Colossians 2

1Ungipaataghllamsi taakunginaghhaagneng qepghaatillemneng elpesinun, ugpeqanunllu Laodicea‑melngughnun, tamaghhaanunllu esghaasigalngughneng whangamneng. 2Tawaten piiqunga ilungit ilutughllengesqelluki, ataasiightesqellukillu piniqelleghqun. Enkaam liigikngwaaghlleqaat sangwaa Kiyaghneghem qayvighsimangilkanga sivunghani. Taana Kiyaghneghem qayvightekaa Christ‑anguq. 3Qamaglluki Kiyaghneghem peghqinellghillu liigikingallghillu Christ‑ametut. Taakuk aklungistun ayuquk iighngalghiik Christ‑ami.

4Ungipaatamsi, kitumun alngunak puughtestegpenasi temngineng apeghtughallghitneng, qaywa ipasugniteghngaata. 5Qaywa uyavansaghngaaghma elpesineng, umyugamkun elpesinitaqunga. Quyaanga qayughllak kiyaghlleghhiisi Kiyaghneghem pisqellghatun, ugpeqilleghsillu Christ‑akun aghuliilnguq.

Nagneghuteggu Kiyaghtaalleghsi Christ‑akun

6Tuguklilleghpesistun Christ Jesus Atanghuluku, tawateghpigaq ugpeqilleghqun kiyaghtek ellngakun. 7Ellngakun akulgutek asivanun samavek, ellngakun nekefteki kiyaghtaallesi enkaam iknaqughtek ugpeqilleghpesigun apeghtulleghpesistun. Iqamsiqayugumanginaghtek.

8Kelengalusi! Kitumun alngunak aghulaqutestegpenasi temngitwhatgun apeghtughallghitgun. Tamaakut apeghtughallghet yuget sumeghtaghallghitneng pinguut, tughneghaghnengllu pinguut, igleghutilghiit whani nunami. Christ‑ameng pingunghitut, 9qayughllak qamagtengngwaaghluni Kiyaghneq kiyaghtengnguuq Christ‑am yugusiini. 10Christ‑a naasquutinguuq igleghutistenunllu pilleghqalegnunllu. Ilateslusi Christ‑amun Kiyaghneghem tuunegkaqiisi unguvallepigmeng.

11Ilatngalleghpesigun Christ‑amun circumcise‑ekaagusi. Circumcise‑elleghsi yuget pistellghitaat, iwernga Christ‑am pistekaqaa. Enkaam itemutkaqiisi aghtughyaghqaanghillghaneng yugusighpesi seghleghqengngalghiit piyukellghitneng. 12Paaptaayaaqngafsi qunguutkaagusi Christ‑akun. Taagken maketkaagusi unguvalleghmun Christ‑akun qayughllak ugpeqegkesi Kiyaghneghem aghtughyaghqaanghillgha. Kiyaghneghem maketkaqaa Christ‑a tuqumeng. 13Tuqukaagusi qayughllak seghleghqestenguyalghiisi, qayughllaklu circumcise‑elghilnguusi yugusighpesigun. Iwernga Kiyaghneghem unguvaghtestekaqiisi Christ‑akun qayughllak seghevutkaqii qamaglluki seghleghqelleput. 14Qaatkenghitaqngamteki Kiyaghneghem Liilightuusi seghleghqellghet pikaput igaqegkaagut. Kiyaghneghem iqitkaqii igaquqat seghleghqelleput tuquqaalluki Christ‑am qaquuraanun. 15Kiyaghneghem wayaghteqaqii guututangit igleghutilghiitlu aghtughyaghqaanghillelgetlu tughneghaat. Tawaten tamanganun esghaghtestekaa kayaalqiilleni tamaakuneng tughneghaghneng.

16Kitumun alngunak nanqigtestegpenasi neghelleghmengllu meghelleghmengllu, neqenghaghqellghet aghneghitneng, nutaghat tanqit aghneghitneng, nalighmeng Sabbath‑et aghneghitneng. 17Taakut taghneghangullghiistun ayuqut taakunun piyaghqanun aga sivumelngughnun. Iwernga tamaakut ipapiget Christ‑ametut. 18Ilangi yugem qusevegngasugnighqesuneghtuut, manigughaqiitlu yaqulget. Iiwleng akuzitkaqiit esghaghwaalleteng esghaqateng. Ellngitnun ungipaatestegpenasi anaggutnganilusi. Ellngit esleqngaat temngitwhameng qukaayuglleghmeng qayughllak sumeghneghit yugem sumeghneqii. 19Ellngit ilannanightut Christ‑amun naasquutilghiimeng yugusimun. Igleghutngwaa iingunaan yugusiq, iknaqughsaghaqaallu neghqaqluku. Qerngaghmetestaqaa yugusiq atuqesluki nafliillu ivalungillu. Enkaam yugusiq nagunguuq Kiyaghneghem nagustesqesullghatun.

Tuqulghiitlu Unguvalghiitlu Christ‑ami

20Christ‑a tuqaaqngan tuqulgusiqallghuuqaqaghsi. Enkaam itemutkaagusi tughneghaghneng igleghutilghiineng whani nunami. Sanganꞌngam kiyaghtaqetsi nunamun pikepiglleghhiistun? Sangan qaatkaqesteki liilightughallghit whatelnguut, 21“Saflegpenaan, Naasiighpenaan, Saaftegpenaan?” 22Taakut liilightughallghet yuget neghegkiitnengllu meghegkiitnengllu ayuqut. Enkaam neghegkiitlu meghegkiitlu atuqsaghqaananighaqut. Tamaakut liilightughallghet taawanginaghhaq yuget liilightughalqiitlu apeghtuusaqiitlu. 23Tamaakut liilightughallghet apeghtughiit yuget peghqinesighwaaghesqelluki. Apeghtughiitlu amyuutkesqelluki yugusiit, atuqnaniisqelluki yugusiita pikyukellghit. Iwernga tawaten pillghita aghuliighsigatiit atuqnanilleghqameng tamaakut seghleghqellghet. Tamaakut liilightughallghet ipasugnitut iwernga temnginguut apeghtuusat.

Currently Selected:

Colossians 2: ess

Highlight

Copy