Ephesians 5

Kiyaghtaalleq Nighugmi

1Kiyaghneghem elpesi avaqutaqutanganeng piniqepigtekii, ayuqesighaghteggu. 2Kiyaghtaallesi aaghqutaqesteki piniqelleghmun, katam Christ‑am piniqegkanginkut, tuqumatkegkaqegkanginkutlu. Tuqullgha tepkegtatun tunusatun ayuquq Kiyaghneghmun, aghqutnguuqlu ellnganun.

3Elpesi Kiyaghneghem yukegkangisi, enkaam kitumun alngunak allaniightestengunifqaafsi, nalighmeng alngunak sex‑kun seghleghqestengunifqaafsi, nalighmeng pakigniightengunifqaafsi. Tamaakut seghleghuut enkaam Kiyaghneghem yugita piyaghqaqenghitiit. 4Kayngusaghaategpenasi, temngitwhameng akuzitkegpenasi sex‑meng, nalighmeng amyughaaghutkegpenasi sex‑meng. Itupill iqamsiqayugviksaghqaqaghsi Kiyaghneq. 5Nalluneqnaghhiituq una: Kina alngunak pagisaghqiituq Ataneghpagullghani Christ‑amllu Kiyaghneghemllu seghleghqelghii allaniighmeng, alngunak sex‑kun seghleghqelleghmeng, nalighmeng pakigniighmeng. (Pakigneghet manigughtenguut kiyaghnengllaqanun.)

6Yugnun puughtestegpenasi ungipaaskangisi tamaakut seghleghqellghet seghleghunghinniluki. Iwernga tawatelnguut seghleghqellghet Kiyaghneq sakraasteghllagaqaat qaatkunneghilnguut ellminun. 7Tamaaken apalluqluku ilategpenasi tawatelngughnun yugnun. 8Yugestun ayuqsaghtusi kiyaghlleghhiit mamlegmi, iwernga maaten kiyaghtengnguusi nighugmi qayughllak Atanghem pikegkangisi. Enkaam kiyaghtek yugestun nighugmelngughestun. 9(Qayughllak kiyaghhneghpesini nighugmi pinightestaqiisi, elqughutngastaqiisi, ipangustaqiisi.) 10Liinnaqiteggullu sangwaa efqughnalghii Ataneghmun. 11Ilatqaghtaghpenasi yugnun satngunghilngughmeng pilghiinun mamlegmi. Itupill liigikesteki tawaten pillghit seghleghuut. 12Kayngunapigtut talwa akuzitkesaghqaaluteng tamaakut piiqegkangit aksaqluku. 13Iwernga qamagtengngwaaghluteng aliightekumeng nighugmun, taawa nateteghpigaatangi whateghlluwaaq aliighllequt, qayughllak sangwaa qamaglluni nighugem esghaghyaghqaaghtesleqaa. 14Tamaaken apalluqluku yuget pikaagut, “Qavalghiimi, taghtughhaaten. Unguvaa tuqulleghmeng enkaam Christ‑am kukeglleqaaten.”

15Enkaam kelengalusi kiyaghtek. Peghqinghunghilngughestun kiyaghtegpenasi; itupill peghqinghestun kiyaghtek. 16Pinitun atuqiteggu tamaghhaan pilleghqaghsi qayughllak aghneghni maaten yuget seghletun piiqut. 17Tamaaken apalluqluku nallufqaafsi, iwernga liigikiteggu sangwaa Atanghem pisqesullgha elpesinun.

18Suumegpenasi wine‑meng qayughllak naafqelleqiisi. Iwernga imightek Taghneghagneng, 19aleghquutaqlusi akuzitangitneng psalms‑et, ilagaatet, taghneghakunllu ilagaatneng. Ilagaghaqitek ilagaatnengllu psalms‑enengllu Ataneghmun, usuqillelighlusi ilugpesigun. 20Aatghakun Atanemta Jesus Christ‑am, iqamsiqayugvikumanginaghteggu Kiyaghneq Atanga saam tamaghhaan.

Nulighhetlu Ugitlu

21Malighqutaqngalusi ilagpesinun qayughllak siivakngukesi Christ‑a.

22Nuliighni, malighqutaqlusi ugigpesinun katam Ataneghmun pilghiistun. 23Qayughllak ugi naasquqaa nulighhan katam Christ‑a naasquqegkangat ugpeqat. Christ‑a Yugulighistekaat ugpeqat; ellngan yugusiqii. 24Katam ugpeqat malighqutaqellghistun Christ‑amun, tawateghpigaq salleghqun tamaghhaakun nulighhet malighqutaqsaghqaagut ugimeggnun.

25Ugini, piniqluki nuliisi katam Christ‑am piniqellghatun ugpeqat. Piniqepigtekaqii repall tuqumatkegkaqii. 26Ugpeqat agleghnaghsaqaqii aghtughyaghqaanghillghakun akuzitmi, pelungighsaqaqiillu aghvigluki meghqun. 27Christ‑a tawaten pikaaguq aangꞌghunnaluki ugpeqat ellminun katam pinighnalghiitun ugiighnaqelghiitun. Tuqukaaguq ugpeqat tagneqriitesqelluki, ungllevregiitesqelluki nalighmeng sameng alngunak afkuyiitesqelluki. Enkaam nuliighqaa agleghnaghllequq, avutngillequqlu. 28Ugim piniqsaghqaqaa nuliini piniqelleghmitun yugusini. Ugi piniqilghii nuliighmineng ellmineng piniqnguuq. 29Kitum alngunak ugumikigataa ellmi katam yugusini. Yeghlegi, neghestaqaallu aflengakaqaallu, katam tawaten Christ‑am piiqellghatun ugpeqanun, 30qayughllak nalighnequghiinkut ellngan yugusiin. 31Akuzitni Igaqegkani whaten igaqngaaq, “Tamaaken apalluqluku yugem unilleqaak atanillu naanillu ilannaluni nuliighminun. Enkaam nulighqullghiik ataasiighllequk.” 32Taam Akuzitem Igaqegkam qayvightaa megnunapiglleghhii ipapilleq: Christ‑allu ugpeqatlu ataasiigut. 33Iwernga taana elpesinunllu ayuquq: tamaghhaghmi ugim piniqepestaaghyaghqaqaa nuliini ellmineng katam piniqelghiistun. Tamaghhaghmillu nulighhem siivaksaghqaqaa ugini.

Currently Selected:

Ephesians 5: ess

Highlight

Copy