Hebrews 11

Ugpeqilleq

1Ugpeqillghem liisimakestengngwaaghiinkut allgeghsaghqaqniluku sighmakegkaghput, ipapighqusiguq esghaghyaghqaqenghilkemnnun. 2Ugpeqilleghmegteggun ayumiim yugi itagnaqellengegkaagut Kiyaghneghmeng.

3Ugpeqilleghqun liigikegkaqaghput Kiyaghneghem ulimaaqaa nuna akuzitmikun. Tamaakut aliilnguut ulimaaghuut esghaghyaghqaanghilngughmeng.

4Ugpeqilleghqun Abel tuunikaaguq Kiyaghneghmun tuguklighyugnaghataghalghiimeng aghqutmeng Cain‑em aghqutkegkaaneng. Kiyaghneq pikaaguq Abel elqughutngalghiinguniluku yuuk ugpeqillgha apalluqluku. Kiyaghneghem ipapighqegkaqaa Abel elqughutnganiluku tuguklilleghmikun tunusii. Ugpeqilleghmikun Abel paninang akuzinguuq, tuqukaayaghngaaghmi. 5Upeqilleghqun Enoch mayuutestekaaguq qilagmun enkaam nanghiillghitaa tuqulleq. Kitum alngunak naalkellghitaa qayughllak Kiyaghneghem tugukaqegkanga. Mayullghilluni qilagmun, igaqngakaaguq Enoch‑em efqughtekaqaa Kiyaghneq. 6Ugpeqillngunani kitum alngunak efqughtepagningitaa Kiyaghneq. Kina alngunak tagiyukumi Kiyaghneghmun ugpeqepestaaghyaghqaqaa Kiyaghnelguniluku, akileghtughyaghqaqiillu ivaghipiilghiit ellmineng.

7Ugpeqilleghqun Noah‑m nagatkaqii Kiyaghneghem kelengasaaghutkii tamaakut salin pingigalluki. Enkaam qaatkelluku Kiyaghneq angyaghpangllaqaaguq nengllugutni yugulinaluki ulevelleghmeng. Tawaten pilleghmikun Noah‑m nunam yugi nanqigtestekaqii Kiyaghneghmun aghyuughesqelluki. Ugpeqilleni apalluqluku Noah‑m allgeghtekaqaa elqughutngalleq Kiyaghneghmeng.

8Ugpeqilleghqun Abraham‑em qaatkegkaqaa Kiyaghneq tuqlughaqngatni aghulaqesqelluku ilanganun nunam. Kiyaghneghem akequsaqaa taana nuna ellnganun tuunelleqniluku. Enkaam unitkaqaa ellmi nunani nallukluku navek pinaqutni. 9Ugpeqilleghqun kiyaghtekaaguq nunataaluni nunami Kiyaghneghem akequsaqegkaani. Tiintanitkaaguq katam Isaac‑enkuk Jacob‑enkuk pillghegketun. Elkegkenkallu allgeghtekaqaak Kiyaghneghem akequsaqegkaa taana nuna. 10Abraham tawaten pikaaguq qayughllak utaqiingulghii kiyaghhnaluni neghllagmi tunemaghtuqami. Kiyaghneghuuq uspeqistengallu ulimaghistengallu neghllagem.

11Abraham nanevgaghllaghngaaghmi, Sarah‑llu qumingyaghqaanghiteghngaaghmi, paninang ugpeqilleghqun Sarah qumingegkaaguq, qayughllak neghyukegkaqaa Kiyaghneghmun pilleqniluku akequsaqegkani. 12Tamaaken apalluqluku Abraham tuquyaghtungestaqaaghngaaghmi, paninang kinguneghtughqaaghllakaaguq. Ellngita uglaghtalngit ighaleqetaaghestun qilagamelngughestun ayuqut, kestekaanghilngughestunllu qenaavzeghaatun esnam.

13Qamaglluteng tamaakut yuget paninang kiyaghtekaagut ugpeqilleghqun tuqulleghmeggnun kenlanga. Tuqulaghaatkaalghiit allgeghtegpenaki Kiyaghneghem akequsaqegkii ellmeggnun. Iwernga ugpeqilleghqun esghaqaqiit Kiyaghneghem akequsaqegkii uyavanlluki sivumeggnilluki quyakegkaqiitlu. Enkaangam ungipaatkaqiit yuget nunataaniluteng whani nunami, nunamun pikenghinniluteng. 14Tamaakut tawaten akuzilghiit, whateghlluwaaq aapghwaat nunakaghqaghyugniluteng ellmeggnun pikaghqameng. 15Suumqegkaqsaqumegteggu taana nuna unitkaghteng, uteghtelleghqalgunayaghtut. 16Yeghlegi piyukataghaqaqaat pinighataghalghii nuna, qilagmelnguq. Enkaam Kiyaghneq kaynguyugigatuq Kiyaghneqninghatni. Talwa yataaghqutkaqii neghllagmeng.

17-18Kiyaghneghem akeqegkaqegkanga Abraham, “Isaac‑ekun kinguneghllagullequten.” Ugpeqilleghqun Abraham‑em neghyukegkaqaa Kiyaghneq nanghiiqwaaqngatni. Enkaam aghqutkesaghqaaghtekaa kezemaghhaq ighneni, Isaac. 19Abraham‑em ugpeqegkaqaa Kiyaghneq unguvaghtiyaqleguniluku tuqukaneng. Enkaam Kiyaghneghem tuqutesnanighaqngagu Isaac, Abraham‑em veghtekallghuuqaqaa Isaac tuqulleghmeng.

20Ugpeqilleghqun Isaac‑em quyastekaqaak Jacob‑enkuk Esau‑nkuk, tungsiitkaqaak Kiyaghneghmun quyastesqellukek aaghakaghqiik.

21Ugpeqilleghqun Jacob‑em, tuqunaqnguluni quyastekaqaak allakaqaghtaagkenka ighneghqek Joseph‑em. Taagken qungughlluni ayaviighmikun maniguqaqaa Kiyaghneq.

22Ugpeqilleghqun Joseph‑em, kenletghuunnaqellghani unguvalleghmi, akuzitkegkaqaa aghulaqelleghqaat Israel‑eghmiit Egypt‑meng. Apeghtuutkaqiillu neghqwaani naten salleghqii.

23Ugpeqilleghqun Moses‑em angayuqagkenka iighaghtuqaqaak pingayut tanqit allgellghan kingunganeng. Esghaqangak yuukegtepiglleghii, alingumangilnguuklu qaatkunneghisaghqaalutek umiilgem qelghutellghanun.

24Ugpeqilleghqun Moses, yugughsami ighsakaaguq ighneqesneghmeng Pharaoh‑m paniganun. 25Yeghlegi nakmiiqaaguq ikfiqelgusighnaluki Kiyaghneghem yugi, avelghaghluku efqughyugnallgha seghleghqellghem muluyaghqaanghilnguq. 26Itupill sumeghtaghaatkegkaqaa ikfiqelleghqani Christ‑amun itagnaghataghaghniluku aklungilghutanganeng Egypt‑em. Sumeghtaghaatkengngwii akileghtuusaghqat aga sivumelnguut.

27Ugpeqilleghqun Moses‑em unitkaqaa Egypt alingellngunani umiilgem sakraallghaneng. Iilqayugumangituq qayughllak esghalghiistun pikaqegkanga aliinneghilnguq Kiyaghneq. 28Ugpeqilleghqun Moses‑em qelqaqii yuget Passover‑esqelluki, qelghutkaqaallu aakw sivillagtaatesqelluku amigteggun. Enkaam Yaqulgan Tuqullghem tuqutellghitii ighneqsuwhaaghit Israel‑eghmiit.

29Ugpeqilleghqun Israel‑eghmiit aghviqaqaat Red Sea nikimqun qutestun. Iwernga Egypt‑eghmiit, aghvighnaqutkengnguluteng pekaqutkaagut.

30Ugpeqilleghqun Israel‑eghmiit maaghraghvinlegni aghneghni uzivgaqaqaat Jericho‑m mingllutanga. Taagken minglluta ulleghaatkaaguq. 31Ugpeqilleghqun Rahab‑em, yugusimineng akikikayugem, upughatkaqaak Israel‑eghmiit riirngistegket. Tamaaken apalluqluku tuqullghituq maligulluni qaatkusigalngughnun Kiyaghneghmun.

32Wataqaaghaq ungipamsugullamsii yugneng ugpeqikaneng Kiyaghneghmeng? Taakeghllagyaghqaagut akuzitkesaghqaaluki Gideon‑enkut, Barak‑enkut, Samson‑enkut, Jephthah‑nkut, David‑enkut, Samuel‑enkut, uuknaliqistetlu. 33Ugpeqilleghqun ilangi yuget whaten pikaagut: kayaalqegkaqiit ataneghpagullghet, elqughutngaluteng igleghutikaagut. Enkaam Kiyaghneghem akequsii tugukaqiit. Ilangita lion‑et qaanghit meqetestaqiit. 34Kumaghughllaget kenghet qaamtaqiit, anagaqlukillu tuqutistekaghqateng savigpagkun. Kayaataqut iwernga ugpeqillghita iknaqughtaqiit. Ugpeqilleghqun pilluwaghtengit iknaqughteghllagaqut enkaam kayaalqaqiit ilangita nunat pilluwaghtengit. 35Ugpeqilleghqun aghnat tuqumasliiteng veghtaqiit tuqulleghmeng Kiyaghneghem unguvaghhneghaki.

Ilangi elngaatall ikfiqesteghllagaqiit pegtesqelluku ugpeqillghat. Iwernga tuqunaluteng piiqut Kiyaghneghmun unguvaghtesqelluteng pinighataghalghimun unguvalleghmun. 36Ilangi legasiighwaatkaqluki, ilangi kagsagmigaqluki, ilangi qiipraghusighluki anusimingllaghaqiit. 37Ilangi milughpagaatameng tuqutaqiit, ilangi yugusiit pilagtughluki malghughqaqiit, ilangi tuqutaqiit savigpagkun. Ilangi temgi tamaani igleghtaqut aalluteng penniighemllu goat‑emllu amiineng. Ilangi aklumapiglleghhiit, yuget amyuqetaatkegkiit, seghletunllu kiyaghutkiit. 38Nunam yugi pinipagunghitut kiyaghtelgusighyaghqaaluki tamaakut elqughutngalghiit yuget! Ilangi elqughutngalghiit temngi tamaani igleghakaalghiit paaghqillghani, naayghani, kiyaghtaqluteng qayeni, laawaaghnillu.

39Qamaglluki tamaakut Kiyaghneghem itagnaqegkaqii ugpeqillghit apalluqluki! Naqamllu allgeghsimangitaat Kiyaghneghem akequsaqegkaa, 40qayughllak Kiyaghneghem uspeqegkaa whangkunnun pinighataghalghiinguuq. Uspeqillgha whatetuq: akequsani pinaanghitii ellngitnun whangkungunaki. Qerngaamta qamaglluta iighwighlleqiinkut.

Currently Selected:

Hebrews 11: ess

Highlight

Copy