Ephesians 6

Taghnughhaatlu Angayuqatlu

1Taghnughhaghni, qaatkullusi angayuqaghpesinun Atanghem pisqesullghatun elpesinun. Tawaten elqughutngaaq. 2Akuzitni Igaqegkani whaten Kiyaghneq qelghikaaguq, “Quulvaghluku atanllu naanllu.” Taana qelghusaq sivuliiguq akequsalek. 3Whaten Kiyaghneq pikaaguq, “Kiyaghtaallghen itagnaghllequq, taaklukullu kiyaghllequten nunami.”

4Angayuqani, sakritestegpenaki taghnughhasi. Yeghlegi anglisteki peghqigsaghlukillu apeghtughaaghlukillu Atanghem pisqellghatun.

Qepghaghtelaaghetlu Piliitistengitlu

5Qepghaghtelaaghni, alingellelighlusillu ungelegllelighlusillu qaatkiteki piliitistesi nunami whani. Ipapighqellusi qepghaataqiteki, katam Christ‑a qepghaatelleghpesistun. 6Piliitistesi qaatkiteki qaywa esghapanghiteghngiisi. Qepghaghtek efqughhnaluki piliitistesi katam efqughtelleghpesistun Ataneq. Ilugpesineng atuqiteggu Kiyaghneghem piyukellgha Christ‑amun qepghaghtelaaqelghiistun. 7Enkaam qepghaghtek sagiqlusi Ataneghmun pilghiistun, nakaan yugnun. 8Neqamikluku Atanghem akileghtughyaghqaqii yuget qamaglluki, pinitun pillghitnun. Ataneq tawaten pillequq qepghaghtelaaghnunllu qepghaghtelaaghunghilngughnunllu.

9Piliitisteni, pinitun piteki qepghaghtelaasi katam ungipaatellemtun ellngit pinitun pisqellusi. Alingsequgpenaki. Neqamikluku elpesillu qepghaghtelaasillu ataasimeng Atanelguusi qilagmelngughmeng. Ellngan nanqigsaghqaqii yuget qamaglluki taniillngunaki.

Iingunaghmelnguuk Akulghaaghqek Kiyaghneghem

10Kinguliq apeghyaghqaqa unanguuq, iknaqellengitek Ataneghmeng, aghtughyaghqaanghilleghllaganengllu. 11Aatekek iingunaagkenka akulghaaghek Kiyaghneghem yataaghqegkakek elpesinun. Taagken tengvimun nekevghasaghqaaghlleqasi Tughneghaam puughtillghi. 12Neqamikluku, pilluwaangunghitaput yuget. Itupill pilluwaangwaaput igleghutilghiit, aghtughyaghqaanghillelget, igleghutilghiit nunam mamleganeng, seghleghetlu tughneghaat qilaganilnguut. 13Tamaaken apalluqluku aatekek iingunaagkenka akulghaaghqek Kiyaghneghem yataaghqegkakek elpesinun! Enkaam seghleliighem aghneghani pilluwaghyaqlegulleqasi anguyagem sughugallghi. Taagken pilluwaneghmeng apeghiiqufsi, elpesi paninang nekevghangullequsi.

14Enkaam nekevghamanginaghtek. Ipapilleq tafsiiteggu, elqughutngalleqlu sakimagiitiiteggu. 15Pinilghiit Ungipat nekeggmelleghmeng ayuqelghiit, kamiiteki. 16Tamaakut saaghwitgun, atuqiteggu ugpeqilleq amiigighaghtaasiiluku qaamsaghqaaluki kumangalghiit aaygungi Tughnegham. 17Aateggu yugulilleq naasqughiitaaluku, Taghneghamllu savigpaga, Kiyaghneghem akuzitkaa. 18Iiwleng yughaghtek Taghnegham maghyaghquutellghakun. Atuqluki allaaghhiinaat yughallghet, aapniighteklu Kiyaghneghmun. Tamaaken apalluqluku kelengalusi, iilqayugpenasi. Iiwleng yughaatkelluki qamaglluki Kiyaghneghem yugi. 19Whangallu yughaatkitengnga Kiyaghneghmun akuzitelitesqellunga. Taagken tetugpenanga apeghlleqaqa sangwaa Kiyaghneghem salin liigikestellghilkanga Pinilghiineng Ungipaneng ayuqelghii. 20Kiyaghneghem nakmikegkaqaanga akuzistengulunga ellminun. Enkaam tamaaken apalluqluku anusimingllaghaagunga qiipraghusighlunga. Yughaghtek ungipaqinalunga tetugpenanga katam Kiyaghneghem piyukellghatun.

Latam Naangniitangi

21-22Liisimakesugamsi natetulemnengllu saaqutemnengllu. Tamaaken apalluqluku kayagsimaaqa Tychicus elpesinun. Piniqegkaghput ugpeqaalgutfut, ataasiighmelnguuguqlu qepghaghtenga Atanghem. Kaaskumi ungipaalleqiisi sameng tamaghhaaneng whangamneng, kayemelleqiisillu.

23Kiyaghneghmeng Atameng, Ataneghmengllu Jesus Christ‑ameng elpesinun pinguuk nekeggmelleqlu, piniqelleqlu ugpeqillelek. 24Nangllegtalleq tamaghhaghpesinun pinguuq piniqilghiini Atanemnneng Jesus Christ‑ameng piniqellelighluku naangyaghqaanghilngughmeng.

Currently Selected:

Ephesians 6: ess

Highlight

Copy