Acts 21

Paul Jerusalem‑ellghii

1Unisamteki ugpeqat angyaghpagmun uuglluta nangaqaghtukut Cos‑mun. Unaamingani Rhodes‑mun kaalluta taagken nagneghtukut Patara‑mun. 2Tawani angyaghpagmeng naalkutukut Phoenicia‑nnaqelghiimeng enkaam uuglluta aghulaqukut. 3Esghaghyamteggu qiighqaq Cyprus uughqangakun nagneghtukut Syria‑m esnengakun Tyre‑mun. Tawani usingighaat angyaghpak. 4Tamaani ivaghluki ugpeqat naalkesamteki ellngitnitukut ataasiq santilleq. Agleghnalghiignekun Taghneghagnekun ugpeqat Paul Jerusalem‑etesnaniqaat. 5Aghulaqsaghqaaghtengngamta ugpeqaalgutemta nulighqullghiit, avaqutaqullghiit maligtiinkut esnamun. Tawani segesqughquulluta yughaatukut. 6Taagken uugtukut angyaghpagmun, qaniighisteput nemeggnun aglaghtuutut.

7Aghulaqluta Tyre‑meng kaatukut Ptolemais‑mun. Tamaani quyakluki ugpeqaalguteput ataasiq aghneq ellngitnitukut. 8Unamingani Caesarea‑mun kaalluta Philip‑enkunitukut evangelist‑emi. Maaghraghvinleqegkangat nakmikegkat kayutnguluki. 9Estamaneng panilek ugiighumangilngughmeng, qamaglluteng uuknaliqistet. 10Salin tamaansimaluta uuknaliqista Agabus, Judea‑meng kaatuq. 11Whangkunnun tagiluni Paul‑em tafsinga iikluku asighqelluki iteganillu iiggenillu piinkut, “Agleghnalghiik Taghneghak piik, ‘Jerusalem‑emi tafsim uum yumanga Jews‑et asighqesaghqaqaat, taagken tuunelleqaat Gentile‑enun.’”

12Whangkutallu ilangitallu yuget nagalluku Agabus tawaten pilghii ighlegaatkesaghaghput Paul Jerusalem‑etefqaan pisqelluku. 13Iwernga Paul‑em piinkut, “Sangafsi qiyamaghpesi tawaten pistengnga? Seghleliighqaghpesinga! Whaa apeghiighwaaghlunga ayuqunga asighqesaghqaalunga Jerusalem‑emi, talwa tuquyaghqaalunga apalluqluku Ataneq Jesus.”

14Paul sagiqsan iilqayagutaghput enkaangam piighput, “Yeqay Atanghem piyukellgha apeghiighli.”

15Enkaam qafsina aghneq atughluku yataaghqelluta aghulaqukut Jerusalem‑emun. 16Ilangita ugpeqat Caesarea‑ghmiit maligtiinkut, kaasamta Jerusalem‑emun aglaatiinkut tukughqamnnun Mnason‑enkunun, Cyprus‑eghmiimun. Ugpeqaqsuwhaaghteggun maligulluni ugpeqegkaa Jesus.

Paul Laalighlleghhii James‑mun

17Jerusalem‑emi ugpeqaalgutemta quyakluta upughatiinkut. 18Unaamingani Paul maliglluku esghaghyaghtughyaqefut James, Elder‑etlu qamaglluteng tawanteftut. 19Paul‑em quyakegkii. Taagken ungipaatkii tamaghhaaneng Kiyaghneghem apeghiillghaneng qepghalleghmikun Gentile‑enilluni. 20Nagalluku usuqegkaat Kiyaghneq. Taagken pikaat Paul, “Ugpeqaalgutemni, liisimakan uglapestaaghllaget Jews‑et ugpeqaat Christ‑a. Elngaatall qaatkusimanginaghyugaqutlu Moses‑em Liilightuusaanun. 21Ungipaataqiinnguq apeghtughaqatennguq qamaglluki Jews‑et, Gentile‑et nunangitnilnguut qaatkutefqiita Moses‑em Liilightuusaanun pisqelluki. Piiqatenllunguq ighneghit circumcise‑enghisaghngaata, talwanguq atuqesnanighaqan Jews‑et kiyaghtaallghat. 22Kaasimaniluten nagaqupestaaghnaqngwaaten. Sanaqestangam? 23Itagnapiggnayaghtuq pisqellemtestun piyaquvek. Estamat yumta apeghiighyaghtungestaamiit akeqilleghteng Kiyaghneghmun. 24Elpeklu maliglluki Temple‑mun ukmangighyaghtaa Moses‑em Liilightuusaan qelellghatun. Tukfighnaketenllu teghikusat aghqutkaghqasi enkaam aghqerraghhaasi Kiyaghneghmun. Taam kingunganeng yuget taakut taawa meqestengngwaaghluteng qigughyaghqaaghllequt Liilightuusat pisqellghistun. Elpeklu ukmangiquvek qamaglluteng Jews‑et liigikelleqaat qaatkutngallghen Moses‑em Liilightuusaanun. Liigikelleqaatlu nagaquqaghteng tamaana temngingutanga. 25Taakut Gentile‑et ugpeqiit ungipaatkaqaput latatgun qaatkesqelluki ukut, ‘Neghegpenasi neqmeng aghqutkegkameng kiyaghnengllaqanun. Neghegpenasi aawmeng. Neghegpenasi qemitkameng teghikusameng. Nuqetaqiteklu sex‑kun seghleghqelleghmeng.’”

26Enkaam unaamingani Paul ukmangighyaghtuqaq Liilightuusat pisqellghistun maliglluki estamat yuget ukmangighyaghtulghiit. Taagken Paul Temple‑mun iteghluni priest‑et pikii, “Santilleq atughluku estamat yuget ukmangighsalleghteng apeghiighnaqaat Liilightuusat pisqellghistun. Tukfighlleqanka teghikusat aghqutkaghqiit enkaam aghqerraaghutaataqaghnakesi taakut yuget.”

Paul Tugukangat Temple‑mi

27Iiwenllu santilleq naangnaqaquq taakut yuget ukmangighsallghat, Asia‑meng pit Jews‑et esghaqaat Paul Temple‑melluku. Aga akuqaghluku akilghuukat, 28“Israel‑eghmiini, tagiightekqun! Una yuuk navek alngunak pineghmini seghlequughaqiinkut Jews‑eni whangkuta, Liilightuusaputlu. Wataqaaghaq seghleghataghaaguq tagitaqngamiki Gentile‑et Temple‑mun Liilightuusat iinghutkiit. Sakusiiqaqaallu una agleghnalghii Temple‑a.” 29(Tawaten pikiit sumeghmeggni Paul‑mun Gentile‑a itghusimaniluku Temple‑mun, qayughllak Jerusalem‑emi esghaqaqegkegket Trophimus‑enkuk qerngaghmellukek. Trophimus Gentile‑ngulghii Ephesus‑eghmii.)

30Jerusalem‑eghmiit ugumiyugllakat, ketanqusnaq aglaghtuutkat Temple‑mun akilghuusimaghmeng, seghleliighqiighllakat. Temple‑mi Paul akuqaghluku qamuqaat eslatmun. Tawaninginaq kitum amigllaget uumkii. 31Tuqunnaqutkumaluku Paul Rome‑eghmiit pilluwaghtengita umiilgat ungipangegkaq qaga iingunaghmi seghleliighqiighllaguniluku. 32Tawaninginaq Rome‑eghmiit pilluwaghtengita umiilgat kelqegkaq umiilwaaghnengllu pilluwaghtenengllu enkaam aqfaasnaq aglaqat. Yulghuteghllaget esghaghluki pilluwaghtet qevuutiighnaniqaat Paul. 33Taagken pilluwaghtet umiilgita tuguluku Paul asighqestekaa malghugneghneng qiipraghutneng. Pilluwaghtet umiilgita aaptekii, “Kinangaawa una yuuk? Samaa?” 34Ataasikun akilghuumeng kiimsiisaqmegteggu repall umiilgem liigikenghitkii sameng pitangi. Enkaam pilluwaghtet umiilgita yugminun aglaatesqegkaa Paul pilluwaghtet mangteghiitnun. 35Tutemqiiraaghnun kaatulluku pilluwaghtet kefkaat Paul, qayughllak yulghuteghllaget suugllugughteghllalghiit. 36Yulghuteghllaget maliglleghaatkaat akilghuusimaghmeng, “Tuquteggu!”

Paul Mesighalghii

37Pilluwaghtet itghunnaqngatni Paul‑em aaptekaa pilluwaghtet umiilgat Greek‑estun, “Aleghquqaghnayanghisikaan?” Kiimsiqaa, “Awii Greek‑estun akuzikayuguziin? 38Taanangunghisiin Egypt‑eghmii qavnganghhaq qerngughtikaq yugmeng awiinnaluku Rome‑em kavemenga, kilgaanun aghulaqutkii 4,000 yuget atelget, Yugtaghtet?” 39Paul‑em kiimsiqaa, “Jew‑nguunga, Cilicia‑ghmii, allgeqaagunga neghllagmi Tarsus‑mi. Aleghquqaghnayanghisingii yuget?” 40Pilluwaghtet umiilgita angeghqumaksatni, Paul nekevluni tutemqiiraaghteggun iiggeni nengugutkii nepighesqelluki. Enkaam qallegnanighyata aleghquqii Hebrew‑stun.

Currently Selected:

Acts 21: ess

Highlight

Copy