Colossians 4
4
1Qepghaghtelaaghet piliitistengitni, pinitungwaaqlu atunengwaaqlu piiqiteki qepghaghtelaasi, liisimakluku elpesillu Piliitistelguusi qilagmi. 2Yughaamanginaghtek, iilqayugpenasillu yughaghaqitek iqamsiqayugvikumaan Kiyaghneq. 3Yughaqufsi, yughaatkennakefsikutlu. Yughaghtek Kiyaghneghmun qelpeghutesqelluta amigmeng mingitesqelluki akuzitangi Christ‑ameng ayuqelghiit. Sivunghani Kiyaghneghem qayvighsimangitaa ipapilleq Christ‑ameng ayuqelghii. Iwernga Kiyaghneghem ungipaataanga ungipaqesqelluku taana qayvighsimangilnguq ipapilleq. Ungipaqegkaqutemneng taana ipapilleq anusimingllaghaatnga. 4Enkaam yughaatkitengnga una ungipaq ungipaqsaghqaaluku whateghlluwaaq katam Kiyaghneghem whangamnun pisqellghatun.
5Peghqinghwaaqitek ugpeqaanghilngughninneghpesini. Atuqaqiteggu tamaghhaan pilleghqaghsi ungipaasaghqaaluki Christ‑ameng. 6Aleghquneghpesiki iiwleng nangllegtaghlusi, akuziiqlusi itagnaghyugnaghlusi, nagasugnaghlusillu. Tawaten piiqitek liisimakesqellusi naten kiimsilleghqiit aapqughaallghit.
Paul‑em Aapqangi Yuget Ellminilnguut
7Tychicus ugpeqaalgutkaqa, piniqepigtekaqa. Qepghalgutkaqa, qepghaataqaallu Ataneq whangamnun maligulluni. 8Kayagtaqa elpesinun, liisimakesqelluku natetulvut enkaam kayemellengesqellusi. Ungipaannaaghiisi whangamneng. 9Kayagtaqallu Onesimus elpesinun. Piniqegkaaguq ataasiighmelnguq ugpeqaalgun, elpesineng pinguuq. Tychicus‑enkuk ungipaalleqiisi sameng tamaghhaaneng salleghneng maani.
10Aristarchus‑em anusimingllaghalgutma, Mark‑emllu atalgutangan Barnabas‑em suumqaqiisinguq. (Ungipaatkaqamsi latatgun Mark‑meng, kaasimakan elpesinun upughatesqelluku.) 11Jesus‑emllu, alla atelgem Justus‑meng suumqaqiisinguq. Taakunginaagut Jews‑et ugpeqat, qepghalgusighaqaatnga Ataneghpagullghanun Kiyaghneghem. Ilutuqutkanka elngaatall.
12Epaphras, qepghaghtenga Christ Jesus‑em, elpesineng pinguuq, ellnganllu suumqaqiisinguq. Iiwleng taakunginaghhaagneng yughaatkaqiisi angtaniitesqellusi, liisimakngngwaaghesqelluku sangwaa Kiyaghneghem pisqesullgha elpesinun, elpesinunllu qamagtengngwaaghluku piyukellgha pikesqelluku. 13Ungipaasugamsi Epaphras qepghaghllakaaguq kayusiinnalusi, kayusiinnalukillu Laodicea‑ghmiitlu Hierapolis‑eghmiitllu. 14Luke‑emllu piniqepigtekamta aghallegtam, Demas‑emllu suumqaqiisinguq.
15Ugpeqaalgutnun Laodicea‑melngughnun, Nympha‑munllu, ugpeqaalgutnunllu qernughutkayugnun maniguunnaluteng mangteghaani, ungipaannakesi suumqaqankanguq. 16Atightughnakesi ukut latat ugpeqanun qerngughutkayugnun yughaghvigani Colossae‑m. Wataghllaklu atightughnakesi ukut latat Laodicea‑ghmiit ugpeqiitnun. Atightughnakesillu latat Laodicea‑ghmiit ugpeqiita tuyughyaghqiit elpesinun. 17Archippus ungipaataghnnakesi whaten, “Wataghllak apeghiighnaken qepghaqaq Atanghem qelghutkaa elpenun.”
18Whanga, Paul, whanga katam iiggemneng una igaqaqa. Neqamiklunga anusimingllaghaagunga, qiipraghusighlunga ayuqunga. Qamagllusi suumqaqamsi.
Kiyaghneq nangllegtaghli elpesinun.
Currently Selected:
Colossians 4: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
