Ephesians 1

1Ukut latat Paul‑meng pinguut. Christ Jesus‑em apostle‑kaanga Kiyaghneghem piyukellghakun.

Latanguunga Kiyaghneghem yugitnun Ephesus‑melngughnun, ataasiighmelnguut maligsaaghtengi Christ Jesus‑em.

2Kiyaghneghem Atamta, Atanemtallu Jesus Christ‑am nanglleklisillu nekeggmellelguslisillu.

Kiyaghneghem Nakmikegkaqiinkut Christ‑akun

3Usuqellengli Kiyaghneq, Atanga Atanemta Jesus Christ‑am! Christ‑akun Kiyaghneghem quyastengngwiinkut tamaghhaaneng tunusameng qilagtameng. 4Nuna ulimallghilluku Kiyaghneghem nakmikegkaqiinkut Christ‑akun pelungitesqellutallu avutngitesqellutallu ellminun. 5Qayughllak Kiyaghneghem piniqegkanginkut, neghighluku allughqinakegkaqiinkut avaqutaaluta Jesus Christ‑akun. Tawaten pikaaguq qayughllak piyukegkanga, efquqegkangallu. 6Enkaam usuqaghput Kiyaghneq qayughllak ighlegpenani nangllekeghllagiinkut piniqegkamikun Ighneghmikun.

7Christ‑am aawakun, Kiyaghneghem itemutkaqiinkut seghleghqellemnneng. Seghevutii seghleghqelleput apalluqluku nangllegtalleghllani 8aqeghqusiqeghllakanga whangkunnun. Peghqinghustiinkutlu liigikestiinkutlu 9uspeqelleghmineng salin aliighsigalkemmineng sivunghani. Taananguuq Kiyaghneghem uspeqegkaa, pikaqaa Christ‑akun. 10Kiyaghneghem uspeqelleni apeghiighlleqaa pilleghqaghllugwaaghmi. Qamagtengngwaaghluki ulimaani qilagmelnguutlu nunamelnguutlu qerngughlleqii, Christ‑amun igleghutesqelluki.

11Christ‑akun Kiyaghneghem nakmikegkaqiinkut ellminun yuguluta. Ayumirugllak piyukelleghmitun uspeqegkaqaa. Ellngan sangwaa tamaghhaan piyukelleghmitun pistaqaa. 12Whangkuta Jews‑eni ugpeqani sighimakiyuwhaaqaagukut Christ‑akun. Enkaam kiyaghtaallemteggun usuqesleqaghput Kiyaghneq aangelleghllaganun.

13Christ‑akun elpesillu nagaquqaqaghsi ipapik ungipaq. Pinilghiinguuq Ungipaq ungipaatilghii yugulilleghpesineng. Ugpeqaqngafsigu Christ‑a, Kiyaghneghem nalluniiqaqiisi Agleghnalghiigneng Taghneghagneng, akequsaqegkamineng tuunelleqnilukek. 14Agleghnalghiim Taghnegham ipapighqestiinkut pagitaghqamnneng kenlanga whangkuta piliitelleghqamnnun. Enkaam usuqelleqaghput Kiyaghneq aangelleghllaganun!

Paul‑em Yughii

15Nagaquumaaqa ugpeqilleghsi Ataneghqun Jesus‑kun, piniqelleghsillu tamaghhiitnun Kiyaghneghem yugitnun. Tamaaken apalluqluku, 16neqamikaqamsi yughanemni, iqamsiqayagunneghmeng taaqigatamsi Kiyaghneghmun. 17Ataghllakaa Atanemta Jesus Christ‑am. Ellnganun tungsiitaqamsi peghqinghusqellusi Taghneghagkenkun, liigikataghiisqellusi Kiyaghneghmeng. 18Yughaatkaqa nighuk kuukgutesqelluku ilugpesinun, liigikesqelluku sighimalleq Kiyaghneghem elpesinun pikestekaa qayughllak nakmikegkaqiisi. Yughaatkamsillu liigikesqelluki kemnaghllaget quyastelleghllaget Kiyaghneghem akequsaqegkii yugminun. 19-20Yughaghtungallu liigikesqelluku seghleghllaguuq Kiyaghneghem aghtughyaghqaanghilleghllaga qepghalghii whangkunni ugpeqilghiini. Taana aghtughyaghqaanghitelleghllak ataasiiguq Kiyaghneghem unguvaghtisiqegkaa Christ‑amun tuqulleghmeng. Taagken qilagmi Kiyaghneghem aqumesimaa aghenqigneghmikun. 21Kiyaghneghem qulighpigaaghtestekaqaa Christ‑a tamaghhiitneng igleghutisteneng, qelghikayugneng, aghtughyaghqaanghillelegneng, umiilegnengllu. Aatgha ingyaatngaghllagtuq ateghyaggaghneng nunami whani, nunaghraghaghqamillu. 22Kiyaghneghem llikaqaa sangwaa qamagtengngwaaghluku Christ‑am itegaan asinganun, naasquutistengllaqaqaallu samun tamaghhaanun apalluqluki ugpeqat. 23Qamaglluteng ugpeqat yugusiqii Christ‑am, enkaam ellnga iighwightuq. Christ‑am iighwightaa sangwaa qamaglluku nani alngunak.

Currently Selected:

Ephesians 1: ess

Highlight

Copy