Ephesians 2

Tuqulleghmeng Unguvalleghmun

1Sivunghani taghneghasi tuqungayaghtut qayughllak qaatkumangilkesi Kiyaghneq, seghleghqestenguyaghtusillu. 2Tawatesaghtusi kiyaghtengngulusi nunam seghleghmun igleghneghanun. Qaatkengnguyaghaghsillu igleghutistengat tughneghaat qilagamelnguut. Ellnganguuq aangwaalleghpigaq tughneghaq igleghutilghii yugneng qaatkusigalngughneng Kiyaghneghmun. 3Qamaglluta kiyaghtekaagukut tamaakustun yugestun. Atuqegkaqaput seghleghqengngalghiit piyukellghi yugusimtallu umyugamtallu. Enkaam qamaglluta allgeqaatemnneng seghleghqestenguluta, aghyuullengnaqnguyaghtukut Kiyaghneghem sakraallghakun.

4Iwernga Kiyaghneq nangllegtaghllagtuq, piniqepigtiinkutlu. 5Qaywa taghneghaput tuqungayaghngiita apalluqluki seghleghqelleput, Kiyaghneghem unguvaghtiinkut maligulluta Christ‑amun. (Yugulikaagusi Kiyaghneghem nangllekellghakun.) 6Kiyaghneghem unguvaghtiinkut maligulluta Christ Jesus‑mun, whangkunnunllu aqumelgusightestaa qilagmi. 7Kiyaghneq tawaten pikaaguq kinguliighaghnun liitesqelluku piniqelleghrukutaaghllani whangkunnun Christ Jesus‑kun. 8Kiyaghneghem nangllegtallghakun yugulikaagusi ugpeqilleghpesigun. Yugulilleghsi elpesineng pilqenghitaghsi, Kiyaghneghem tunusaqaa elpesinun. 9Yugulillghitiisi apalluqluku salleghsi, enkaam qukaayugutkesaghqaqenghitaghsi. 10Kiyaghneghem ulimaaqiinkut tawatelluta. Christ Jesus‑kun ulimaaqiinkut qepghiisqelluki pinilghiit qepghaqat. Sivunghani taakut pinilghiit qepghaqat yataaghqengngwaaqaqii whangkunnun qepghiisqelluki kiyaghtellemnni.

Ataasiightelleq Christ‑akun

11Neqamikluku Gentile‑ngulusi allgeqaagusi. Jews‑et atighaqiisi “circumcise‑ellghilnguut”, ellmeggneng atiqayuguut “circumcise‑ekat”. (Circumcise‑ellghat yugusighhiiniitnituq.) 12Neqamikluku tamaani pilleghni nalluksaghaghsi Christ‑a kinangutanga. Nunataayaghtusi Israel‑eghmiinun enkaam ilatellghisaghtusi Kiyaghneghem akequsaqegkaanun ellngitnun. Nunami whani kiyaghtengnguyaghtusi sighimallngunasillu Kiyaghnengunasillu. 13Iwernga maaten pilleghmi Christ Jesus‑mun ilasimaasi. Sivunghani awavansaghtusi Kiyaghneghmeng, iwernga maaten pilleghmi tughaaghusimaasi ellnganun Christ‑am aawakun. 14Christ‑a ellnga katam nekeggmelqaghput. Ellnganguuq ataasiightestilghii Jews‑enengllu Gentile‑enengllu. Naafqegkaqaa minglluta aaftilghii whangkunneng, enkaam anguyakunnanighqegkaqiinkut. 15Christ‑am tuqulleghmikun atuunanighqegkaqii Jews‑et Liilightuusiitlu qelghusiitlu. Tawaten pikaaguq Jews‑etlu Gentile‑etlu ataasiightesqelluki ellmikun. Enkaam nekeggmellengestekaqii. 16Tuqulleghmikun qaquurakun, Christ‑am ugumikunnanighqii Jews‑etlu Gentile‑etlu. Taagken ataasiightestii, ilaliighutestiillu Kiyaghneghmun. 17Christ‑a tagiluni ungipaqikaaguq nekeggmelleghmeng elpesinun Gentile‑enun, awavantengnguyalghiisi Kiyaghneghmun. Ungipaqikaaguqlu nekeggmelleghmeng Jews‑enun, qantaghantengngulghiit Kiyaghneghmun. 18Enkaam Christ‑akun Jews‑enillu Gentile‑enillu tagiyaqlegughtukut Atamun ataasikun Taghneghakun.

19Enkaangam elpesi Gentile‑eni nunataananightusi. Itupill nunalgutkaaghtiisi Kiyaghneghem yugita, ilatusillu nengllugutanganun Kiyaghneghem. 20Mangteghaatun ayuqusi nekeftekat tunemangllaqiitgun apostle‑etlu uuknaliqistetlu. Christ Jesus ellnga katam kangigham uyghakaa. 21Qamaglluteng mangtegham nalighneghi nekeghquutngaat qerngaghmeng Christ‑akun. Taakut nalighneghet nulayalghiimeng temple‑ngughtengnguut Ataneghmun. Taana temple‑a agleghnaghtuq. 22Ilatngalleghpesigun Christ‑amun, maligullusi ilangitnun ugpeqanun nekeftengnguusi mangteghamun Kiyaghneghem kiyaghfiganun Taghneghagmikun.

Currently Selected:

Ephesians 2: ess

Highlight

Copy