Colossians 3

1Unguvaghtekaategpesineng maligullusi Christ‑amun, piyukaqiteki sangwaat Kiyaghneghem elpesinun pikesqelluki qilagmelnguut. Tawani Christ‑a aqumgaaq aghenqigneghakun Kiyaghneghem. 2Suumqaqiteki tamaakut qilagmelnguut, nakaan tamaakut nunamelnguut. 3Tawaten sumeghtaghaghaqitek qayughllak tuqukaagusi. Unguvalleghsi iighngaaq Christ‑ami Kiyaghneghqun. 4Christ‑a unguvalqaghput. Aliiqan, elpesillu aliilgusighlleqaghsi nighughqellghani.

Kiyaghtaalleluklu Kiyaghtaalleghraaghaqlu

5Taaqiteki atuqneghmeng yugusighpesi seghleghet piyukellghit, katam allaniiq, ukmanginneghilnguq kiyaghtaalleq, atuqsullgha seghleghem, pakigniiqlu. Pakigniiq maniguullghiistun kiyaghnengllaqanun ayuquq. 6Tamaakut apalluqluki Kiyaghneghem sakraalleghllaga taginguuq qaatkusigalngughnun ellnganun. 7Sivunghani tawaten kiyaghtengnguyaghtusi.

8Iwernga maaten atuqnanighteki qamaglluki ukut: sakraa, sakraaghllak, ugumikeraaq, seghlequuq, seghleghmengllu akuzitkilleq. 9Iqlengiqutegpenasi qayughllak taaqumaaghsi kiyaghtaallelugsi, ayghiitkaqsaqesillu. 10Enkaam kiyaghtaalleghraghaq atuqaaghsimaaghsi. Nutaghtengnguusi, Ulimaghistegpesistunllu lliighuusi. Tamaaken apalluquku liigikekestaghaghsi Kiyaghneq kinaghpigaatanga. 11Kiyaghtaalleghraghaghmi, allangughutngitut akulngitni Gentile‑etlu Jews‑etlu, akulngitni circumcise‑ekatlu circumcise‑ellghilnguutlu, akulngitni barbarian‑etlu, Scythian‑etlu, akulngitnillu qepghaghtelaaghetlu, qepghaghtelaaghunghilnguutlu. Iwernga Christ‑a qulighpigaaguq, kiyaghtengnguuqlu tamaghhamnni ugpeqani.

12Kiyaghneghem yukiisi agleghnalghiit, piniqepigtiisillu. Nakmikegkaqiisi. Enkaam nangllegtaghlusi, nangllekilusi, qusevegllusi, yakuqlusi, nuqenneghtulusillu. 13Sakritutegpenasi iwernga seghevutullusi. Kinkut anagtekangisi seghevunnakesi katam Atanghem seghevutellghistun elpesi. 14Qamaglluteng tamaakut megnunaghtut iwernga piniqelleq megnunalleghpigaaguq. Piniqutellghem ataasiightengngwaaghiinkut. 15Tamaghhaghpesi nalighneqiisi Christ‑am yugusiin, enkaam nakmikegkaagusi kiyaghtesqellusi qerngaghpesi nekeggmelleghqun. Taana apalluqluku Christ‑am nekeggmellghan igleghulliki ilusi. Iqamsiqayugngateklu. 16Yeqay Christ‑am apeghtuusii kemnaghluteng kiyaghllit ilugpesini. Apeghtuututaqlusi, kelengasaaghututaqlusillu tamaghhaakun peghqinelleghqun. Ilagaghtek Kiyaghneghmun iqamsiqayullelighlusi ilugpesigun, ilagaghtek psalms‑neng, ilagaatneng, maniguutmunllu ilagaatneng. 17Enkaam sangwaa pikaghsi, akuzitkun nalighmeng qepghalleghqun qamaglluku piiqiteggu aatghakun Atanghem Jesus‑em. Ellngakun iqamsiqayugvikiteggu Kiyaghneq Ata.

Naten Nengllugutet Kiyaghtelleghqaat

18Nuliighni, malighqutaqlusi ugigpesinun qayughllak tawaten Atanghem pisqesuwiisi.

19Ugini, piniqluki nuliisi, yakuqluki piiqiteki.

20Taghnughhaghni, qaatkelluki angayuqasi salleghqun tamaghhaakun, qayughllak tawaten pillghem efqughtaqaa Ataneq.

21Atani, sakraasaghaghpenaki taghnughhasi luuraq iilqennayukata.

22Qepghaghtelaaghni, iiwleng qaatkelluki piliitistesi. Iiwlengllu efqughhnaqluki esghapagughngaata nalighmeng esghapagunghiteghngaata. Qepghaateki ipapighqellusi qayughllak tawaten quulvaangwaaghsi Ataneq. 23Salleghpesini tamaghhaani qepghaghaqitek pinaqellghaghsi qamagtiiluku qepghaatepiglleghhiistun Ataneq, nakaan yugnun. 24Neqamikluku Atanghuuq Christ‑a qepghaatkaghsi. Allgeghlleqaghsi akileghtuusaghsi ellnganeng. Akileghtuusaq akequsaqegkaqaa tuunelleqniluku yugminun. 25Iwernga kina alngunak seghletun pista nallangighyaghqaaguq seghletun pillghanun qayughllak Kiyaghneghem nanqigsaghqaqaa tamaghhaan yuuk tawateghlluwaaq.

Currently Selected:

Colossians 3: ess

Highlight

Copy