Galatians 6
6
Kayusiitullusi
1Ugpeqaalgutemni, kina seghleghqellghem kaatfallugtekagu, elpesi kiyaghlleghhiini Taghneghagnekun, pinitungwaaq yakuqluku kayusiiteggu maligunneqigtesqelluku Ataneghmun. Elpesillu, kelengangwaaghlusi luuraq nanghiiqullengnayukafsi. 2Kayutkutullusi seghleliilleghpesini; tawaten qaatkelleqaghsi Liilightuusaq Christ‑am qelghutkaa. 3Kina sumeghtaghaqumi sanguniluni, sangunghiteghngaaghmi, ellmineng puughtengnguuq. 4Yeqay tamaghhaghmi yugem yuvghiighwaaghligu kiyaghtaalleni. Enkaam piniqan quyaknakanga ellmi katam apeghiiqani usputaqellngunaan kitum apeghiiqaanun. 5Tamaghhaghmi yugem igleghusaghqaqii ellmi piyaghqani.
6Kina alngunak apeghtuqaq Kiyaghneghem apeghtuusaaneng, pinilghiimeng tuunili apeghtughisteminun.
7Sumeghtaghaquvek puughlleqniluku Kiyaghneq elpeneng puughtengnguuten. Yugem sangwaa piitesiighaqani unataghyaghqaqaa. 8Piitesighaquvek efqughhnaluku seghleghqengngalghii piyukellghen, taagken unataghlleqan tuqulleq. Iwernga piitesighaquvek efqughhnalukek Taghneghak, taagken Taghneghagneng unataghlleqan kenlengilnguq unguvalleq. 9Enkaam qinuyagutegpenaan pinitun pilleq pilteggu, qayughllak iilqayunghilkumta pilleghqaq kaaskan akileghtuusangellequkut. 10Enkaam pilleghqalgunemta iiwleng pinitun piiqelteki qamagtengngwaaghluki yuget, kiyang tamaakut angleguteliitkaput Christ‑akun.
Paul‑em Kinguliq Kelengasaallgha
11Esghaqaghtekiqun yaagtughllaget igallghenka latamalusi!
12Yuget esghaghsaqsuneghtuqatlu qanatkiyuneghtuqatlu pinitun qepghalleghmeggneng, ellnginguut circumcise‑esquughwaaghilghiit elpesineng. Tawaten piiqut qayughllak alingaqelghiit amyuqetaatkellengnayukameng ungipaqegkumegteggu qaquuraghhiinaa Christ‑am, avelghaghluku circumcise‑elleq. 13Qaywa circumcise‑ekaayaghngaaghmeng, ellngit katam qaatkusigatut Liilightuusanun. Circumcise‑esqesugaqiisi qanatkepigesnaghnalusi ellmeggnun circumcise‑estekaqnilusi. 14Iwernga whanga qananaanghitunga sameng alngunak iwerngaqun qaquuraaneng Atanemta Jesus Christ‑am. Tuqullghakun qaquurami nuna qaquuraamaaq whangamnun, enkaam whanga qaquuraamaanga nunamun. 15Megnunanghituq yuuk circumcise‑ekaakumi, nalighmeng circumcise‑ellghilkumi. Una megnunalghiinguuq: Kiyaghneghem ulimakaqiinkut nutaghaaluta yugni. 16Tamaghhiitnun qaatkullghiinun apeghtuusamnun, yeqay Kiyaghneghem nekeggmellghallu nangllegtallghallu ellngitnilli, Israel‑nganillu Kiyaghneghem.
17Whaken kenlekluku kitum alngunak alla seghleliightestefqaama pilinga qayughllak yugusimnilnguut maamellghet kelgutngwaat qephaghtelaaghulqa Jesus‑mun.
18Ugpeqaalgutemni, yeqay piniqingalghii kayusillgha Atanemta Jesus Christ‑am tamaghhaghpesinilli. Amen.
Currently Selected:
Galatians 6: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
