghyaghtughlleqamsi.
24Quyakaghhnakesi qamaglluki igleghutistesi, qamagllukillu Kiyaghneghem yugi. Ugpeqaalgutetlu Italy‑meng pit quyakaghhnakiisinguq.
25Kiyaghneghem piniqingalghii kayusillgha tamaghhaghpesinilli! Amen.
Currently Selected:
Hebrews 13: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
