Acts 23

1Paul‑em qiivluki agghistet pikii, “Jew‑lgutemni, aghneghmun whavek kenlanga seghleghyugutangitunga kiyaghtellemni Kiyaghneghmun.” 2Aga High Priest‑em Ananias‑em nekevghalghiinun Paul‑em tungangani qelghutkaa Paul qasaghtesqelluku qaanghakun. 3Taagken Paul‑em pikaa, “Ipapestaaq Kiyaghneghem aghyuughlleqaaten, uyuq piniiyugneq! Liilightuusatgun nanqigsaghqaqaghpenga iwernga elpek naafqaten Liilightuusat qasaghtestelleghpegun.”

4Paul‑em saaghwanilnguut nekevghalghiit pikaat, “Seghletun aleghqughan Kiyaghneghem high priest‑nga.”

5Paul‑em pikii, “Jew‑lgutemni, liisimaksaqumkun high priest‑ngutanga tawaten pinayanghitaqa, qayughllak liisimaksaghaqa Akuzitngi Igaqegkani whaten pilleq, ‘Igleghutilghiit yugpesineng seghletun akuzitkesaghqaqenghitasi.’”

6Paul‑em liigikluki ilangi Sadducees‑ngutangi, ilangi Pharisees‑ngutangi iglagtuluni pikii, “Jew‑lgutemni, Pharisee‑nguunga, sivunghenkallu Pharisees‑nguut. Whaa nanqiggnaqaghpesinga qayughllak ugpeqegkenka tuqukat unguvaghsaghqaatangi.”

7Paul tawaten piyan Pharisees‑etlu Sadducees‑etlu aaghtiiraaghutkat aga malghughqengnginaamaghmeng pikat. 8(Tawaten pikat qayughllak Pharisees‑et ugpeqngukangit tuqukat unguvaghyaghqaaniluki, yaqulegtuniluku, taghneghaghtunilukullu, naqam Sadducees‑et ugpeqigalkangit tamaakut). 9Qenwat aaghtiiraaghullghiit iglagtughtekat. Ilangita Pharisees‑et apeghtughikayuget Liilightuusaneng mesiighaatkaat Paul whaten, “Sameng seghleghmeng naalkefikneghmeng aghtughaghput, ipa entaqun taghnegham nalighmeng yaqulgem aleghquumaa.”

10Wanlegi aaghtiiraaghuteghllagyata repall Paul wayaalluku lliighyatgu, pilluwaghtet umiilgita yakughyagulluku aqnighhnayukatgu pilluwaghteminun aqfasluku awitutesqegkaa agghisteneng. Enkaam aglaatesqegkaa pilluwaghtet mangteghiitnun.

11Tawani unugmi Atanghem aliighvikluku Paul pikaa, “Ilutuluten, katam tawaten Jerusalem‑emi ungipaqelleghpetun, Rome‑emillu ungipaqelleqaghpenga.”

Jews‑et Tuqunnaqutqegkangat Paul

12-13Unaamingani 40‑neng uglalghiit Jews‑et agghilluteng tuqunnaqegkaat Paul. Ellmeggneng akequtkat neghnaanghinnilutengllu, meghnaanghinnilutengllu kenlanga tuqutelleghmeggnun. 14Enkaam chief priest‑enunllu siivanlleghnunllu aglaghluteng pikiit, “Ipapestaaq akeqiikut neghnaanghinniluta kenlanga tuqutellemnnun Paul. 15Elpesillu agghistetlu aapteggu pilluwaghtet umiilgat taginneqigtesqelluku Paul aapqughaaghwaaghnaqniluku. Enkaam tumemi taakwani whangkuta tuqulleqaghput.”

16Iwernga Paul‑em uyghungan nagaqughluki agghillghit ungipaasaghtuqaa Paul pilluwaghtet mangteghiitnun. 17Ungipaasatni Paul‑em tuqlughluku umiilwaaq pikaa, “Uum nukalpigaam ungipaasuwaqaa pilluwaghtet umiilgat sameng, aglaataghtigu.” 18Umiilwaaghem tuguluku, aglaalluku pilluwaghtet umiilgat pikaa, “Anusimingllagham Paul‑em tagitesqaa elpenun una nukalpigaq, samenguq ungipaasuwaaten.”

19Umiilgem tasluqluku iqitulluku ellnginaaghsamek aaptekaa, “Sameng ungipaasugsinga?”

20Kiimsiqaa, “Jews‑et agghisimaat aapnaluteng Paul aglaataghtesqelluku agghivigmun unaami, aapqughwaghataghaghnaqniluku. 21Ugpeqegpenaki, qayughllak 40‑neng uglaghtut yuget iighluteng tumemi utaqiinaqnilghiit tuqunnaluku. Akeqimaat neghnaanghinnilutengllu, meghnaanghinnilutengllu kenlanga tuqutelleghmeggnun Paul. Apeghiighluteng utaqiigaqut naten pilleghqaghpeneng.”

22Umiilgem ineghtengngwaaqaa nukalpigaq, “Kina alngunak ungipaategpenaan ungipaasaghtuumanilunga.” Taagken aanestekaa.

Paul Aglaaskangat Governor‑mun Felix‑mun

23Taagken pilluwaghtet umiilgita tagsiqlighlukek umiilwaaghek pikakek, “Ungipaasaghtughteki 200 pilluwaghtet, 70 kuunitistet, 200 panastet igleghsaqleggiinaaghllinnguq Caesarea‑mun, ighivgaqun 9‑eklaagmi. 24Paul‑llu kuunimeng yataaghqunnakesi igleghusighqameng, wataghllak pinitun kaatunnakesi Governor‑mun Felix‑mun.” 25Taagken governor‑mun latatkegkaa Paul:

26Ukut latat Claudius Lysias‑meng pinguut Angellemnun Governor‑mun Felix‑mun, quyakamken.

27Jews‑et tugukaqaat Paul, tuqunnaqaqsaghpetaatlu iwernga liigikluku Rome‑eghmiingutanga pilluwaghtekullghiini aqfaaghput aqnighhnayukatgu. 28Liigiksugluku Jews‑enun sameng apalluqutanga agghistengitnun aglaataqa. 29Iwernga liigiksaqegka sameng apalliiteftuq tuqusaghqaaluni, talwa anusimingllaghyaghqaaluni. Taawanginaq Jews‑et qaatkuuneghinniluku Liilightuusameggnun piiqeftaat. 30Ungipaasatnga Jews‑ennguq tuqunnaqaqaat Paul, tawaninginaq elpenun aglaatestaqa. Taakutlu avutkistengi kayagtanka elpenun apeghyaghtiisqelluku apallaat.

31Enkaam unugmi tawani pilluwaghtet kayagtelleghmegestun aghulaqutkaat Paul kenlanga Antipatris‑mun. 32Unaamingani ilangi uteghniqat pilluwaghtet mangteghiitnun, taakut kuunitistet nagneghutkaat Paul Caesarea‑mun. 33Kaalluteng Paul aglaatkaat governor‑mun, latatlu tuunegkiit. 34Governor‑em latat atightughluki aaptekaa Paul, “Nalighneghaneng Rome‑em pinguzin?” Paul‑em kiimsiqaa, “Cilicia‑meng”. 35Governor‑em pilaataqaa, “Avutkisteten kaaskata nanqiglleqamken.” Taagken kelengakistenun kayagutkaa kelengakesqelluku Praetorium‑emi mangteghami Herod‑em ulimastekaani.

Currently Selected:

Acts 23: ess

Highlight

Copy