Acts 15

Apostle‑et Agghillghat Jerusalem‑emi

1Taagken Judea‑meng ilangi yuget tagiluteng Antioch‑mun ugpeqanun apeghtughikat, “Yugulillengnaanghitusi wetkuqun circumcise‑ekufsi Moses‑em Liilightuusaan qelellghatun.” 2Iwernga Paul‑enkuk Barnabas‑enkuk elngaatall aaghtiiraaqiik taakut yuget apeghtuusiitneng. Enkaam ugpeqat nakmikegkiit Paul‑enkuk, Barnabas‑enkuk, ilangillu yuget Antioch‑meng pit, Jerusalem‑etesqelluki aapsaghtiisqelluki apostle‑etlu Elder‑etlu qerngaghmelnguut naliq apeghtuusaq elqughutngatanga.

3Kayagsisteng Paul‑enkut igleghatkelluku Phoenicia‑kunllu, Samaria‑kunllu ugpeqat tamaanlenguut ungipaatkiit Gentile‑et Kiyaghneghmun qiivuusimaniluki, enkaam qamaglluteng ugpeqat quyateghllakat. 4Kaasata Jerusalem‑emun apostle‑etlu, Elder‑etlu, ugpeqatlu upughatkiit. Taagken Paul‑enkut apeghlaataqaat Kiyaghneghem apeghiillgha ellmegteggun. 5Ilangi ugpeqat Pharisees‑et nekevluteng pikat, “Tamaakut Gentile‑et yugulillengyaghqaanghitut wetkuqun circumcise‑elutengllu, qaatkullutengllu Moses‑em Liilightuusaanun.”

6Taagken apostle‑etlu Elder‑etlu qerngughutkat agghitkennalukek taakuk. 7Akuzitkenneghpagllakaat. Taagken Peter‑em nekevluni pikii, “Ugpeqaalgutemni, liisimakaghsi qavngaq Kiyaghneghem nakmikegkaqaanga Gentile‑enun ungipaqisqellunga Pinilghiineng Ungipaneng ugpeghesqelluki. 8Kiyaghneghem liisimakilghiim yugem tamaghhaan sumeghtaghallghaneng, tugukliqaqii Gentile‑et. Kelgutkaqaa tuguklighilleni ellngitneng tuunelleghmikun Agleghnalghiik Taghneghak katam tawaten whangkunnun tuunelleghmitun. 9Whangkutestungwaaq kiyaghutaqii; whangkutestungwaaq ukmangighaqii ilungit ugpenghata. 10Enkaam sanganꞌngam Kiyaghneq sakraasnaqutkengngusteggu qelelleghpesigun Gentile‑et ugpeqiit qaatkelluki Liilightuusaput kiyaghtesqelluki? Talwa sivunemtallu whangkutallu qaatkepagningilkeput taakut Liilightuusat yugulillengnaluta. 11Iwernga ugpeqaghput Kiyaghneghem yugulikaqiinkut kayusillghakun Atanghem Jesus‑em tawateghpigaq Gentile‑enun pilleghmitun.”

12Taagken tawantullghiit qallegnanighwaaghulluteng nagatkagket Barnabas‑enkuk, Paul‑enkuk aapqangik ellmetegnegun Kiyaghneghem allaaghlluwhaghtillghi Gentile‑enun. 13Akuzineghmeng taaqsayek James‑em pikii, “Ugpeqaalgutemni, nagataghtengnga! 14Simon Peter‑em ungipaatiinkut naten Kiyaghneghem nakmikuqestallghi Gentile‑et ellminun katam yuguluki. Tawaten pilleghmikun liigikestekaqii ellngitlu piniqniluki. 15Enkaam Kiyaghneghem sallgha Gentile‑enun elqughutuq uuknaliqistet igaqegkiitnun. Akuzitni Igaqegkani Ataneq pikaaguq:

16‘David‑em mangteghaa uulqaaguq iwernga uteghnighlunga nekefneqiglleqaqa.

Naavumayaghngaan nallghusaghlleqaqa.

17Taagken qamaglluteng ilangi yuget Gentile‑eneng nakmikegkama whangamnun katam pinguluki,

ellngita liisuglleqaat Ataneq.

18Atanghuuq tawaten akuzikaq,

ima qavngarugllak ellngan liitestekaqii tamaakut.’”

19James‑em nagneghutkii, “Enkaam whanga sumemni Gentile‑et qiivegkat Kiyaghneghmun qaatkutesqughaafqiita Liilightuusamnnun pilteki. 20Itupill latatgun neghesnaniilteki neqmeng aghqutkegkameng kiyaghnengllaqanun, qemitkameng teghikusameng, aawmeng; ineghteltekillu seghleghqusiqefqaan sex pisqelluku. 21Tawaten piyaghqaanghitut qayughllak Moses‑em Liilightuusaan iinghutkaqii tamaakut. Ima qavngarugllaggaaneng Jews‑et nagataqiit Liilightuusat atightughluki ungipaqenghatki Sabbath‑a tamaghhaan, nani alngunak synagogue‑ni.”

Latat Gentile‑et Ugpeqiitnun

22Taagken apostle‑et, Elder‑et, qamagllutengllu ugpeqat nakmiiqat yugmeggneng maligutesaghqameng Paul‑enkugnun Barnabas‑enkugnun Antioch‑mun pinaqelghiignun. Nakmikegkagket Silas‑enkuk Judas‑enkuk ateghaqelghii Barsabbas‑meng. Taakuk yugek Jerusalem‑eghmiit ugpeqiita siivakepigtekagket. 23Elkegnekun tuyuqiit latat whaten igaqegkat:

“Whangkuta apostle‑enillu Elder‑enillu lataaqukut Gentile‑enun ugpeqaalgutemnnun Antioch‑melngughnun, Syria‑melngughnun, Cilicia‑melngughnunllu, quyakamsi!

24Nagaquumaakut yumtanguq ilangita takulusi sameng pilusi seghleghyugtekaqiisillu kukragyugtekaqiisillu. Naqamllu whangkuta tawaten pisqumangitaput. 25Enkaam qerngaamta agghilluta nakmikagput Judas‑enkuk Silas‑enkuk maligutesqellukek piniqegkamnnun ugpeqaalgutemnnun Barnabas‑enkugnun Paul‑enkugnun, elpesinun pinaqelghiignun. 26Taakuk Barnabas‑enkuk Paul‑enkuk tuqusaghngiistek pikaaguk apalluqluku Ataneghput Jesus Christ‑a. 27Judas‑enkuk Silas‑enkuk kayaggnaqagput aapghwaaghesqelluki taakut ataasit latatkegkaput elpesinun. 28Agleghnalghiimllu Taghnegham, whangkutallu itagnaqamsi allulluki Jews‑et Liilightuusiit atuqenghisaghngaaghpesiki pisqelluki. Iwernga ukut Liilightuusat elpesinun atuqesugaput: 29Neghegpenasi neqmeng aghqutkegkameng kiyaghnengllaqanun, aawmeng, teghikusameng qemitkameng, nuqetutaqiteggullu sex‑kun seghleghqelleq. Maligtekufsiki taakut Liilightuusat taawa pinitun pillequsi.

Tawatenginaq lataamsi.”

30Taagken taakut yuget aghulaqegkat Jerusalem‑emeng Antioch‑mun. Kaasameng qerngughlluki ugpeqat tuunegkiit latat. 31Atightughluki latat elngaatall quyateghllakat qayughllak ilutughlleghhiit. 32Judas‑enkuk Silas‑enkuk elkeklu uuknaliqistengulghiik, enkaam ungipaqiighaataghllakak ugpeqanun ugpellghit iknaqughtesqelluki. 33Tamaantelqinaghlutek aghulaqsukak. Enkaam ugpeqat aghulaqestekagket whaten pilukek, “Nekeggmellelgutek igleghalleghpetegni.” Taagken uteghniqak kayagtistemegnun Jerusalem‑emelngughnun. 34Iwernga Silas tamaansukaq. 35Taakuk Paul‑enkuk Barnabas‑enkuk Antioch‑metaaghaqak. Elkeklu maligullutek uglapiglleghhiinun ugpeqanun apeghtughikaklu ungipaqikaklu ungipaaneng Atanghem.

Pellghututellghak Paul‑enkuk Barnabas‑enkuk

36Tagtalmi Paul‑em pikaa Barnabas, “Takuughaqaaltegneki ungipaqivikegkapung Atanghem ungipaaneng, esghaghyaghtuultegneki natetulangi ugpeqaalgutepung.” 37Barnabas‑em kelqesukaa John Mark, 38iwernga Paul‑em kelqesugumangilkanga, qayughllak Pamphylia‑melluteng John Mark‑em unitkakek qepghaqaghteng taaqestegpenaan. 39Paul‑enkuk Barnabas‑enkuk aaghtiiraaghutkeghllagluku pelleghmun aghulaquutkak. Barnabas‑em kelqelluku Mark angyaghpagkun Cyprus‑mun pikaq. 40Enkaam Paul‑em aghulaqfagilgami nakmikegkaa Silas kelqennaluku. Taagken ugpeqat yughaatkellukek neghyukutkagket Ataneghmun aflengakesqellukek. 41Igleghtekak Syria‑kunllu Cilicia‑kunllu iknaqughsaamiita ugpeqat ugpellghit.

Currently Selected:

Acts 15: ess

Highlight

Copy