Acts 22

1Paul‑em pikii, “Anglegutemnillu siivanlleghnillu nagataghtengnga, liigikesnaqutkaghhnaqamsi saaqutemneng.” 2Jews‑et nagasamegteggu akuzilghii ellmegestun elngaatall qallegnanighwaaghutkat. 3Taagken pikii, “Jew‑nguunga allgeqaq Tarsus‑mi Cilicia‑melngughmi iwernga maani Jerusalem‑emi anglikaagunga. Gamaliel apeghtughistekluku liitngwaaqaqanka Liilightuusat sivunemta apeghtuusaqegkiit, enkaam tuunegkaagunga Kiyaghneghmun qaatkengngwaaghnaluku katam tawaten elpesistun. 4Elngaatall amyuqetaatkegkaqanka tamaakut qaatkutngalghiit Jesus‑em apeghtuusaanun repall tuqunnaqutkegkaqanka. Yugetlu aghnatlu tugustaqluki anusimingllaghtesquqaqanka. 5High priest‑emllu agghistetlu ipanguninaaghaat apelqa elpesinun. Whangamkun latat tuyughiit Jews‑elgutemnnun Damascus‑melngughnun, latatkumakangatnga ivaghiyaghtuunilunga ugpeqaneng. Naalkegkumki asighqelluki taginnaqnguyaghanka Jerusalem‑emun aghyuughnaluki.

Paul‑em Aapqanga Allangughtelleni

6“Taagken Jerusalem‑emeng Damascus‑mun kaasaghtughaqungallu aghneghem qukaani qilagmeng nighugllak kuukgutqaghtuq whangamnun. 7Uullghaghllunga nunamun nagaqughaqa ma pilghii, ‘Saul, Saul, sangama amyuutkaqsinga?’ 8Aaptaqa, ‘Kinanguzin, Ataneq?’ Kiimsighaanga, ‘Jesus‑nguunga Nazareth‑eghmii amyuqetaatkegken.’ 9Tamaakut igleghalgutma esghaqaqaat nighuk iwernga aleghqughtema menga nagaquumangitaat. 10Enkaam aaptaqa, ‘Ataneq, salanga?’ Atanghem piinga, ‘Nekevluten aglaa Damascus‑mun. Tawani kitum ungipaalleqaaten Kiyaghneghem yataaghqegkaaneng elpenun.’ 11Ayaamalghiinga nighugllagem angtalanganeng enkaam igleghalgutma taslughaatnga Damascus‑mun.

12“Kaasamta yugem Ananias‑nguuniiqegkangita esghaghyaghtughaanga. Elngaatall qaatkutngalghii Liilightuusamnnun, Damascus‑eghmiit Jews‑et pinistaghhiinatun akuzitkaqegkangat. 13Takulunga piinga, ‘Anglegutemni Saul, esghasagunneqigten!’ Enkaam tawaninginaq esghaasagullunga esghaghaqa. 14Piinga, ‘Kiyaghneghem, sivunemta maniguqiita, nakmikaaten elpenun liigikesqelluku piyukelleni, esghiisqelluku Seghleghqumangilnguq Qepghaghteni, nagatesqelluku aleghquqangaten. 15Enkaam ungipaghtekelleqaaten tamanganun esghaatelleghpenengllu nagatelleghpenengllu. 16Sameng utaqiigaqsin? Saaqsin paaptaayesten, seghleghqelleghten ughvughtestiki tuqlughilleghpegun Aatghakun Atanghem.’

Atanghem Kayagtekanga Paul Ungipiisqelluku Gentile‑enun

17“Taagken Jerusalem‑emun taginqigllunga, Temple‑mi yughaamalunga esghaghwaalleghqun 18esghaghaqa Ataneq. Piinga, ‘Aghulaqragkiighi Jerusalem‑emeng qayughllak maani tuguklighnaanghitaat ungipan whangamneng ayuqelghii.’ 19Kiimsighaqa, ‘Ataneq, Jerusalem‑eghmiit liisimakngwaaghaat synagogue‑nnun piiqlunga tugulaqaqanka ugpelghiit elpeneng, anaguleghtestaqankallu anusimingllaghtestaqankallu. 20Ungipaghten Stephen tuqutaqngatgu legan itagnaqegkaqaqa, taakut tuqutistengita qaasliit aatkiit aflengakegkaqanka.’ 21Atanghem piinga, ‘Aghulaqi, kayaggnaqngwaamken agavek uyavanun Gentile‑enun.’”

22Tamaakut yulghutet nagatkaat Paul kenlanga Gentile‑enun pinaqnillghanun. Taagken akilghuughllakat, “Tuquteggu! Unguvanguyaghqaanghituq!” 23Sakrituteghllagem angtalanganeng akilghuutkelluku qaasliit aatkateng nengugulluki aghulatkiit, sunamengllu quulmun milughmikat. 24Pilluwaghtet umiilgita esghapagluki pilluwaghteminun itghutesqegkaa Paul pilluwaghtet mangteghiitnun. Kayagutkaallu kagsagmigesqelluku aapghesqelluku sangan yulghuteghllagnun akilghuutkutanga. 25Iwernga asighqesatni Paul‑em aaptekaa umiilwaaq, “Rome‑em liilightuusiitni itagnaghyaghqaawaa kagsagmikufsigu Rome‑eghmii, talwa nanqigtegpenaan sameng anaggusimatanga?”

26Paul‑em tawaten piyatni umiilwaaghem umiilegteng takuluku pikaa, “Sanaqsin? Una yuuk Rome‑eghmiinguuq!”

27Taagken umiilgem takuluku Paul aaptekaa, “Ipa Rome‑eghmiinguziin?” Kiimsiqaa, “Aa‑a.”

28Pilluwaghtet umiilgita pikaa, “Whanga llivikuteghllaglunga Rome‑eghmiingughtekaagunga.” Paul‑em pikaa, “Whanga Rome‑eghmiingulunga allgeqaagunga.”

29Taakut aapqughaaghtekaghqaqsaqangi tawaninginaq iqillaghaatkat ellnganeng. Pilluwaghtet umiilgita liigiksamigu Paul Rome‑eghmiingutanga alingegkaq qayughllak asighqestekaqegkanga.

Paul Aglaaskangat Jews‑et Agghistengitnun

30Pilluwaghtet umiilgita liigikesukaa Jews‑enun sameng apalluqutanga Paul. Enkaam unaamingani qiipraghutngightestekaa. Taagken chief priest‑etlu agghistetlu qerngughutesluki aglaatkaa Paul ellngitnun.

Currently Selected:

Acts 22: ess

Highlight

Copy