Ephesians 4

Ugpeqat Christ‑am Yugusiqii

1Anusimingllaghaagunga qayughllak qepghaaskegka Ataneq. Kiyaghneghem nakmikegkaqiisi ellminun yugulusi; tamaaken apalluqluku kayemamsi kiyaghtesqellusi Kiyaghneghem kiyaghtesqesullghatun. 2Iiwleng qusevegllusi, yakumangilliqegpenasi, nuqenneghtulusi, tugukliitullusi piniqelleghqun. 3Kiyaghneghem Taghneghagkenka qerngughutkaqiisi nekeggmelleghqun. Enkaam nanghiiqughllagtek iiwleng kiyaghtek tawaten. 4Ataasiiguq yugusiq, ataasiiguklu Taghneghak, katam tawaten ataasimun sighimalleghmun Kiyaghneghem tagsighiisi. 5Ataasiiguq Ataneq, ataasiiguq ugpeqilleq, ataasiiguq paaptaayelleq. 6Ataasiiguq Kiyaghneq, Atakaat saam tamaghhaan. Ellngan igleghutngwaa sangwaa tamaghhaan, tamaghhaanituq, sametuqlu alngunak.

7Christ‑am tamaghhaamta tuunegkaqiinkut tunusameng qepghaqani pisqelluku. Tuunegkaqii taakut tunusat tuunyukelleghmitun. 8Tamaaken apalluqluku Akuzitni Igaqegkani igaqegkaalghii,

“Mayughaqngami uusqalleghmun tugukaqii uglaapiglleghhiit wayaqat,

yugetlu tunusaliquqaqii.”

9Sameng pisiiwa, “Mayuqaaguq”? Whaten pisiiguq, sivukluni ukikaaguq samavek asilighneghanun nunam. 10Enkaam ellnga taana ukikaq samavek, ellnganguuq ataasiq taana mayuqaq pamavek ingyaghluki qilaget, imighnaluku sangwaa qamaglluku nayuutngalleghmineng. 11Ellnganguuq tunusaliquqaq yugnun: ilangi apostle‑nguluki, ilangi uuknaliqistenguluki, ilangi evangelist‑nguluki, ilangi yughaghtenguluki, apeghtughistengulukillu. 12Taakut tunusalitkaqii apeghtiisqelluki Kiyaghneghem yugi ellngitnun qepghaatesqelluku ellnga. Kiyaghneq tawaten pikaaguq ellngitnun nekeftesqelluku Christ‑am yugusii. 13Taana qepghaqaq nagneghllequq kenlanga ataasiightellemnnun ugpeqillemteggun, liisimakellemteggunllu Ighnegha Kiyaghneghem. Taagken angtaniitngwaaghluta Christ‑atun lliighllequkut. 14Enkaam taghnughhaghhaananighllequkut. Tamaaken apalluqluku puughtesnaanghitukut yugnun temngimeng apeghtughillghitgun. Apeghtughillghit anuqestunllu imaghllugestunllu ayuqut nuugtaatalghiit yugneng. Tamaakut peghqinelghiit, iqlengalghiit yuget, iqlengateng ipasugnighsaghaqiit maghyaghquneghlluggnaluki yuget. 15Itupill akuzitkelteggu ipapilleq piniqelleghqun, enkaam wata Christ‑atun lliighllequkut sallemteggun tamaghhaakun. Christ‑a naasquqaat ugpeqat. 16Ugpeqani yugusiqiinkut Christ‑am. Ellngakun iingunaghmi yugusiq qerngughutkaaguqlu nuverraatkaaguqlu yugusim ivalungakun. Qamaglluteng nalighneghet qepghanneghmeggni qepghalleghqamegestun, taawa yugusiq nagwaaquq, iknaqughsaghaquqlu piniqelleghqun.

Unguvalleghraghaq Christ‑akun

17Enkaangam Atanghem aatghakun whaten piimsillu kelengasaaghamsillu: kiyaghtegpenasingam Gentile‑et kiyaghtaallghistun. Sumeghtaghallghit sasiinghilnguugut, 18umyugiitlu liigikingigalnguugut. Ilatnganghitut unguvalleghmun Kiyaghneghem tuunegkaanun, qayughllak nallukngwaaghaat, pineghlluguutlu. 19Talwa kaynguyugyaghqaananiimaat; atuqaqiitlu sangwaat alngunak seghleghet yugusimeng piyukegkiit. Nagneghusugaqiit qamaglluki seghleghet nuqetutegpenaki.

20Iwernga tamaakut liitellghitasi Christ‑am apeghtuusiitneng! 21Nagaqupestaaqaqaghsi ellnga, qayughllak maligsaaghtekegkangisi. Enkaam apeghtuqaagusi ipa apeghtuusaaneng Jesus‑em. 22Whaten apeghtuqaqiisi: seghleghet piyukelleghpesi puughlleqiisillu naafqelleqiisillu. Tamaaken apalluqluku pegteki nangaghnelusillu kiyaghtaalqesaqesillu. 23Itupill taghnegham nutaghlliki umyugasi. 24Enkaam atuqiteggu nangaghneghraghaghsi qayughllak Kiyaghneghem ulimakaqaa ellmitun ayuqluku: elqughutngapiigluku, agleghnaghlukullu.

25Enkaam iqlengiqnanightegngam! Itupill iiwleng apeghteggu ipapilleq ilagpesinun, qayughllak qamaglluta nalighnequghiinkut Christ‑am yugusiin. 26Sakritek iwernga seghleghqegpenasi. Siqineq tevightestegpenaan paninang sakritngulusi. 27Talwa tughneghaq pilleghqalitegpenaan nanghiiqusqellusi seghleghqelleghmun. 28Teglegniighta teglegnanighli. Itupill qepghaghli allgeghusaghqaaluni aklukegkamineng, tuuniyaghqaaghllequqlu aklukilghiinun. 29Akuzitkigpenasi seghleghmeng. Itupill aleghqughteki pinitun yuget aklukillghitni. Pinilghiit akuzitet kayemyaghqaqiit, aneghneghqesaghqaqiit nagallghiit. 30Qivghustegpenakeklu Agleghnalghiik Taghneghakek Kiyaghneghem. Taghneghagmineng nalluniiqaqiisi ellmi piknalusi. Tawaten pikaaguq elpesinun liisimakesqelluku itemulleqiisi seghleghqelleghpesineng Itemutellghem Aghnegha kaaskan. 31Pegteggu ugumikeraaq, sakraa, sakraaghllak, yupighqaghaataq, seghlequuq, qamagllukillu seghleghet. 32Yeghlegi nangllegtaghtek, nafughtaghtek ilagpesinun, seghevutullusillu, katam Kiyaghneghem seghevutkaqegkangisi Christ‑akun.

Currently Selected:

Ephesians 4: ess

Highlight

Copy