Acts 24

Jews‑et Anaggunnikangat Paul

1Tallimat aghneghet atughluki High Priest‑a Ananias, ilangillu siivanlleghet, akuzistekaghqaatlu Tertullus, kaatkat Caesarea‑mun. Nanqigtivigmi Governor‑mun Felix‑mun aapqiit Paul‑em seghletun pillghi. 2Tuqlughyatni Tertullus pikaq, “Angellemni Governor Felix‑mi, elpek apalluqluten nekeggmellelguukut nunamnni qavngarugllaggaaneng. Tamaakutlu kiyaghtellemnni allangughquqaghten pinightut. 3Salleghpenun tamaghhaanun iqamsiqayugllaguukut. 4Kimaawisnayukamken takestaaghhaaluku akuzinaqunga, iqamsiqayugvikamken nagannaqegkefkut. 5Una yuuk Paul seghleliighqistenguuq. Seghleliighqaqii qamaglluki Jews‑et naansaghngaata. Maghyaghqughtekaat Jesus‑em Nazareth‑eghmiim maligsaaghtengita. 6Talwa sakusiiqnaqegkaqsaghaa Temple‑a, iwernga tugukaqaghput. 7Nanqiggnaqegkaqsaghaghput liillightuusamta pillghatun, taawanginaq pilluwaghtet umiilgita Lysias‑em tagiluni pilluwaghteminun wayaghtestekaqaa whangkunneng. Taagken qelghii avutkistengi elpenun tagisqelluki. 8Governor Felix‑mi, aapqughaaquvgu liigikelleqaten anaggunnilleput ipangutangi.” 9Jews‑et ilatqaghtekat Tertullus‑mun, akuzillghi qamaglluki ipangunikiit.

Paul Mesighalghii

10Taagken governor‑em Paul akuzisqegkaa. Enkaam Paul pikaq, “Governor Felix‑mi, quyaanga mesighaghnaqelghiinga elpenun, qayughllak liisimakamken qavngarugllaggaaneng nanqigtistenguuten whangkunnun Jews‑enun. 11Elpeni liigiksugnaghtuq ipangutanga akugaarugllak Jerusalem‑etelqa maniguunnalunga Kiyaghneghmun. 12Anaggunnistema liisimakaatnga aaghtiiraaghumangitaqa kina alngunak, qapraghqiimangitungallu yugneng Temple‑mi, synagogue‑nnillu, talwa nani alngunak Jerusalem‑emi. 13Enkaangam tawaten pimanighngaaghmegtengnga ipapighqennaanghitaat. 14Iwernga apeghnaqaqa una elpesinun, manigughaqaqa Kiyaghneghat sivunemta maliglluku Tumanga Jesus‑em. Ukut yuget pikangat temnginguniluku. Iwernga whangallu ellngistun ugpeqanka Moses‑em Liilightuusii, uuknaliqistetlu igaqegkiit. 15Anaggunnistemtunllu ugpeqaqa Kiyaghneghem unguvaghtesaghqaqii qamagtengngwaaghluki tuqukat pinighyaghngaata, seghleghuyaghngaata. 16Enkaangam quunpeng kiyaghhnaqutkaqunga seghleghyugutkaghqiillunga Kiyaghneghmunllu yugnunllu.

17“Qafsinegyak ayumiqulleq atughluku qantaghaqunghhaq uteghnightunga Jerusalem‑emun manilinnaluki aklumalghiit Jews‑elgutenka, aghqerraaghnalungallu Kiyaghneghmun. 18Pelungighsaneghmeng apeghiighlunga Temple‑mi aghqerraaghumalunga, ilangita Jews‑et Asia‑meng pit esghaghaatnga. Uvitka paaghqituqlu seghleliighituqlu. 19Taakut Jews‑et sangameng taginghitat? Sameng anaggusimakuma ellnginguyaghtut aapghistekaghqanka seghletun pillemneng iwernga aviitut. 20Yeqay ukut whaanlenguut nagatkaqaatnga mesighaghaqngama Jews‑et agghivigitni, apeghlitgu anaggutelleghmeng naalkefikumakumegtengnga. 21Entaqun ellngitni seghleghuuq whaten piiqngamki, ‘Nanqigtaghpesinga qayughllak ugpeqegkenka tuqukat unguvaghyaghqaaniluki.’”

22Iwernga Felix‑em, liisimakngwaaghluku kiyaghtaalleq Jesus‑em apeghtuusaa, wintakusitkaa nanqigtegpenaan Paul. Pikaq, “Pilluwaghtet umiilgat Lysias kaaskan agghitkelleqaqa Paul.” 23Taagken umiilwaaghmun kayagutkaa Paul kelengakesqelluku, naqam anusimingllaghtesnaniqaa. Ighsakesnaniqiillu ilakumtaaghita sameng taginneghatgu aklukegkaaneng.

Felix‑enkuk Drusilla‑nkuk Nagatkangak Paul

24Qafsinat aghneghet atughluki Felix‑em Jews‑a nuliini, Drusilla, kelqelluku tagikaq. Tagsiqlighluku Paul, nagatkaak ungipalghii ugpeqilleghmeng Jesus Christ‑akun. 25Paul‑em akuzitkesaki ukut: pinitun kiyaghtaalleq, nuqenneghtulleq, Kiyaghneghemllu nanqigtilleghqaa tamaghhaanun. Governor Felix‑em alingluni pikaa, “Aanelghaatenꞌngam, alla aqfasleqamken pilleghqangegkuma.” 26Tawani pilleghmi Felix neghyunguyalghii Paul‑mun manililleqniluni pegtekumigu. Tamaaken apalluqluku tagsiqlighaqegkanga mulutegpenaan aleghquunnalutek.

27Taagken maalghuk ayumiqullghek atughlukek, Porcius Festus governor‑ngughtekaq. Iwernga Felix‑em efqughsugluki Jews‑et Paul unitkaa paninang qiipraghusighngaluku.

Currently Selected:

Acts 24: ess

Highlight

Copy