Ephesians 3
3
Paul‑em Qepghaatillgha Gentile‑enun
1Tamaaken apalluqluku, whanga, Paul, anusimingllaghvigmetunga qayughllak qepghaaskegka Christ Jesus elpesi apalluqlusi Gentile‑eni. 2Entaqun nagaquumaaghsi Kiyaghneghem nangllegtalleghmikun qepghaqalitkaqaanga elpesinun. 3Kiyaghneghem liitestaa whangamnun qayvightellghilnguq uspeqelleni. Qavnganghhaq latatkaghtekaqaqa taana. 4Atightuqufsigu latatkegkaqa liilleqaghsi liigikelqa qayvightellghilnguq uspeqelleq Christ‑ameng ayuqelghii. 5Sivunghani Kiyaghneghem ungipaatellghitii yuget qayvightellghilngughmeng uspeqelleghmineng. Iwernga ukuni aghneghni Agleghnalghiignekun Taghneghagnekun qayvightaa uspeqelleni agleghnalghiinun apostle‑minunllu uuknaliqisteminunllu. 6Whatetuq uspeqellgha: Gentile‑et ugpeqilleghmegteggun Pinilghiineng Ungipaneng ilasimaat Jews‑enun Kiyaghneghem quyastellghanun. Nalighneqaaghsimii ataasim yugusim, enkaam ilatut Kiyaghneghem akequsaanun Christ Jesus‑kun.
7Kiyaghneghem nangllegtalleghmikun, aghtughyaghqaanghilleghmikunllu tunusalitaanga qepghaghtengulunga ungipaqesqelluki Pinilghiit Ungipat. 8Ukalighpigaagunga tamaghhiitneng Kiyaghneghem yuganeng. Tawalliima Kiyaghneghem nangllegtalleghmikun tunusalitaanga whaten: nakmikaanga Gentile‑enun ungipaqesqelluki Pinilghiit Ungipat Christ‑am aklunginganeng ayuqelghiit. Aklungingi ingyaatngaat yuget liigikellghitneng. 9Kiyaghneghem nakmikegkaqaangallu liigikestesqelluki qamaglluki yuget qayvighsimangilngughmeng uspeqelleghmineng. Kiyaghneghem, ulimaghikam sameng tamaghhaaneng, qayvightellghitaa uspeqelleni piinlighyuggaalleghmeng maatemun. 10Taagken qilagnilnguut: igleghutilghiitlu, aghtughyaghqaanghillelgetlu, Kiyaghneghem liitesleqii allaaghhiinaghmeng peghqinelleghmineng. Tawaten pillequq yugmikun yughaghvignilngughteggun. 11Tamaakunguut Kiyaghneghem uspeqegkii salin nunangllalghilluni. Apeghiighumii Christ Jesus‑kun Atanemteggun. 12Ugpeqillemteggun Christ‑akun aglaghyaghqaaghsimaakut Kiyaghneghmun tetullngunaamtallu alingellngunaamtallu. 13Enkaangam iilqayagutegpenaan ugpeqilleghsi apalluqluku ikfiqutkengngukemsi. Ikfiqelleghma quulvaghtesleqiisi.
Piniqellgha Christ‑am
14Enkaam taana apalluqluku segesqughtunga sivungani Atam. 15Ellnganguuq atighilghii tamaghhiitneng nengllugutneng qilagmelngughnengllu nunamelngughnengllu. 16Yughaghtunga Kiyaghneghmun aklungighllaganeng aghtughyaghqaanghillelitesqellusi iknaqughsiisqeluki ilusi qaamkut Taghneghagkenkun. 17Yughaatkamsi Christ‑a kiyaghtesqelluku ilugpesini ugpeqilleghpesigun. Yughaatkamsi akulgusqellusillu, tunemalgusqellusillu piniqelleghqun. 18Yughaatkamsi, qamagllukillu Kiyaghneghem yugi, liigiksaqlegusqelluku Christ‑am piniqellghan, iqetulanga, tagtalanga, uusqaghtulanga, samavneghtulangallu. 19Elpesinun liisimakesqesugaqa Christ‑am piniqellgha, qaywa piyaqnaghngaan liigikngwaalleghqaa. Taagken piniqellghakun, Kiyaghneghem nangaghneghatun wata lliighllequsi. 20Kiyaghneghem aghtughyaghqaanghillghakun qepghalghiikun ilumnni, ellngan piyaqlegwaa qaayghulluku sangwaa alngunak aaptekaghput nalighmeng sumeghtaghaatkegkaghput. 21Kiyaghneq usuqellengli ugpeqatgun yughaghvignilngughteggun, Christ Jesus‑kunllu. Usuqiteggu quunperugllak kenlengunaan. Amen.
Currently Selected:
Ephesians 3: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
